Hecho
Chi Jesupa peedaɨrãpa oodada
Nãɨ k'art'a Lucapa bɨsima. Colosense 4:14de mãɨnepa P'ilemón 24de jara bɨma mãɨ Luca Pablo ome p'ɨrrɨasit'a. Ichiaba mãɨya jara bɨma Hecho 16:10-17de, 20:5—21:18, mãɨnepa 27:1—28:16. Chi eda waapẽarãmá Jesucristo t'õnanepa 60 ãyo pa badak'ari, Lucapa nãɨ k'art'a bɨsima.
Chi Jesú k'orea pedea pia Teóp'ilo pae bɨk'ari Lucapa nãɨ k'art'a sida Teóp'ilo pae bɨsima Jesupa peedaɨrãpa oodada k'orea k'awamẽrá. Chi k'ɨ̃risia pia bɨt'a 1:8de bɨma. Tachi Chipari Jesupa nãɨya jarasima: «Maamina Tachi Ak'õre Jaore mãra ome beede cherude, mãrapa ichi jua chaarea jitadaipɨ. Mãɨpa mãrapa Jerusalene, ãarea Judea mãɨnepa Samaria tuade mãɨnepa tua t'ɨmɨa bede mɨ k'orea pedeadaipɨ».
Chi naapema capitulode (1:1-26) eda bɨ bɨma Jesupa Tachi Ak'õre Jaore teai jarada, Jesú pajãnea wãna, mãɨnepa Matía, Juda Iscariote pari beeda k'orea.
Mãɨ ɨ̃ari bɨ bɨma chi Jesupa peedaɨrãpa Jerusalene chi pedea pia ichi k'orea jaradada (2:1—8:3). Eda bɨ bɨma Tachi Ak'õre Jaore ãchimá cheda, Pedropa Tachi Ak'õre te minachia bɨ k'ait'a jarateada, Jesuderã sãmaasã́ ará p'anana mãɨnepa judiorãpa Esteban peadada k'orea.
Mãɨ ɨ̃ari bɨ bɨma Jesupa peedaɨrãpa Judea tuade mãɨnepa Samaria tuade chi pedea pia ichi k'orea jaradada (8:4—9:43). Eda bɨ bɨma Tachi Ak'õre Jaore chi Samariadepema ũpẽarãmá cheda, P'elipe chi Etiopiadepemá jarateada mãɨnepa Saulopa Jesucristode ĩjãana k'orea.
K'aadea bɨ bɨma Jesupa peedaɨrãpa chi pedea pia ichi k'orea judiorãwẽa jaradada. Eda bɨ bɨma Tachi Ak'õre Jaore judiorãwẽmá cheda (10:1—11:18), Pedro Herode juadepema awara wãna (11:19—12:25), Pablo naa Jesú pedea jarade wãna (13:1—14:28), ũpẽarã chi minachia k'awa p'anɨrã Jerusalene ará p'anana (15:1-35), Pablo chi bari k'ak'o umãarea Jesú pedea jarade wãna pada (15:36—18:22), chi bari k'ak'o ũpea ãarea wãna pada (18:23—20:38) mãɨnepa Pablo Romane eda jɨ̃a nɨbɨdada (21:1—28:31).