14
Mekatag pa di nga Tinawan Bigay nug Balakat nu Megbebaya'
1 Mendadi iini penemalan niu penggulaulaay, su kekpetail niu tu nga samataw niu. Pegenguten niu ki begayan amu nug Balakat nu Megbebaya' tinawan, labi na begayan amu niin tinawan megwali tu talu'en pesuunen diniu. 2 Su getaw metau mektalu' di pikebitan ndi'en mesabut, kana' nu samataweni telu'anen dun, pu' telu'anen laak su Megbebaya'. Pu' nda'ig dumanen mekesabut tu talu'en, pektelu'enen laak su giglud metuud pebian di ginuung nug Balakat nu Megbebaya'. 3 Laak dagid su megwali tu talu' nu Megbebaya', telu'anen pasi' su nga samatawen, pu' adun megisegi kesalig nilan tu Megbebaya', mengulikseg ilan, muka' begayan ilan pianan ginaa. 4 Su mekektalu' di pikebitan ndi'en mesabut, pegebanganen laak sug lawasen, laak su megwali tu talu' nu Megbebaya', iini pegebanganen su tibuuk pikumpungan nu nga samasakupen.
5 Naa mauya'an ku sia metau amu gela' mektalu' di pikebitan ndi' niu mesabut. Laak labi pa mauya'an ku, begayan amu gela' tinawan megwali tu talu' nu Megbebaya', sabaya' mektalu' amu di pikebitan ndi' niu mesabut. Pu' metaas pai tendanan nu metau megwali tu talu' nu Megbebaya' sabaya' di metau mektalu' pikebitan ndi'en mesabut, subay duuni metau megulug dun dia, adun mekabang tu tibuuk pikumpungan nu nga suminakup. 6 Naa mendadi Mingumpated, sa' medituunu niu, ta' mai pantagu sa' mektalu'u laak diniu di pikebitan ndi' ta mesabut? Nda'idun lai, subay duuni buasan ku diniu sekat tu Megbebaya', atawaka duuni pegweliin ku diniu sinuunan mekatag di metuud, atawaka duuni pegwaliu diniu talu' nu Megbebaya', atawaka duuni titulu'an ku diniu.
7 Pinenggi' ki gayepan maa' nug lantuyan muka' kutapi' sa' ndi' mekpalas su tingegen, ndi' mesabut nu getaw. 8 Miksama dai sundalu megbugyung, sa' ndi' mekpalas su tingeg nug bugyungen, nda'iduni sama sundalunen mengandam lumumpak. 9 Naa ma'antu dadema, nda'iduni mekesabut tu pegyegaan mu sa' mektalu'a pebian di pikebitan ndi' mesabut. Su telu'en mu, maa' genus di gawanawan laak. 10 Pu' melaun daani ginis pikebitan dinig lumbang, muka' nda'iduni ndi' mesabut, pia seginis. 11 Laak dagid, sa' ndi'u mesabut su pikebitan nu mektalu', pemilangen ku su mektalu' dun lain bansa, muka' pemilangenu niin lain bansa dadema. 12 Kaas, kagina mauya'an niu gusay begayan amu tinawan nug Balakat nu Megbebaya', penemalay niu gemitay su tinawan mekaiseg tu kesalig nu nga mikpetuud dia pikumpungan niu.
13 Mendadi, su metau mektalu' di pikebitan ndi'en mesabut, subay penenebiinen begayan dadema tinawanen megulug di telu'enen. 14 Sa' upama menenabiu di pikebitan ndi'u mesabut, menenabi daani ginau, laak nda'ig labetenig delendeman ku. 15 Kaas ta' alandun dayuni gempiau baalen? Naa ma'nini', menenabiu di pikebitan ndi'u mesabut sekat tu ginau, dagid menenabi dau dema di pikebitan mesabut nu ngag duma. Ma'antu dademaig bebat. Megbebatu di pikebitan ndi'u mesabut sekat tu ginau, dagid megbebat dau dema di pikebitan mesabut nu ngag dumau. 16 Pu' sa' upama mekpaladpalad amu di ginaa niu laak, sa'itada di pikebitan ndi' niu mesabut, naa kenduta'i kesabut dun nug begu meksimba diniu? Ndi'en mesangu', nda'ig biananen mesabuten su telu'en niu. 17 Pia melengas gupiai kenenabi niu di kekpaladpalad tu Megbebaya', nda' tanani gabang niu tug duma niu, saba' ndi'en mesabut.
18 Naa danaan, mekpaladpaladu tu Megbebaya' pu' melaun pai metalu'u di pikebitan ndi'u mesabut batul daniu. 19 Pia ma'antu, sa' mektamuy ita tu Megbebaya' di pikumpungan ta, tumu' metalu'u laak lima ektaang talu' mesabut nu nga samatawu, adun metitulu' dinilan, sabaya' nu sanu ngibu ektaang talu' di pikebitan ndi' nilan mesabut.
