2
Su Kegigetaw ni Isus
1 Naa di timpu kia, su tampusan gadiˈ nu getaw Roma si Augusto, mikpelaktag puˈ penlistaan sug launan getaw ditu peglegediˈanen. 2 Kiaig bekna kenlista di nga getaw, saanan nu kaingkud dadema ni Cirenio gubirnadur tu Siria. 3 Naa maˈantu, diadia subay minangay tug benwa nu ginepuˈayen adun mekpelista dia.
4 Mendadi kini si Jose, ki gandang linaawan nu getaw langit kiin, benaˈ midengegen su pimuun kia nu gadiˈ, sumikat dema tug lunsud Nazaret, sakup Galilea, miditug Betlehem, lunsud ditu tandaˈ nu kegigetaw ni Adiˈ David, puˈ sapuˈ ni David si Jose. 5 Miditu dayun mekpelista, dumanen si Maria, kig bimbengen kiin, begat na. 6 Mendadi, benaˈ dia nailan Betlehem, minateng ki kegbataˈ ni Maria. 7 Migbataˈ tuˈu penganay bataˈen, bataˈlaki. Laak sabaˈ ndaˈidun nai sugud diag balay pektulugan nu nga getaw, ibenan ni Maria ki gembataˈ, dayunen pebeliliday diag dialem palungan nu nga petubuˈen.
Pitendayan Getaw Langit su nga Megingat Karniru
8 Naa diag benwa kia, duuni nga megingat karniru, pegingaten nilan su nga karniru nilan diag beluyan saˈ gebii. 9 Mendadi, saanan nilan megingat dun, tekaw duuni mituaˈ dia nilani sesuguˈen nu Kaunutan Megbebayaˈ getaw langit. Mitiagan dayun nu kelengas nu Kaunutan Megbebayaˈ su nga megingat karniru. Mipatiˈ ilan dayun mendek. 10 Dagid miktaluˈ su getaw langit dinilan, “Ndiˈ amu mendek! Puˈ ki petendayu kini diniu, gempia, dedialan gupia nug launan getaw. 11 Puˈ gebii kini, ki Meglegawen diniu, su Kaunutan si Kristu, migigetaw na tuˈu ditug lunsud ni David! 12 Naa maˈniniˈi tuˈusan niu dun. Adin sug begu pegigetaw gembataˈ ibenan, pibelilid di palungan.”
13 Mideksuˈ laak mektaluˈ su getaw langit, mitekaw metuaˈ melaun gupia dumanen, getaw langit dadema. Inal nilan su Megbebayaˈ, laung nilan,
14 “Enalen su Megbebayaˈ ditu gekbus langit!
Dayun su nga getaw petailenen dinig dibabaw lumbang, gembageli kelinaw nilan!”
15 Mendadi, mimegawaˈ su nga sesuguˈen nu Megbebayaˈ ditu megingat karniru, mimeguliˈ ilan ditu gekbus langit. Benaˈ mipalus ilan, laung nu nga megingat karniru, “Tala. Mpanaw ita ditug Betlehem, bentayan ta ki mipenggulaula kini pisuun dinita nu Kaunutan Megbebayaˈ.”
16 Migapas dayun mpanaw su nga megingat karniru, mibaangan nilan tuˈu si Maria buˈ si Jose dakus ki gembataˈ kia, pibelilid tuˈu dia palungan. 17 Dekag minitaˈ nu nga megingat karniru su gembataˈ kia, inukit nilan di ngag duma getaw su pisuun dinilan nu nga getaw langit mekatag di gembataˈ kini. 18 Sug launan mikedengeg ditu ginukit nu nga megingat karniru, misebuˈan ilan dun. 19 Laak si Maria, tinaguˈen gupia dig delendemanen kig lumaun mipenggulaula, pigdelendemen gusay. 20 Tubus itu, mipuliˈ su nga megingat, inal nilan tantu su Megbebayaˈ sabaˈ nug lumaun minitaˈ nilan mukaˈ midengeg nilan, maaˈ dadema nu pitenday dinilan nu getaw langit.
