Um sambayang ta npélóyé njé nase bo régéné keé I
13
Waktu ta Yesusé ncópén tóma agama Yahudi né riri Um Sambayang ta npélóyé njé ni né, bóngo ni motemote isó nécegé I faje, “Guru, coba mémnawé bangunan-bangunan ta po Um Sambayang ta Npélóyé nje ni, ga i ni fié né! I ni lóy ta pélóy-pélóy ta térfaréné né!”2 Bóngo Yesusé nécegé i faje, “Néce fatuwé, bangunan-bangunané né tadélé fié. Mayta nase reni waktu nóté, ta pote se néli, kyaté né nase bo rfagégné keé. Lóyé né ma nase fapusó le ma tisé ta bo térfarén po góo lo nóté.”
Iga re bo kiamaté, nase reni faféyalé né félé
3 Tabóngo, Yesusé nfan néli se nagatéf I po Métét Zaituné bóngo néntolén I po géwgów isó ta nagbonó Um Sambayang ta npélóyé njé ni. Pocé Petrusé, Yakobusé, Yohanesé re Andreasé, si re I rkumélé, bóngo rutné I, 4 “Guru, mfabingo am pa, ta méceg péséwé né. Nase ngané fisé ta bo régéné keé Um Sambayang ta npélóyé njé né? Iga bo régéné keé i, nase i ni fafayalé né sói ta bo ndadi ntubé né, mfabingo amé bo kuné ta nase bo ndadi i né.”
5 Yesusé nécegé si, “Fpe mew fafié, ma sogado kyaté né rfalélólé mew na. 6 Sababta faje: nase reni kyat félé ta rwómé, rut Ya ngósnogé, bóngo récegé faje, ‘Ya nte I ro, Kolano ta Jou Lahatala najaji bo nfasalamaté kyaté né!’ Momongo, rlól bóto, rfalélólé be kyaté bo rdéréré si. 7 Iga mewé flongé kyaté bo rfaparang pari kyat nésé masolo réféténé né le ta kyaté bo rfaparangé, ma fémtat na. Ta féléo i né mare ndadi i su, mayta ngénngan ta dunia njé bo kiamaté né ni waktu nwómo i pafule. 8 Sababta nase reni kyaté-kyat ta si po bótén esó rfaparang re kyat ta si po bótén nésé, bóngo kolano isó i re ni kyaté-kyaté nase rfaparang re kolano isó nóté i re ni kyaté-kyaté né. Re nase néli lima né reni suyé ndimé, bóngo géwgów félé ta reni mnóm pana se kyaté-kyat né nfatélóto i. Mayta farimé ta néi, tagare ni faywóbno. Kangélang ta nase bo ndadi i po ngénngan kiamaté né, necé tfatailo dolo mépin ta tagare nfasbósmé i bo nmawyóyé se, tadélé nkangelangé né.
9 Se mewé mare fpe mew fafié! Sababta mewé fdélé Ya, se kyaté-kyaté né nase rfagagóé mewé, ga ruté mew néli po agama Yahudi né riri kyat tuté nesté ni, bo radili keé mewé. Mewé ma nase rfapuné mew po agama Yahudi né riri um-um sambayangé lo, bóngo ruté keé mew néli bo ffatégbono gubernur re kolano né nóté. Mayta fajé óro, sababta pocé mewé re bisa féfétno si Ya óro ta kfasalamaté kyaté né. 10 Sababta, farimé suku bangsa né mare rlongé Habar ta Nfié njé su, pocé ga tagare ni waktu ta bo kiamaté né nwómo i ro. 11 Se iga reni kyat ta rfagagóé mewé, ga ruté mewé néli bo rutné mewé, ma fémtat na sói ta mewé bo fécegé né, sababta Jou Lahatala ni Rohé njé ta nase nfaftulo mewé, sói ta nase mewé bo fécegé né, néce mew pa ta fméiténé, mayta Jou Lahatala ni Roh ta ntolno wlomi wlólo njé, I ta nméiténé.
12 Mayta nase reni waktu nóté, ta kyaté né bo rpo keé fténori né néli po kyat ta riri lé si né, bo rpuné keé si. Kyat tut móné né ma nase rpo nturi né bo, rpuné keé si. Tabóngo yomya né ma nase rlongé riri déluté né pana, se rpo keé si néli po kyat ta riri le si né, bo rpuné keé si nóté. 13 Se farimé kyaté nase riri lé mewé sababta mewé re fdéréré Ya. Bóngo kyaté-kyat ta rdélé Ya ga masike rduk sói le ma rtébné pa le, si ta néi bo rduké riri salamaté.”
Kyat léo ta ni lé Jou Lahatala njé [Bo re bo kiamaté, nase reni ngénngané-ngénngan ta kangelang]
14 Yesusé nécegé nóté, “Pote se néli, nase reni kyat léo isó bo nwómé. I ta njéi tadélé ni lé Jou Lahatala. Kyat ta njé i nase nosél po min um sambayang ta npélóyé njé ni, po géwgów ta i góo lo pa né. (Pai ta nwaca ta néi, ntarukira fafié bo ncae ni ngale né). Iga fémnawé kyat léo ta njé i re i pocé, ta mewi pocé né mare fówés néya po métété lo. 15 Mew ta po um papolo né, ma ftebé bo fyó fagélesó po nimi umé wlólo le na, mayta bo fówésé mewé ro. 16 Fajé nóté re ta mew po nómi bété lo né, ma faléyé bo fyó nimi kabaya le na, mayta bo fówésé mewé ro. 17 Mayta mépin ta rpe lapori re ta rfasus yomya né, si ta né i nase tadélé rkangelangé!
