2 Corintio
Chi k'aadeapema k'art'a Pablopa bɨda ũpẽarã Corinto p'uurudepema pae
Naapema k'art'a ũpẽarã Corinto p'uurudepema pae bɨk'ari Pablopa nãɨ k'art'a bɨsima. Waapẽarã k'art'a be k'aepẽra nãɨ k'art'ade ara ichi k'orea minachia bɨsima.
Ũpẽarã Corinto p'uurudepemarãpa chi Pablopa naa bɨda k'art'a eda jaradak'ari, ichia bɨda jĩra oosidama. Mãɨ k'orea chi nemietá oo badat'a Pablopa k'ɨ̃risia atuasima (2:5-11). Mãɨnepa Pablo sõpiasima ãchia nemietá oo p'anana itu bɨdada pẽra (7:2-16). Maamina chi eda waapẽarãneenepemarã eda chedak'ari jara p'aneesidama Pablo piarã Jesucristopa peedawẽ pasit'a. Pablopa mãmá wãyane ak'ari wãwẽa bɨ pẽra sea jara bɨade apachidama (1:15—2:4nea). Mãɨnepa jarapachidama ãchia erreara ũpẽarã Jerusalenepema pae jɨrɨp'e p'anana Pablopa ara ichi pae ataparit'a. Mãɨ awara jarapachidama ãchi Jesucristopa peedaɨrã chi minachia k'awa berã (11:4). Ũpẽarãpa mãɨ ẽpẽrarã pedea ĩjãanana pẽra Pablopa k'awa k'ɨ̃risiawẽa beesima (11:1-15).
Capítulo 1—7 Pablopa bɨsima Jesucristopa ichi piarã peeda k'orea. Capítulo 10—13 abarik'a bɨ bɨma. Mãɨ awara jara bɨma ãchi ak'ɨde wãrune wapida nemietá oo berã ome k'ĩra chupuriaiwẽ. Capítulo 8—9 bɨ bɨma sãmaasã́ erreara ũpẽarã Jerusalenepema pae jɨrɨp'edai p'anɨ.
Nãɨ k'art'ade chi k'ɨ̃risia minachia bɨ 5:20de bɨ bɨma: «Mãɨpuru Cristopa tai peesima ichi pari pedeadamẽrá. Taidepa Tachi Ak'õrepa mãrá t'ɨ̃ bɨma ichi ome pia p'ananamẽrá. Taipa Cristo t'ɨ̃nepa mãrá chichupuria idiutama: Tachi Ak'õre ome pia p'anat'ɨ».