Marco
Jesú k'orea pedea pia Marcopa bɨda
Nãɨ k'art'a Marcopa bɨsima. Jerusalenepema judio pasima. Chi naepa Jerusalene te uru basima (Hecho 12:12). Bernabé ichi meme warra pasima (Colosense 4:10). Ichia Pablo k'aripapachima. (2 Timoteo 4:11). Pablopa mãɨnepa Bernabepa Jesú k'orea naa jarateade wãsidaɨde Marco ateewãsidama (Hecho 12:25—13:13). Hecho k'art'ade ichi t'ɨ̃ «Juan Marco» mãɨya jara bɨma.
1 Pedro 5:13 Pedropa Marco «mɨ warraade» asima. Mãɨpuru waapẽarãmá chi Pedropa Jesú k'orea nepɨrɨ bada, mãɨ Marcopa k'art'ade bɨsima. Mateo mãɨnepa Lucapa ãchi k'art'a bɨdai naena Marcopa nãɨ k'art'a bɨsima. Roma p'uurude Pedro ome baside ũpẽarã judiorãwẽ pae griego pedeade bɨsima.
Marcopa naa bɨsima Juanpa Jesú porochoada k'orea (1:1-11) mãɨnepa tiorepa Jesua nemietá mĩesa oopiyá bada k'orea (1:12-13). Mãɨ ɨ̃ari bɨ bɨma Jesupa Galilea tuade oo bada k'orea (1:14—9:50) mãɨnepa Galileadepa Jerusalenea wãrune jaratea bada k'orea (10:1-52). Eda bɨ bɨma Jesupa ẽpẽerãpa ne p'ue oodak'apɨ́ oo bada k'orea mãɨnepa Tachi Ak'õrepa ichidirã ichi juade uru bɨ k'orea jaratea bada k'orea. K'aadea bɨ bɨma Jesú Jerusalene ne mãɨya bai bɨ k'orea (11:1—16:20).
Nãɨ k'art'ade pia ak'ɨpi bɨma Jesú judiomina waapẽarã judiorãwẽpa pia ĩjãapachidama ichi Tachi Ak'õrepa Tachi K'aripaparí teai jarada pasit'a (7:24-30; 15:33-39). Jesú nãɨ ĩjũanea cheé pasima chi atepe bai k'orea mãɨpari minachia mĩai k'orea (8:31; 10:42-45). Tachi pae nãɨ k'ɨ̃risia pia bɨma: «Abaɨpa mɨ ome wã k'ɨ̃ria bɨpɨra, ichia oo k'ɨ̃ria bɨt'a itu bɨk'ari minachia mĩai k'orea bai bɨma. Maapae mɨ ome wãi bɨma». (\xt 8:34).