20 Naa yamu Mingumpated, ndi' amu megimbata' dig delendeman niu. Megimbata' damu mekatag dig dupangan, laak pengminagulang namu dig delendeman niu mekatag di nga tinawan begay nug Balakat nu Megbebaya'. 21 Pu' nda' ba mesulat di Misulat Palinta nu Megbebaya',
“Miktalu' su Kaunutan, ‘Telu'an ku ki piglegetawan ku kini.
Telu'an ku ilan pebian di getaw mektalu' lain pikebitan
muka' pebian dig baba' nu ngag lain getaw,
Laak dagid pia ma'antu, ndi'u gusay pektalentenan nu nga getawu kini.’”
22 Naa kumalenged ma'antu, ki tinawan mektalu' di pikebitan ndi' mesabut, iini begay dun adun pengmetuudan su nga nda' pa pekpetuud ditu Megbebaya', sabaya' nu suminakup na daan. Laak dagid su pasi' tinawan megwali tu talu' nu Megbebaya', iini begay dun pu' adun megiseg su kesalig nu nga mekpetuud na, sabaya' nu nda' pa pekpetuud.
23 Mendadi sa' mekpungun namu, launan niu, adun mektamuy amu, dayun sug launan niui mekektalu' di pikebitan ndi' niu mesabut, sa' upama duuni kana' mekpetuud suled tug lumpukan niu, ndi' bamu niin pemilangen bu'angbu'angen gela'? 24 Laak dagid, sa' diadia megwali tu talu' nu Megbebaya', sa' upama duuni sumaup kana' mekpetuud, naa pengmetuudan dun dayun pu' subay megbiksu' tu sala'en, sekat tug launan midengegen. Pu' saba' nug launan midengegen di talu' nu Megbebaya', pemilangenen dayun melaat su pigbetaden, 25 kaas buasanen su giglud delendemanen, muka' menginlulud ditu Megbebaya', mengamuyu' diniin. Pu' metalu'en, “Diin daan masi' pikumpungan niu su Megbebaya'.”
Su Gempia Bianan di nga Pikumpungan
26 Naa Mingumpated, ta' alandun dayunig deksu'anen? Ma'nini', sa' mekpungun amu adun mektamuy amu tu Megbebaya', sala tawan getawi megbebat, salai mektitulu', salai megwali tu talu' nu Megbebaya', salai mektalu' di pikebitan ndi'en mesabut, muka' salai megulug dun. Laak subay kig launanen, duuni gabangen tu pikumpungan nu nga suminakup. 27 Kaas sa' upama duuni mektalu' pikebitan ndi'en mesabut, subay dua' tawan da, atawaka telui gikteben, piksesala tawan diniu mektalu', muka' subay duuni megulug dun. 28 Laak sa' pinenggi' nda'iduni megulug dun, ndi' mpia mektalu' pikebitan ndi' mesabut dia pikumpungan niu, pu' gempia telu'enen pa da tug lawasen muka' tu Megbebaya'. 29 Dayun sa' duun dademai megwali tu talu' nu Megbebaya', ma'antu dadema. Subay gikteben dua' tawan da atawaka telui megwali, selian nu ngag duma megyaga dun dadema. 30 Laak sa' selian nu sala megwali, duuni pegingkud dia pemuunan nu Megbebaya', subay sumikpa' su megwali, adun pekineegan sug begu pemuunay. 31 Kaas sukal sa' launan niui megwali tu talu' nu Megbebaya', laak subay megdapit amu, adun mpektu'unan su tiba'an niu, muka' mengulikseg amu. 32 Naa su tinawan megwali tu talu' nu Megbebaya', subay metau dun su megwali dun. 33 Ndi' ba metuud, mauya'an nu Megbebaya' melinaw su kesimba ta, kana' mesasaw?
Naa ki ngag libun. Ma'nini'ig betad nu ngag launan pikumpungan nu nga suminakup tu Megbebaya'. 34 Subay, sa' selian niu mekpungun, mengamed su ngag libun. Ndi' begay dinilan megagdat ilan. Maa' dadema nu titulu'an di palinta nu getaw Judea, subay ndi' meguit tu samataw nilan sug libun. 35 Sa' duuni saaken nilan sia, subay saaken nilan tu nga sawa nilan selian ditu da balay. Pu' ndi' mpia megagdatig libun su saanan niu mektamuy tu Megbebaya' dia nga pikumpungan niu, pu' mekepiidpiid.
36 Naa yamu, miksekat ba diniu su Gempia Petenday? Nda'. Atawaka yamu ba laaki kidetenganen? Kana' dadema. 37 Sa' duun diniui getaw laungen pu' iini megwali tu talu' nu Megbebaya' atawaka getaw laungen pu' bigayan nug Balakat nu Megbebaya' lain tinawan, subay pesuun diniin pu' ki sinulatu diniu kini, iini pinalinta tantu nu Kaunutan. 38 Kaas, sa' upama ndi'en pektalentenan ini, subay ndi' niu dadema iin pektalentenay.