Binaalan Ngalan si Isus
21 Naa ki gembataˈ kini, benaˈ di kewalu endawen genat kegigetawen, su gendaw peksirkunsisu dun, binaalan na ngalanen. Iini piningalan diniin, si Isus, ki ngalan pitenday nu sesuguˈen nu Megbebayaˈ getaw langit, su kanaˈ pa bedesan dun nu ginaˈen.
Pigwakil tu Megbebayaˈ su Gembataˈ si Isus
22-24 Naa mitektak na su kekanu ni Maria mekatag di palinta pisulat nu Kaunutan Megbebayaˈ ditu ni Moises dengantu, adun mawaˈ su kelemuˈay ni Maria genat megbataˈ. Mendadi benaˈ mitektak na, miditu Jerusalem si Maria buˈ si Jose, iini guliden nilan su misulat ditu Palinta, laung, “Duaˈ buukig buun atawaka duaˈ buuki gekpis malepati.” Iwit pa pagid nu mekegulangen su gembataˈ kia si Isus, puˈ adun pegwakil tu Kaunutan Megbebayaˈ. Puˈ misulat ditu Palinta, “Adini penganay gembataˈ, saˈ laki, paingalan dun pinaas, puˈ danu Kaunutan Megbebayaˈ.”
25 Naa mitaang duuni getaw migbenwa dia Jerusalem, ngalanen si Simeon. Mekesuun si Simeon, mikpetuud gupia tu Megbebayaˈ, dakus mikpedateng di kenlekat tug bansa Israel. Naa pingepuˈan gusay nug Balakat nu Megbebayaˈ si Simeon. 26 Kaas gandang pisuun nug Balakat nu Megbebayaˈ diniin puˈ ndiˈ pa matengi gumulen, subay maitaˈen pa ki Tinduˈ nu Megbebayaˈ Meglekaunutan, metuaˈ na tuˈu. 27 Naa duuni gendaw, ibayan si Simeon nug Balakat nu Megbebayaˈ meditu Pengedapan tu Megbebayaˈ. Mendadi, midengan dun su gembataˈ kia si Isus, inated nu mekegulangen dia, adun penggulaulaan nilan na tuˈu diniin sug betad kia misulat ditu Palinta nu Megbebayaˈ. 28 Naa, benaˈ minitaˈ ni Simeon ki gembataˈ kia, ginibanen, mukaˈ pikpeladpeladanen su Megbebayaˈ, laungen,
29 “Aa naa, uu Kaunutan, mesuˈat na buang mu dinaan, ki sesuguˈen mu kini, matayu di gempia ginaa,
maaˈ dadema nu gandang tinaluˈ mu dinaan.
30 Puˈ miduaˈ matau na tuˈu ki meglegawen genat diniˈa,
31 ki gandang sinukat mu, medayag pa nu kelaun bansa nu getaw.
32 Kinii tilaw mekpedelag pa tu nga kanaˈ getaw Judea,
iin dademai puunen, enalen ami nu nga getaw Israel, ki piglegetawan mu.”
33 Naa benaˈ midengeg nu ginaˈ ni Isus mukaˈ nu gamaˈen su kelaun tinaluˈ kia ni Simeon mekatag di gembataˈ, misebuˈan ilan dun. 34 Pinenebian dailan dema ni Simeon. Kaliˈ padun pektaluˈ si Simeon tu ginaˈ nu gembataˈ si Maria, “Naa ki gembataˈ kini, gasalen, mekpuun diniin, melaun getaw Israel ndiˈ mpeduma tu ketubuˈ ndaˈi tamanen. Mukaˈ melaun getaw Israel mpeduma pasiˈ tu ketubuˈ kia, puun da gusay dig bataˈ kini. Gasalen dadema, iini mbaal tuˈus genat tu Megbebayaˈ, laak pemilasen nu nga getaw, 35 kaas su iglud delendeman nu melaun getaw, mbuasan da. Dagid daniˈa pelum Maria, melegenan ka patiˈ mekpuun diniin, maaˈ teduken sundangi pusung mu.”
