12
Su nga Tinawan Begay nug Balakat nu Megbebaya'
1 Naa, duun dademai sinaak niu di sulat niu mekatag di nga tinawan begay nug Balakat nu Megbebaya'.
Mauya'an ku, Mingumpated, mesuunan niu gupia su metuud. 2 Naa, misuunan na niu su nda' pamu sakup tu Megbebaya', mitalin amu di melaun bianan, adun pektemuyen niu su ngag ledawan kana' pektetubu'. 3 Kagina ma'antu, nandaw pesuun ku diniu, sa' duuni getaw pingepu'an nug Balakat nu Megbebaya', ndi' mesu'at mektuyud dini Isus. Ma'antu dadema nda'i getaw mekektalu', “Si Isusi Kaunutan,” subay pengepu'an dadema nug Balakat nu Megbebaya'.
4 Naa, ki nga tinawan begay nug Balakat nu Megbebaya' tu nga sakupen, megleginis. Laak iin dai megbegay dun, sug Balakat nu Megbebaya'. 5 Migininisan dadema sug bianan nu tagikul ditu samasakup ta, asa salabuuk su Kaunutan tagikulen. 6 Migininisan su tinawan nu nga sakup nu Megbebaya', adun megabang ilan di nga samasakup, laak iini megbegay tinawan dig launan, su Megbebaya', adun diadia, metau megabang. 7 Launan ta mekpetuud dini Isus, saladua' bigayan ita tinawan, tu'us pu' pingepu'an ita nug Balakat nu Megbebaya'. Iini begayan ita niin dun, pu' adun mebangan ta sug launan samasakup ta. 8 Ma'antu, duuni getaw begayan nug Balakat nu Megbebaya' tinawan pegweliinen su metuud titulu'an nu Megbebaya'. Duun pa pagidi sala begayan nug Balakat kia tinawan kekpesuunen tu medalem sinuunan. 9 Duun pai sala begayan nug Balakat nu Megbebaya' tinawan sumalig gupia ditu Megbebaya'. Duun pai sala begayan nug Balakat tinawan meneguli' pegladu. 10 Duun dademai begayan tinawan mekenggulaula tu mekesalebu', salai begayan tinawan megwali talu' nu Megbebaya', salai begayan tinawan mengilala tinawan, sa' pigenatanen sug Balakat nu Megbebaya', sa' kana'. Salai begayan tinawan metau mektalu' di pikebitan nda'en mesabut, salai begayan tinawan megulug tu talu' nu mekektalu' dig lain pikebitan. 11 Launanen, sug Balakat nu Megbebaya'i pigenatan nu tinawanen kia, pu' begayen tu getaw diadia, ki tinawan lepeng tu mauya'an nug Balakat nu Megbebaya'.
Salabuuk Lawas, Melauni Sengkapan
12 Naa, petanggi' ta deli' si Kristu di ma'niin salabuuk lawas, melauni sengkapanen. Pia migininisan su sengkapanen, salabuuk daig lawasen. 13 Launan ta, pia getaw Judea, sa' su nga kana' getaw Judea, pia sesugu'en nug duma, sa' su kana' sesugu'en, su kekpebunag ta tubig, pisalabuuk ita nug Balakat nu Megbebaya' diniin, adun mbaal ita ma'niin salabuuk lawas. Bigay dadema dinita ki salabuuk Balakaten.
14 Naa, sug lawas nu getaw, melauni sengkapanen, kana' laak salabuuki sengkapan nug lawas. 15 Pinenggi' metau mektalu'i nga sengkapanen. Mendadi mektalu' su geksud, “Kagina kana'u kemet, kana' dau dema sengkapan nug lawas.” Bisan kiai telu'enen, sengkapan da gusay nug lawas. 16 Muka' sa' upama mektalu' su telinga, “Kagina kana'u mata, kana' dau dema sengkapan nug lawas.” Bisan kiai telu'enen, sengkapan da gusay nug lawas. 17 Sa' upama matai tibuuk lawas, mekedengeg ba? Sa' upama telingai tibuuk lawas, mekesapu ba? 18 Laak iini tantu kebetangen, su kebaal dun nu Megbebaya', pigbetangen su kelaun sengkapan nug lawas getaw, pu' kiin demai mauya'anen. 19 Pu' sa' upama salabuuk dai sengkapan nug lawas, kana' metalu' lawas. 20 Laak su kebetangen, melauni sengkapanen, laak salabuuk daig lawas.
21 Muka' padun, sa' pinenggi' mekektalu' su mata, ndi' mesu'at telu'enen tu kemet, “Nda'ig labetu dini'a.” Ndi' dadema mesu'at mektalu' su gulu tu geksud, “Nda'ig labetu diniu.” 22 Laak dagid pia su nga sengkapanen batik ta dun maika'i sekegen, nda' metibuukig lawas sa' kulang dia. 23 Muka' su nga sengkapanen batik ta dun nda'ig laga'en, petubudan ta gupia ingatay. Su nga sengkapanen batik ta dun ndi' mpia bentayan, peksiba'an ta selukay. 24 Su nga sengkapanen melengas bentayan pasi', nda'ig baalan ta sumeluk dun, ndi' ba? Betad nu Megbebaya', pigbetangen sug lawas getaw, adun su sengkapanen gembaba', iin su pegbesaan pa di ngag dumanen, 25 adun meksalabuukig lawas, pu' mektinagikulay su nga sengkapanen. 26 Kaas, sa' upama melegenani salabuuk sengkapanen, mpeduma su ngag launanen. Sa' pinenggi' pegbesaani salabuuk, leliagen dun su ngag launanen.
27 Naa ma'antu yamu, lawas amu tu'u ni Kristu, kada sala tawan diniui sengkapanen. 28 Iini tindu' nu Megbebaya' dia pikumpungan nu nga sakupen. Beknanen, tindu'en su nga peneliganen, kedua'en su nga megwali talu' nu Megbebaya', ketelunen su nga mektitulu'. Dayun su nga mekenggulaula tu mekesalebu', muka' su nga meneguli' pegladu, su nga metau megabang, su nga metau meguit tu nga samasakupen, sampay su nga metau mektalu' di pikebitan ndi'en mesabut. 29 Peneligan ba ni Isus kig launan kini? Megwali ba kig launan kini? Mektitulu' ba kig launan kini? Mekenggulaula ba mekesalebu' kig launan kini? 30 Metau ba meneguli' pegladuig launan kini? Mekektalu' baig launanen kini di pikebitan ndi'en mesabut? Metau ba megulug dunig launanen kini? 31 Kaas subay penggengeten niu dig delendeman niu su mauya'an niu di nga metaas pa tinawan begay nug Balakat nu Megbebaya'. Muka' pesuun ku na diniu ki tampusan gempantag bianan.