2
Su Puun nu Kesalig nu Getaw ditu Megbebaya'
1 Naa uu Mingumpated, su kedituun ku niu, sa' pigukitu diniu su metuud daansama' pigbuni nu Megbebaya', nda'u peglaamay megukit maa' nu getaw metaasi tinawanen. 2 Pu' pigdelendemu su saanan ku dia niu, iin laaki ukiten ku diniu, si Isukristu linansang di kurus adun matay, nda'ig lain. 3 Su keguliugu dia niu, nda'u gupia mpebulusi kegwali diniu, pu' tiklabanu buus megdua'dua' amu. 4 Sa' migukitu diniu muka' mikpetendayu, nda'u penunggilingay su getaw metaasi tinawanen, adun pengmetuudaneni nga getaw, pu' mikepengmetuud diniu, su ginuung nug Balakat nu Megbebaya' saanan ku megwali diniu. 5 Kaas su puunan nu kesalig niu dini Isus, kana' nu tinawan kilawan, pu' ginuung gupia nu Megbebaya'.
Su Tinawan nu Megbebaya'
6 Bisan ma'antu, metaas tinawani pegukitu tu nga meligen nai kekpetuuden, laak kana' nu tinawan puun tu kilawan nemun. Kana' dadema puun tu nga kaunutan nu nga getaw dinig lumbang kini nemun, pu' mengikteb gusay su pegbaya' nilan. 7 Pu' iini tinitulu'u, ki mileglud tinawan nu Megbebaya' pigbuni di nga kilawan. Pu' su nda' pa mbaali gekleb langit bu' lupa', pigdelendem na nu Megbebaya' peduma ita niin di kegbasa diniin ditug binaya' gebii bu' gendaw. 8 Bisan sala tawan di nga kaunutan dig lumbang kini nemun, nda'iduni mekesabut dun, pu' sa' misabut nilan sia, nda' nilan sia lensangay dia kurus su tampusan migdedengeg Kaunutan. 9 Nda' ba mesulat ma'nia kanugdiin,
“Su pingandam na nu Megbebaya' begay tu nga getaw mekpetail diniin,
nda' pekpalas tu nga mata getaw, nda' metuuk di nga telinga getaw,
nda' dema pengganget dig delendeman getaw.”
10 Kiin, laak biwasan na dinita nu Megbebaya' pibian dig Balakaten. Kig Balakaten kini, tinukawanen sug launan, bisan su medalem delendeman nu Megbebaya'. 11 Ndi' ba metuud, daal dai mekesuun tug delendeman getaw, su da ginaanen? Ma'antu dademaig betad nu Megbebaya', mesuunan da laak nug Balakaten sug delendemanen. 12 Ita nga mekpetuud, bigay dinita nu Megbebaya' sug Balakaten, sabaya' nug betad kinilawan sumalig tu tinawan kinilawan. Bigayan ita niin dun, adun mesabut ta su kelaun bigayen dinita di nda'i sugda ta dun.
13 Kagina ma'antu, su titulu'an pigwali ta, kana' talu' pegwali laak nu kilawan mekpuun di tinawanen, pu' titulu'an nug Balakat nu Megbebaya', pigulug ta su metuud mekatag di Megbebaya' tu getaw pingepu'an na nug Balakaten. 14 Laak su getaw nda' begayay Balakat nu Megbebaya', ndi'en metelima' sug begay sia nug Balakat nu Megbebaya', pu' laungen dun nda'i gatagen, ndi'en dadema mesabut. Pu' mekesabut dun laak sug bigayan Balakat nu Megbebaya'. 15 Su getaw pingepu'an pasi' nug Balakat nu Megbebaya', metau mekpemilang dig launanen, laak nda'i getaw mekemilang diniin sa' melapang, sa' misugatan. 16 Nda' ba mesulat di Misulat Talu' nu Megbebaya' kanugdiin,
“Ta' taway dun mai mekesuun tug delendeman nu Kaunutan?
Ta' taway dun mai mekektitulu' diniin?”
Laak ita, megdelendem ita maa' nug delendeman ni Kristu.