2
Jou Lahatala ntulada langét re bétbété re i wlólo sogado nfawóré ndimé. 2-3 Né ngané wonémé. Se ni ta ngané fité né nfatóyné I. Necé ta mulo, ngénngan ta njéi npeé keé i ngénngan isó ta pélóyé, bo kyaté rfatóyné si. 4 Ta kéfétén Jou Lahatala ntulada langét re bétbété né nwóm lóo né.Adam i re Hawa
Ta Jou Lahatala ntulada langét re bétbété né, 5 reni téntóném pafule, fajé nóté géyé ma ntub pafule po bóténé nje ni, sababta Jou Lahatala ntebo félfélé pafule, re kyat ta bo rpe bété né ma reni pafule. 6 Mayta wóé né re ncilét pópé se néya.
7 Ta Jou Lahatala ntulada kyaté né, n-gó bétbété, ga ntulada kyat isó bóngo nufo gégwéso ni mdoké né, tabóngo nélwówé se ndadi kyat i.
Jou Lahatala nfakéwelo bét Eden
8 Rewóré ta né, Jou Lahatala npe bét isó po faspal ngénngan cóo ta ngósno Eden, bóngo nfatoléné kyat ta ntulada i njé pocé. 9 Pocé Jou Lahatala nfatub ay-ay félé, ta réngóto né fié, i pyono né ma mnó. Mayta po bété njé ni fapéluno né ga Jou Lahatala nfatub ay-ay luwé. Aysó njé, iga tó ni pyono, nase tmót pa sogado fajé néli le. Aysó njé ga, bo tó i pyono né, nase tuné sói ta fié re sói ta lé.
10 Pocé fajé reni wóé isó ncelé i néli po bét Edené, se nfamélom bété njé. Po bét Eden wómo lo né bóngo nésagél i abén fóté. 11 Sagél ta isó njé ngósno Pisoné. Wóé ta njé ncelé né, néjelé keé bótén Hawila. Bótén ta njé reni guraci. 12 Guraci pocé né guraci wóngto bóto i. Pocé ma reni salo diréncó ta pépu mnó, ta i mulo ma pélóyé. Lóy ta tpeé yaliyali pari nganti-nganti mtó ma reni. 13 Wóé sagél ta isó njé ngósno Gihoné. Wóé ta njé ncelé néjelé keé bótén Kusé. 14 Wóé sagél ta isó njé ngósno Tigrisé. Sagél ta njé ncelé po bótén Asyuré faspal ngancóo. Sagél ta isó njé ga ngósno Efraté.
15 Jou Lahatala nfatoléné kyaté njé po bét Edené né, bo npe bété njé re nfaménawé i. 16 Pocé Jou Lahatala nécego kyaté njé, “Farimé ayé pyono ta po bété nje ni wlólo né, mó le. 17 Maduga ay ta bo tó i bóngo tuné ta fié re ta lé njé ga, i pyono né ndél pa ta bo mó. Iga mkotale mó, nase ngénngan ta néi ro, bóngo mmóté.”
18 Pocé Jou Lahatala némnawé kyaté njé nkumél i bóngo nénuta, “Sen i, kyaté njé nkumél i né, necé lé! Se Ya bo ktulada ni dél faisó ta dolo i, bo nén-gali i.”
19 Bóngo Jou Lahatala n-gó bétbété né se ntulada haiwan po bóténé lo re haiwan ta po ngawa-ngawa né nae ta usé. Ntulada si rewóré, Jou Lahatala nut si néli kyaté njé ni, bo nané i néyówé ngósnori. Se haiwan sói le ta nfangósno si né, ngósnori né ndadi i ndimé. 20 Ta dolo necé i, kyaté njé nfangósno farimé haiwan ta po bótén re po ngawa-ngawa né. Mayta haiwan ta féléo i né, reni isó ma tisé ta nfamgo re kyaté njé wlo bo ndadi ni dél ta bo nén-gali i né.
21 Pocé bóngo Jou Lahatala npe sogado kyaté njé nyénéfée némtolé. Se ta re némtolé né, bóngo néyó ni ise pusó. Rewóré, nfasemule ni wóngété né nmulé. 22 Isé ta nyó i njé, Jou Lahatala ntulada mépin isó. Pocé bóngo nut i néli po kyaté njé ni. 23 Kyaté njé némnaw i bóngo néceg faje, “Neje ié ta! Kyat ta nfamégo re ya: mom ta né lima ya nik momé; wóngét ta né ma lima ya nik wóngété. Ya kfangósno keé i, ‘Mépiné’, ta ni ngale né ‘lima móné’, sababta Jou Lahatala ntulada i né, néyó po móné ni isé se lima.” 24 Necé ta mulo ga kyat móné né nase rfatoléné keé riri papa re mama né, se si re riri dél pégelé né rdadi esó.
25 Món re mépiné nesté wóngét bóto si, mayta runé méymóy pafule se rmóé si pa.