Luca
Jesú k'orea pedea pia Lucapa bɨda
Nãɨ k'art'a Lucapa bɨsima. Ichi griegodepemaane a k'ɨ̃risia p'anɨma. Colosense 4:14de mãɨnepa P'ilemón 24de jara bɨma Luca Pablo ome p'ɨrrɨa basit'a. Mateopa, Marco pida ãchicha k'art'a Jesucristo k'orea bɨdak'ari Lucapa nãɨ k'art'a bɨsima.
Lucapa nãɨ k'art'a ẽpẽra chi minachia k'awa bɨ Teóp'ilo pae bɨsima ichia k'awamẽrá Jesú k'orea jarateadada piarãpɨ (1:1-4). Waapẽarã k'aepẽra Lucapa minachia bɨsima Juan chi Porochoaparí t'õna k'orea (1:5-80) mãɨnepa Jesú t'õna k'orea (2:1-52). Mãɨ ɨ̃ari bɨ bɨma Juanpa Jesú porochoada k'orea (3:1-22), Jesú naa beada chõarãenapemarã t'ɨ̃ k'orea (3:23-38) mãɨnepa tiorepa Jesua nemietá mĩesa oopiyá bada k'orea (4:1-13). Mãɨ ɨ̃ari bɨ bɨma Jesupa Galilea tuade jaratea nipada k'orea (4:14—9:50) mãɨnepa Jerusalenea wãrune jaratea bada k'orea (9:51—19:27).
Mãɨ k'aadea bɨ bɨma Jesú Jerusalene bada k'orea: Jerusalén p'uuru k'orea jẽana, k'urusude peadada, chok'ae p'irabarida, mãɨnepa ichide ĩjãa berã k'ĩrari pajãnea wãna (19:28—24:53).
Lucapa pia bɨsima Tachi Ak'õrepa ẽpẽerã ɨtɨai k'orea (2:25-35; 19:37-44; 21:20-24) mãɨnepa nemietá oopataɨrã ichimá jĩitea cheutarã k'aripai k'orea (1:67-80; 15:1-32; 19:1-10). Minachia bɨsima nemietá oopataɨrã Jesupa k'ĩra chupuria idida: judiorã mãɨnepa judiorãwẽ, Samariadepemarã, nenea k'ede mãɨnepa Romanepema pae erreara jɨrɨp'epataɨrã.