3
Su nga Peneligan nu Megbebaya' dinig Lumbang, Megbaal Balayen
1 Naa su dia pau niu, Mingumpated, nda'u amu maukitay maa' nu getaw pingepu'an na nug Balakat nu Megbebaya', pu' subay inukitan ku amu maa' nu getaw megdunut pa tu gayak nilan, ma'niin gembata' pamu di keksalabuuk niu dini Kristu. 2 Iini ma'niinu mikpainum dun diniu gatas laak, kana' tantu gaan, pu' nda' pamu megaga ukitay di medalem titulu'an. Bisan nemun, ndi' pa niu mesabut, 3 pu' betad kinilawan pa pelumi pigbetad niu. Kagina duun diniu dawi meksesigiay muka' meksinualay, gempantek pu' kinilawan pai pigbetad niu, ma'niin pamu nu nga nda' pa pekpetuud dini Kristu. 4 Pu' kinana' tinalu' nug duma pu' suminakup daw dini Pablo, dayun laung nu sala pu' si Apolos dawi dinunutanen, maa' danu kinilawani pigbetad niu, ma'niin nu nga nda'i kesaligen dini Kristu.
5 Pegdelendem niu deli', aa? Ta'i gelal ni Apolos? Ta'i gelalu? Sesugu'en dami nu Megbebaya', migagak ami diniu mekpetuud tu Megbebaya'. Saladua', pigdunutan da nami su sugu'an dinami nu Kaunutan. 6 Mesu'at pesemaan ta di pimula. Naani mimula, mimenyag dun dayun si Apolos, laak su Megbebaya'i mikpepentubu' dun. 7 Kaas nda'i pigisuanen, su memula muka' su memenyag dun, kaas iin laaki mpenalan, su Megbebaya', pu' iini mekpepentubu' ditu pimula. 8 Mesama dai memula muka' memenyag. Diadia, sugdaan nu Megbebaya' lepeng tug baalenen. 9 Kaas, ami ni Apolos, meglimbang ami, miglepengi tindan dinami nu Megbebaya'. Muka' yamu demai maa' nug binaal nu Megbebaya' tanda' ami mengimbaal.
Naa pesemaan ku damu dema dig balay nu Megbebaya', pimendayan ku, 10 pu' bigayanu nu Megbebaya' tinawan ku megbaal dun. Mikpaseku di gempagen gentudanen, salai mektubus dun. Laak diadia, subay petubudaneni kebaalen dun. 11 Tindu' na nu Megbebaya' si Isukristu ma'niin nu gentudan nug balay. Nda'idunig lain mbaal gentudanen, sa'itada, nda'ig lain petuuden ta. 12 Naa, sa' baalen pa sug balay gentudan dun si Isukristu, mesu'at pengimbaalanen bulawan, sa' bulawan selapi', sa' melaga' batu. Mesu'at dadema pengimbaalanen gayu, sa' sigbet, sa' legami. Sa'itada, baalen pebian di gempia titulu'an sa' melaat titulu'an. 13 Dayun ditug binaya' gebii bu' gendaw, sa' di gendaw mpuli' dini su Kaunutan ta si Kristu, maita' na su pigbaal nug launan mekpetuud, saladua'. Pu' peksima'en ni Kristu pebian di gapuy, adun mesuunan sa' gempia, sa' kana'. 14 Naa, sa' duuni getaw ndi' mpangus nu gapuy kiai ma'niin pigbaalen dig balay gintud na dini Isukristu, sugdaan nu Megbebaya'. 15 Sa' duun pasi'i getaw mpupusig baalenen, naa mbeleng su sugda dun sia, laak iin, megawen da gusay. Laak megawen ma'niin da nu getaw megawen di gapuy, nda'i muiten.
16 Nda' niu ba mesuunay pu' ma'niin amu nug balay pengedapan tu Megbebaya' muka' pegbenwanan amu nug Balakaten. 17 Sa' duuni getaw peglaatanen su pengedapan tu Megbebaya', iin, pelebu'an nu Megbebaya', pu' pimili' nu Megbebaya' su pengedapan diniin, muka' binaal amu niin pengedapan diniin.
18 Sa' upama duun diniui getaw laungen dun metaasi tinawanen dig betad kinilawan nemun, milimbunganenig lawasen. Tumu' belengeneni tinawanen, adun meglegintau gupia. 19 Pu' nda'i pantagen dig delendeman nu Megbebaya' su tinawan nu kinilawan. Nda' ba mesulat kanugdiin di Misulat Talu' nu Megbebaya', “Su saanan nilan megakal tu ngag duma, laaman nu Megbebaya' su nga metau megakal.” 20 Duun pai sala pisulat nu Megbebaya' kanugdiin mituuken dun, “Misuunan nu Kaunutan pu' nda'i gatagen sug delendeman nu nga metau.” 21 Kaas, subay nda'idun diniu pengengya'eneni getaw dinunutanen. Segaga iini leliagen amu dun, pu' mipeduunan mamu launan biwat nu Megbebaya'. 22 Pu' bisan naan, si Apolos, si Pedro, sampay sug lumbang, su ketubu' muka' su kepatay, su mpenggulaula nemun muka' su gempenggulaula tug binaya' gebii bu' gendaw, daniu na tanan adun mpegebangan amu. 23 Muka' yamu, gegulingen amu ni Kristu, muka' si Kristu, gegulingen nu Megbebaya'.