13
Ki Kepetail
1 Naa, sa' upama metawu gupia mektalu' ngag lain pikebitan getaw, sampay su pikebitan nu nga sesugu'en nu Megbebaya' getaw langit, laak ndi' dau mekpetail di samatawu, ma'niin laak nu sasak nu gagungi telu'en ku pu' lumimbeeb, atawaka dumela peksegensal gupia, pu' milasay dau gupia mektalu'. 2 Pia bigayanu sia tinawan megwali talu' nu Megbebaya', pia nda' siai kulangu di sinuunan, muka' mesabutu sia gela' sug daansama' pigbuni nu Megbebaya', pia duun laak siai kesaligu maigin ku su ngag bentud, laak sa' nda'i petailan ku di samatawu, nda' dademai pantagu. 3 Pia pemegayu sia sug launan pimetangu, adun pegebangan ku su ngag duma getaw, pia begayu tananig lawasu metutung, laak sa' ndi' dau dema mekpetail di samatawu, nda' gusayi sugda dun dinaan.
4 Naa su getaw mekpetail, metau mektigel. Pengmia'mia'enen ebangay su ngag duma. Kana' mengimbegu, kana' mangya', kana' mekpelabawlabaw. 5 Kana' mesungal, kana' nu gegulingenen laaki tagikulenen, kana' sempaun, ndi'en da pagid pengebeteni mekesala' diniin. 6 Ki getaw mekpetail, ndi' dadema leliagen dun su melaat, segaga leliagen dun su metuud. 7 Ki getaw mekpetail, ndi' pa pagid lumukas menggulaula melengas. Sumalig gusay di samatawen, pedetengenen lelayun pu' mekegdaag su Megbebaya', muka' mekektigel dig launan.
8 Mendadi kig betad mekpetail, nda'i tamanen. Laak su tinawan megwali talu' nu Megbebaya', duun dai gikteben. Mesikpa' dadema su tinawan metau mektalu' di nga pikebitan ndi' mesabut. Muka' mpapas su tinawan megwali di sinuunan mekatag di metuud. 9 Pu' kulang pa nemuni tinawan ta megwali di sinuunan mekatag di metuud muka' su tinawan megwali talu' nu Megbebaya'. 10 Laak dagid, sa' mateng na su nda'i kulangen, mengikteb na su nga kulang.
11 Pinenggi' su kaika'ayu, lepeng tug danu gembata' su tinalu'u, su ginau, muka' sug delendeman ku. Laak dagid, sa' migineken nau, bilengu su kegimbata'u. 12 Naa ma'antu, su kesabut ta dig betad nu Megbebaya' nandaw, maa' nug lingaw maita' ta di melameng pagalungan. Laak duuni gendaw mateng gempantek na dinita su metuud, pu' maita' ta su Megbebaya'. Nandaw, kulang pai sinuunan ta. Ditug binaya' gebii bu' gendaw, mengganget nai sinuunan ta, meglepeng tu sinuunan nu Megbebaya' mekatag dinita.
13 Ma'antu, duun pai telu kepianan ndi' mpupus, su kesalig ta ditu Megbebaya', su pedetengen ta di ketua'en puli' dini, muka' su kepetail ta di nga samataw ta. Laak dagid iini tampusan metaas di telu kini, ki kepetail ta di nga samataw ta.