18 Féror po Jou Lahatala ni, bo ngénngan kangelangé ta néi, ma mgo po waktu félé wlólo na. 19 Sababta po ngénngan ta néi, kyaté né nase tadélé rkangelangé. Ta faywóbno fafié Jou Lahatala ntulada dunia nje sogado ngénngan pésénte né, reni ngénngan ta kangelang ta dolo necé pafule. Fajé nóté, ngénngan kangelangé né rewóré, nase reni pana, ngénngan kangelang ta dolo fajé né. 20 Iga ngénngan ta kangelangé né mnuwé, nase kyat farimé rmóté, réfen pa se. Mayta Jou Lahatala nmésié ni kyat ta re npili si né, se nfakétobé keé ngénngan kangelang ta néi, bo ma rmót na.
21 Waktu ta né i, iga reni kyat ta récegé mewé faje, ‘Coba ffémnawé! Mesiasé njé I pote!’ Pari réceg faje, ‘Coba ffémnawé! Mesiasé njé I ntéli!’ Ma fdélé si na, sói ta récegé né. 22 Sababta nase reni kyat félé ta rwómé se récegé cogo si né Mesiasé, bo tisé récegé cogo si nabi ta bo rfawómo Jou Lahatala ni faftóté nesté. Si nase rfaftulo riri kawasa ta pélóyé re rpe mujizaté, bo kyaté né rdélé si, momongo rlólé ndimé. Si rpe faje né, bo rfalélólé kyaté-kyat ta Jou re npili si né, sogado réfen si, bo ma rdélé Jou pana. 23 Se mare fpe mew fafié, sababta masike farimé ta néi ndadi i pafule, mayta Ya re kfébingo mewé ntubé.”
Fafayal ta Jou Yesus bo nwómé nmulé
24 Yesusé nécegé nóté, “Waktu ngénngan-ngénngan ta kangelangé né re bo télapésé, ngénngané njé nase ndérorémé, sni njé ma nase ntul pa. 25 Ngó né ma nase famnapo i yama langété lo, se farimé ta po langété lo né ma nase kéyowéné ndimé.
26 Po waktu ta néi, kyaté né nase rémnaw Kyaté Ntu ta nwóm yama soroga njé ndé mété, nfauto ni ménano re kawasa ta pélóyé né. 27 Bóngo Kyaté Ntu ta nwóm yama soroga njé nase nané ni nénan ta si yama soroga lo né, rfajólo farimé kyat ta Jou Lahatala re npili si né, po géwgów pua le ta po dunia nje ni wlólo nte, po ta wómé sogado ntit ta wómé.”
28 Yesusé néceg adeade isó njé tadolo faje, “Coba mewé ftarukira ay ara njé. Iga ni séngsóng ta galólé né ga re nétubél i, néce ité re tuné mnuw pana bo népyoné ro. 29 Fajé nóté, iga mewé re fémnaw ngénngan-ngénngan kangelang ta re kécego mewé né, néce mewé re funé mnuw pana Jou bo nwómé nmulé ro. 30 Se fatélolmo mew fafié ta Ya kécego mewé nte, kyat ta isémé nte iglé né nase rmót pafule, mare férimé ta Ya kécegé né re ndadi i ndimé. 31 Langét re bétbété né nase myangésé, mayta Ya nik méiténé né nase myangés pa sogado fajé néli le.”
Kyat ta rdélé Jou né mare rfasadia si bo réftón ta Jou bo nwómé nmulé né
32 Tabóngo Yesusé nécegé nóté po ni motemote nesté ni, “Reni isó pa ta nase nuné ngané fis ta Kyaté Ntu ta yama soroga lo bo nwómé nmulé né. I ni nénan ta yama soroga lo né ma runé pa. Jou Lahatala ni Ntu njé ma kuné pa. Maduga nik Moke Jou Lahatala ta I po soroga njé le ta nuné. 33 Se ffatélolmo mew re fpe mew fafié, sababta mew funé pa ngané fisé ga nase bo ndadi i né. 34 Waktu kyaté Ntu ta yama soroga bo nwómé nmulé njé, Ya kfatailo dolo légaé isó ta nfan géléncó. Se ni umé njé nfatolno ni kyat ta bo réjaga i, bóngo ntén si yabé. Pocé nané kyat faisó nóté nejaga po ngówéné njé ni, bo ma nfatolén i na.
35 Faje nóté re mewé: mewé ma mare fpe mew fafié, sababta funé pa ngané fisé ta ni umé njé nwómé nmulé né. Ta i bo nwómé né, mérim pari, dórén fapéluno pari, rakno mélowé né pari, tómémóné pari. 36 Se fpe mew fafié: ma sogado télél be nwómé ga nduk mewé né dolo kyat ta ryénéfé rémtolé. 37 Nte sói ta Ya kfaftóto mewé né, mewé le pa mayta Ya kfaftóto po farimé kyaté: fpe mew fafié!”