4
Sug Delendeman nu nga Getaw Corinto ditu nga Peneligan ni Kristu
1 Naa yami, subay pemilangen niu ami sesugu'en ni Kristu, su nga siligan nu Megbebaya' dig daansama' pigbuni titulu'anen. 2 Misuunan taig betad nu sesugu'en, subay meseligan getaw metau mektalenten tu sinugu'an dun. 3 Naa, ndi'u melibuleng sa' ta'i kemilang niu dinaan, sa' ta'i kemilang nu ngag duma getaw tu pibaal dinaan nu Megbebaya'. Pu' bisan naan, ndi'u dadema pemilangenig lawasu gempia sa' melaat mekatag di sinugu'an dinaan nu Megbebaya'. 4 Nda'i pegbiksu'an ku dun, laak kana' iini ma'ananen pu' nda'i sayepu, pu' su Kaunutan tai metau dun gupia, iini mukum dinaan. 5 Kaas sa' ndi' pa mateng su Kaunutan, ndi' ta mpia pemilangenig duma ta metau, sa' ndi' metau, bisan adini getaw. Sa' mateng na su Kaunutan, buasanen su giglud delendeman nu getaw muka' pesuunenen su pigbuni pigdelendem nu getaw. Penalan dayun nu Megbebaya' su nga getaw saladua', lepeng tu pinggulaulanen.
6 Mingumpated, ki sinulatu kini, mibaalu lendasan diniuig lawasu muka' si Apolos, adun mengganget dig delendeman niu su kedunut niu tu sinulat kanugdiin, “Dunutay niu su gempia.” Kaas ndi' niu mpia pengangya' su sala mekpetu'un, dayun su sala pelum, peksudi'an. 7 Kaas, subay nda'idun diniui mekpetaas, pu' nda'idunig bigay diniu, su Megbebaya'i migbegay dun. Kaas mauma dema pengangya' niu sug bigay diniu?
8 Naa mabu' laung niu dun pu' nda'iduni kulang niu. Medatu' bamu di kepia? Muka' pa padun laung niu dun masi' pu' duma amu ni Isukristu meglekaunutan, asa yami, nda' pami meduma dun. Mauya'an ku miglegadi' na sia amu tu'u, adun meksalabuuk ita dini Isukristu meglekaunutan. 9 Iini mitalu'u dun, laung ku, yami nga peneliganen, ma'niin ami tindu' nu Megbebaya' tampusan gembaba', maa' nu pinirisu ginukuman dun laga' na ginaanen, ma'niin biwasan ami dig launan kilawan sampay dig launan sesugu'en nu Megbebaya' getaw langit. 10 Pu' saba' nu kekpetu'un nami mekatag dini Kristu, mipemilang ami nu nga getaw bengu'bengu'en. Yamu pasi', metelisebuten daw amu gupia saba' nu keksalabuuk niu dini Kristu. Yami, nda' dawi pegbaya' nami, laak yamu, metaas dawi pegbaya' niu. Pegbesaan pa pagid amu, laak yami, peksudi'an ami. 11 Metuud dadema, sampay nandaw meglelegutem ami muka' meglelekuaw ami, nda'i gempia penepeten nami, pinampaling ami, muka' mitageli kegbenwa nami sampay nemun. 12 Subay mektegel ami mengimbaal, adun mesukat namii kegleketubu' nami. Sa' penampalaksaan ami nu ngag duma, penenebian nami laak ilan, adun pepianan ilan nu Megbebaya'. Sa' peglegetan ami, pektigelen da nami. 13 Sa' pengumpiiden ami, suli'an nami gamu'. Sampay nandaw ma'niin ami nu pimelengan dig lumbang kini, ma'niin milemu'an ami gupia, pu' pituyang ami nu kelaun getaw.
14 Laak kana' iini sinulatu dun diniu adun pengumpiiden ku amu, pu' iini sinulatu dun, adun tikuken amu. Pu' bata'u amu di kekpetuud ta, petailen ku amu gupia. 15 Pu' bisan melaun gupiai mektitulu' diniu mekatag di gempia pegbetaden nu nga suminalabuuk dini Kristu, kana' melauni gama' niu, sala tawan da. Su kaukitu diniu Gempia Petenday, naani mibaluy gama' niu di keksalabuuk ta dini Kristu Isus. 16 Kaas penengiin ku diniu, penunggilingay niau. 17 Adun ebangan amu ni Timoteo menunggiling dinaan, sinugu'u iin meditu niu. Si Timoteo, meseligan main, pu' petailen ku bata'u di kekpetuud ta ditu Kaunutan. Metegyungen diniu sug betadu sumalabuuk dini Kristu Isus maa' dadema nu titulu'an ku tug launan pikumpungan nu nga samasakup ta bisan tanda'u pangay.
18 Naa duun diniui mekpelabawlabaw na, pu' laung nilan dun ndi' nau meguliug dia niu. 19 Laak sa' buangen nu Kaunutan ta, ndi' maiben, medituunu niu. Sa' mateng nau, pegipusipusen ku dayun sug betad nilan, sa' duuni ginuung nilan puun tug Balakat nu Megbebaya', sa' kana' ba, gikteb laak dig baba' nilan. 20 Pu' kana' yaga laaki palas nu nga suminalabuuk sumakup ditu Keglekaunutan nu Megbebaya', segaga ginuung gupia. 21 Mendadi, yamu mai metau dun, adini mauya'an niu? Sa' ndi' niu belengeni melaat betad niu, medituunu niu uitan ku amu badas. Laak sa' pasi' meksikesuun damu, medituunu niu, pengmia'mia'an ku amu titulu'ay puun tug lelaatu diniu.