36 Naa duun pagidi sala tawan libun dia, pimuunan nu Megbebayaˈ, ngalanen si Ana, bataˈ ni Panuel, sapuˈ ni Aser. 37 Megulang gupia si Ana, puˈ pitu taun megawid duayan, dayun genat itu mibalu, sampay walu puluˈ buˈ paat tauni gidaden. Betad ni Ana, gebii gendaw mektamuy dia Pengedapan, mekpuasa mukaˈ menenabi. 38 Mendadi, benaˈ mideksuˈ mektaluˈ si Simeon mekatag di gembataˈ kia, iin demai kedateng ni Ana dia, mikpaladpalad dayun tu Megbebayaˈ si Ana. Genat itu, adini getaw mekpedateng di kenlekat tu nga getaw Jerusalem, pegwelian ni Ana mekatag di gembataˈ si Isus.
39 Mendadi si Maria mukaˈ si Jose, benaˈ migelaˈ nilan petuuday sug lumaun betad kia sinulat ditu Misulat Palinta nu Kaunutan Megbebayaˈ, minuliˈ ilan ditug lunsud pegbenwanan nilan, ditu Nazaret, sakup Galilea. 40 Tuminulin dayun su gembataˈ, tuminulin sug lawasen mukaˈ migiseg gupia su sinuunanen. Liliag dun dadema su Megbebayaˈ.
Su Gembataˈ si Isus diag Balay Pengedapan tu Megbebayaˈ
41 Naa su mekegulang ni Isus, tauntaun mangay ilan ditu Jerusalem sumaup tug Lumpuk nu getaw Judea gindan tug Liniusan. 42 Naa saˈ maˈantu, ki gembataˈ kia si Isus, benaˈ sepuluˈ buˈ duaˈ nai taunen, migdunut tu mekegulangen meditu Jerusalem sumaup, maaˈ nu gandang betad nilan. 43 Mendadi, benaˈ miglinggwang na sug Lumpuk, sumikat su nga mekegulang ni Isus muliˈ. Laak su gembataˈ si Isus, miksibilin pa dia Jerusalem. Ndaˈ mesuunay nu mekegulangen, 44 laak laung nilan dun, diin da piktendugan nilan. Kaas lagaˈ sendaw ilan mpanaw, dekag pa nilan metukaway, dayun nilan penengaway ditu ngag betaˈan nilan mukaˈ di kailala nilan. 45 Mendadi benaˈ ndaˈ nilan maitaˈ, mipuliˈ ilan ditu Jerusalem, pekpenengaun nilan ditu. 46 Benaˈ di ketelu endawen, dekag pa nilan mbaangay, dia masiˈ Pengedapan. Pegingkud dia si Isus, dumanen su nga mekpetuˈun di Misulat Palinta nu Megbebayaˈ, pekineeg dinilan, bineegen sumaak dinilan. 47 Sug launan mikedengeg dun, misebuˈan ilan tu sinuunan ni Isus sampay su penembagen. 48 Benaˈ mibaangan nu mekegulangen si Isus, misebuˈan ilan dun gupia. Laung nu ginaˈen, “Apelai, Naung, mauma dema pimaˈniin mu ami? Su gamaˈ mu mukaˈ naan, milegenan ami gupia menengaw diniˈa.”
49 Dagid kaliˈ sembag si Isus, “Aa, masiˈ penengaun niau? Ndaˈ niu masiˈ mesuunay puˈ subay mediniinu Balay nu Gamaˈu?” 50 Laak ndaˈ mesabut nu mekegulang ni Isus su gulugan nu tinaluˈen kia.
51 Naa saˈ maˈantu, migdunut si Isus dia mekegulangen muliˈ ditu Nazaret, mukaˈ mikpetuud dinilan. Saˈ su ginaˈen, tinaguˈen dig delendemanen su kelaun mipenggulaula kini. 52 Mendadi, migiseg su sinuunan ni Isus sampay tuminulinig lawasen. Liliag dun su Megbebayaˈ, sampay pitail dadema nu nga samatawen.