Juan
Jesú k'orea pedea pia Juanpa bɨda
Jesú ome p'ɨrrɨada Juanpa nãɨ k'art'a bɨsima. Ãyo 80de Ép'eso p'uurude baside bɨsima. Maamina k'art'ade jarawẽa bɨma ichia nãɨ bɨda. Waapẽarãmá, nãɨ k'art'ade Juanpa ara ichia bɨda jĩra pedeak'ama, mãɨyawẽapuru chi «Jesupa minachia k'ɨ̃ria bɨade» aparima. (21:20-24).
Juanpa nãɨ k'art'a ũpẽarã pae bɨsima k'awadamẽrá chi ãchia Jesú k'orea ĩjãanana piarãpɨ. Mãɨnepa ãareaɨrã pae bɨsima Jesú piarã Tachi Ak'õre Warrade ĩjãanamẽrá. Mãɨ k'ɨ̃risia minachia bɨt'a Juanpa bɨsima 20:31: «Ãarea nãɨ bɨsima mãrapa Jesú Tachi Ak'õrepa Tachi K'aripaparí teai jarada, Tachi Ak'õre Warrade ĩjãanamẽrá. Mãɨya ĩjãanaipɨra ichidepa chok'ae bai uru p'ananaipɨ».
Nãɨ k'art'ade Juanpa pia k'awapisima Jesú piarã Tachi Ak'õrenepa chesit'a. Mãɨ naa k'awapisima ẽpẽerãpa jara p'anɨnepa (1:1-51). Mãɨ ɨ̃ari k'awapisima Jesupa ẽpẽerãpa ne p'ue oodak'apɨ́ bari k'ak'o siete oo basidepa (2:1—11:44). Mãɨ ɨ̃ari Juanpa bɨsima Jesú piui k'orea (11:45—17:26), chi ichi itu bɨ p'ananapa jitadak'ari k'urusude peadada k'orea (18:1—19:42) mãɨnepa ichide ĩjãa p'ananapa ichi chok'ae p'irabarida ununana k'orea (20:1—21:25).
Nãɨ k'art'ade Jesupa pia jarateasima Tachi Ak'õre Jaore k'orea (3:1-8; 6:63; 7:37-39; 14:15-29; 15:26—16:15, 20:19-23). Mãɨ awara pia pedea bɨma Tachi Ak'õrepa ichi Warra k'ɨ̃ria bɨ k'orea (5:19-21; 10:17-18; 17:1-26) mãɨnepa sãmaasã́ chi ichide ĩjãa berã k'ɨ̃ria bɨ k'orea (3:16-17; 11:33-37; 13:1—17:26).