1 Corintio
Chi naapema k'art'a Pablopa bɨda ũpẽarã Corinto p'uurudepemarã pae
Pablopa nãɨ k'art'a ũpẽarã Corinto p'uurudepemarã pae bɨsima. Mãɨ ãyo 55de Ép'eso p'uurudepa tea peesima.
Pablopa Corinto p'uurude chi Jesú k'orea pedea pia naa jarateasima (Hecho 18:1-17de). Chi judiorã ará pedeapataɨ tede jaratea bada pẽra waapẽarã judiorãpa ĩjãasidama. Maapae judiorã awaraɨrãpa Pablo ãyá jeret'aadak'ari te awaraɨde jaratea beesima. Ara mãɨya bɨde waapẽarã griegorãpa ĩjãasidama. Pablo Corinto p'uurude ãyo abaak'ari ya estarik'a basima.
Corinto p'uuru waibɨa basima. Ẽpẽrarã 600.000 mãma p'anasima. Mãɨ awara ãchi sãdorã te minachia ua p'anasidama. Maamina mãɨ sãdode ĩjãanai k'orea nemietá k'ĩra p'era oopachidama waapẽarã ome. Waapẽarãpa Jesucristode ĩjãa p'ananamina wapida ara mãɨ nemietaade nipapachidama. Mãɨ awara chi ũpẽarã t'ãena nepɨra wawaria unusima.
Naa Pablopa ãchi ɨtɨasima ãchi k'ak'awá pedea p'anɨ k'orea, chi k'aide ĩjãanai k'awadawẽa p'anɨẽra (1:1—4:21). Mãɨ ɨ̃ari bɨsima nemietá waapẽarã ome oopidaemaapa (5:1—6:20). Mãɨ ɨ̃ari chi ũpẽarãpa naena ididada Pablopa p'anoosima. Capítulo 7de k'ima atadai k'orea ididada p'anoosima. Capítulo 8—11 p'anoosima ãchi juapa oodada sãdo k'orea sãmaasã́ oodai p'anɨ. Capítulo 12—14 Tachi Ak'õre Jaorepa oopi bɨ k'orea p'anoosima.
Corinto p'uurude waapẽarãpa tachi chok'ae p'irabaridai k'orea piawẽa k'ɨ̃risia p'anana pẽra Pablopa capítulo 15de mãɨ k'orea bɨsima. Capítulo 16de bɨsima sãmaasã́ erreara jerep'edai p'anɨ mãɨnepa ãchi ak'ɨde wãi k'orea.