Gálata
K'art'a Pablopa bɨda ũpẽarã Galacia tuadepemarã pae
Pablopa naa Jesucristo k'orea jarade wãside, nãɨrã p'uuru Galacia tuade bedea wãsima: Antioquía Pisidiadepema, Iconio p'uuru, Listra, mãɨnepa Derbe p'uuru (Hecho 13:1—14:23). Ẽpẽrarã mãɨ p'uurude berã judiorãwẽ pasima. Pablopa mãma jarateak'ari waapẽarã judiorã chedak'ari jaratea p'aneesidama Cristode ĩjãanai p'anɨ awara, k'ak'ua tauchaadai p'anɨ. Mãɨ awara jara p'anasidama Pablopa ãchiá Moisepa bɨda jõma ãarea ĩjãapidawẽ pẽra, ichi Cristopa peedawẽane a p'anasima. Mãɨne ũpẽarã Galacia ĩjũanepemarãpa jãɨrã judiorãpa jaratea p'anɨt'a ũri p'aneesidama.
Mãɨ k'orea Pablopa nãɨ Gálata k'art'a bɨsima. Ãyo 50de bɨsima. Naa Pablopa ũpẽarã ɨtɨasima pedea pia Cristo k'orea ĩjãanak'ari, ya maapae k'ɨ̃risia awara ũri p'aneesidadeepuru. Mãɨ ɨ̃ari bɨsima sãmaasã́ Jesucristopa ichi t'ɨ̃sit'a judiorãwẽmá jaratea nipamẽrá mãɨnepa chi atepe k'awa p'anɨ ũpẽarã Jerusalene berãpa ichia mãɨya oo bɨt'a pia unu p'anɨt'a (Hecho 15de). Mãɨ awara bɨsima Cristode ĩjãa p'anɨ k'orea Tachi Ak'õrepa ichi sõpiadepa tachi chi ichidirã jĩp'a berã paara bɨparit'a.a Jõma mãɨ 1:1—2:21 bɨ bɨma.
Mãɨ ɨ̃ari Pablopa bɨsima chi Moisepa bɨda ĩjãapii p'anɨnepa mãɨ judiorãpa judiorãwẽa chi pedea pia Cristo k'orea itu bɨpi p'anɨt'a mãɨnepa mãɨ Moisepa bɨdade ĩjãautapa jõma oodai p'anɨmina p'ue oodaiwẽma. Mãɨ k'orea bɨsima Abrahanpa Tachi Ak'õrene ĩjãana pẽra, Ichia mãɨ k'aripasit'a. Mãɨya oosima, Moisepa mãɨ bɨi naena. Bɨsima ãchia mãɨya ĩjãanaipɨra Tachi Ak'õrepa k'aripait'a Abrahán k'aripada jĩra. Jõma mãɨ bɨ bɨma 3:1—4:31nea.
Pablopa k'aadea bɨsima pedea pia Cristo k'orea ĩjãanaipɨra tachi Moisepa bɨdade p'anana waa mãɨne p'ananaiwẽma, chi chipari pae mimiapataɨrã pada jĩra. Mãɨpari Tachi Ak'õre Jaorepa tachi ateewãipɨ. Mãɨ k'orea bɨsima sãmaasã́ ichi Jaoredepa nipadai p'anɨ. Mãɨnepema bɨ bɨma 5:1—6:18.