1 Yohanes
Surat Yohanes
ta faiwóbno né
Kitabé njé ni fénfané
Kyat ta nlefo kitab ta njé: Yohanes ta nlefo Kitab 1 Yohanesé njé, surat isó ta Yohanesé nlefo né. Masike Yohanesé nlefo ni ngósno né po kitab ta njéi ni pa, mayta po Yohanesé ni kitabé wlólo né, reni félé ta rfamgo re ta néi: méitén-méitén (manano, dérorémé, méitén, mésié re ta iglé nóté), méitén Yunani ta i pua i ta métegélé né, re faftóté-faftóté ta po Yohanes ni Buké wlólo né (Yohanes 1:1 re Yohanes 1:1), necé ta mulo Yohanesé ta nlefo kitab ta njéi. Yohanesé njé isó po Yesusé ni motemote nesté ni (Yesusé ni méitén-métóté, Yohanes 13:23;
Kitab ta njé i nlefo po pai ni: Yohanesé ni Buké 1 njé, surat ta faiwóbno i ta Yohanesé nlefo po kyaté-kyat ta rdélé Jou né. Nuéncó pafule kitabé njé i po pai ni, re si rtolén po sói lo, mayta i ni ngale né po jemaat-jemaat ta si po bótén Asia Myaku ta Yohanesé re nleleyan si né. Asia Myaku ta nte i po bótén Turkey.
Kitab ta njé ni dodoto né: Po bótén Asia Myaku né reni kyaté-kyat ta rfasodoto méitén ta métegél pa né po riri jemaaté-jemaaté né. Si récegé cogo Yesus Kristusé njé nuéncó pafule bo ndadi kyat i, bóngo nuéncó pafule bo nwóm po dunia njé ni, maduga nwómé né maduga dolo Jou ni Rohé njé le. Si rfasodoto cogo bo tpe sói néli ta lé né, gélesó pa, sababta maduga badané njé le ta ndadi kyat lé né, bukan ta kyaté ni rohé njé pa, sababta ta pentingé njé Jou ni rohé njé. Dodoto ta néi ta npe sogado kyat ta rdélé Yesusé né rdéngó ndimé. (1Yohanes 2:18-19
Dodoto ta métegélé né Yohanesé nlefo po kyat ta rdélé Jou Yesusé ni, bo runé ta Jou ni dodoto né fatuwé re dodoto ta métegél pa né. Ta Yohanesé nlefo po ni suraté wlólo né, ni ngale, dodoto ta métegélé né re dodoto ta métegél pa né. Dodoto ta njé ni glio né faje: Yesus Kristusé njé Jou Lahatala ni Ntu I, I re nwóm yama soroga, se bo tféyal I, ité nase tdéréré I ta dolo I né (1 Yohanes 3:1-3). Iga sogado tpe fajé, ité re it po manano wlólo. Mayta kyat ta rdélé Jou pa né ga, si re si po dérorémé wlólo.
Yohanesé nfasodoto nóté, bo kyat ta rdélé Jou né, ma rmésié sói néli ta lé ta po dunia wlólo nte na. (I Yohanes 2:15-17) Mayta kyat ta rdélé Jou né, mare rmésié isó re isó, sababta necé ta Yesus Kristusé wlo ncuka né. (I Yohanes 3:11, 23, 4:7, 11-12) Bo kyat ta rdélé Jou né, nase si re Jou Lahatala sogado fajé néli le, se masike rfasodoto ta sólé ma, rlongé si na. (I Yohanes 5:13) Bo kyat ta rdélé Jou Yesusé né, si re Jou nase sogado fajé néli le.