Kejadian 33

Yakobé nfayfio ndé Esau

Lówi lesu, Yakobé néngóto néli, ga némnaw Esau i re ni kyat witén fóté né rénfan lima. Pocé bóngo nfaréné riri fénfané né, se ni pégelé nesté nae ta ruté nturi né. 2 Se rfané né rfatébtubo si néli: Ni pégelé piara séluwé né rtubé re nturi né, ga taga Lea i re ntu né, ga tagare Rahel i re Yusufé. 3 Yakobé ga ntubé nfan néli fténo njé ni. Nwómo i néli pafule ma re nétig nópé ncuba i. Nfan néli facuci, nópé ncuba i. Nfan néli facuci nóté, nópé ncuba, sogado nwóm néli fténo njé ni né, ncuba i sogado nuén fité.

4 Esau némnaw Yakobé, ga ncérero i lima, négbi i, re nfótén i. Pocé si dórén luwé né rfangtangso.

5 Rtangésé rewóré, Esau nfapangné ni béboko njé néya, se némnaw mépin re yomya ta rtéptubo Yakob lima né bóngo nutné i, “Nesté pai si, ta aw re si nte?”

Yakobé ncónglo i, “Tuangé, yomya nesté, antig si. Jou Lahatala nmasié ya se ndo ntig ta nesté si.”

6 Yakobé ni pégelé piara nesté si néli, si re nturi né, rétig nópé se rcuba Esau. 7 Lea i re ntu né, si ma néli, rétig nópé rcuba i, ga taga Yusuf i re Rahelé si néli, si ma rétigé se rcuba i.

8 Pocé Esau nutné Yakobé, “Haiwan ta féléo i ta nimé kyaté rfatebé po ya ni né, ni ngale sói?”

Yakobé ncónglo i, “Kdo nimé, tuangé, bo mmasié ya, bo ma msawané mdé ya nóté na.”

9 Esau ga ncónglo i, “Téno, ya nik haiwané né ma re félé. Se wóré, ma mdo ya nóté na.”

10 Yakobé nkotale be, “O matiné. Bo mmasié ya né, myó nimé ro. Sababta, ta tfakduké ga mpe ya gélesó pa né, ya ta délé kséngé, kbósémé né kfatailo dolo kfakduk re Jou Lahatala. 11 Ya ma, Jou Lahatala re nfaftulo ni masié né po ya ni, se ndo ya né re félé sogado nbung ya. Se wóré, myó nimé ro, haiwan ta kdo nimé né.” Mayta Yakobé nénéceg be ta né, tabóngo Esau ma wlo se nyó.

12 Pocé Esau nécego i, “Tfané ro pa? Tfadéréré tfalówé rir fénfan sogado twóm néli umé lo.”

13-14 Yakobé ncónglo i, “Wóré, ftubé ro, tuangé. Ntigé nesté rémyaku lesu. Ga tagare nik haiwané né nturi né ma rcusé lesu. Se rfané né mamla pa. Bo kané si rfané famla-famla, fa-ngané esó le, re kwómé ma, kdodato haiwané né nase nfatmóto i. Se mewé ftubé ro, wóré ga amé kfan faléwlów-léwlówé, kfadéréré re yomya re haiwané né nturi nesté. Néli, Seiré ga taga tfakduk pocé.”

15 Esau néceg ta, “Pana fajé, kané niké kyat faséfis néli rdéréré mewé, bo rgali mew néli yéféné lo.”

Yakobé ncónglo i, “Wóré, gélesó pa, mati ffakangelangé mew na. Asal ta re kuné ta awé re masié ya se msawané mdé ya pana.”

16 Pocé Esau nfalówé ni fénfané né, néléy néli Seiré. 17 Yakobé ga ndéréré si pafule, npólén i po Sukoté, bóngo nfawoslé ni um pocé. I ma nfawoslé sapi né riri umé mya-mya. Necé ta mulo géwgów ta né rfangósno Sukot, ta ni ngale né umé mya.

18-20 Yakobé nfalówé ni fanfané né sogado nwóm po pnuw Sikhem, po bótén Kanaané. Nfan sogado nwómé né, npe gélesó pa po yéféné lo. Pocé n-gon bétbét po Hamoré ntu Sikhem, i re fténo nesté ni. Npólso si pipis salaka witéncó. Bóngo nfawoslé ni tenda-tenda né pocé. Pocé ma nfajólo lóyé nfarén néya, nfakéwelo géwgów ta bo ntapéné ni sadaka po Jou ni. Nfangósno géwgów ta né El-Elohe-Israel, ta ni ngale né, Jou Lahatala, Jou ta ya Israelé kfapélóy ngósno njé. Se ta kéfétén Yakobé ni fénfan lima Mesopotamia né nwóm pocé su.