14
Su Kepatay ni Juan su Memunag Tubig
1 Naa su kaunutan dia Galilea si Herodes, midengegen su pinggulaula ni Isus. 2 Benaˈ midengeg ni Herodes, kaliˈ pektaluˈ, “Uy, kiin si Isus, iin si Juan su Memunag Tubig, masiˈ mitubuˈ puliˈ! Kaas ma duuni ginuungen menggulaula mekesalebuˈ.”
3 Kaas maˈniai tinaluˈ ni Herodes, puˈ begudiin su ndaˈ pa patay si Juan, suminuguˈ si Herodes puˈ daapen si Juan, pibaluden dakus pipirisunen. Puˈ iini puunanen, begudiin duuni sala tawan libun ngalanen si Herodias, inagaw ni Herodes, asa sawa nu pated ni Herodes si Felipe. 4 Kaas si Juan, tatap mektaluˈ dini Herodes, “Binandu ma ditu Misulat Palinta nu Megbebayaˈ, penginsuaan mu si Herodias!” 5 Naa kagina maˈantu, petain sia ni Herodes si Juan, laak mendek si Herodes tu melaun getaw, puˈ sug delendeman nilan, pimuunan nu Megbebayaˈ si Juan.
6 Naa kini si Herodes, miglumpuk metaang di gendawanen. Benaˈ miglumpuk si Herodes, duunig bataˈ nu sawanen kia si Herodias, delaga, suminayaw dia gedapan nu nga getaw suminaup dia. Si Herodes, liliag dayun tu kesayaw nug delaga kia. 7 Suminapa dayun si Herodes, laungen, “Naa, Enuˈ, pia taˈ alanduni penengiin mu dinaan, begayu diniˈa!”
8 “Naa, iini begay mu dinaan, ki gulu ni Juan, su Memunag Tubig, betangen nandaw dig dekulan!” Laak ki sembagen kini, tinituluˈ dun nu ginaˈen sug delaga.
9 Naa, apelai, milegenani gadiˈ kini. Dagid sabaˈ nu kesapanen kia di gedapan nug launan bisitanen, subay suguˈenen begay tug delaga ki pinenginen kia. Suminuguˈ dayun si Herodes, 10 pinutukan tuˈu gulu si Juan diag dialem pirisuan. 11 Iwit dayun diag delaga ki gulu ni Juan, bitang tuˈu dig dekulan, tinulun diag delaga, dayun pigwakilen dia ginaˈen. 12 Naa duun dayuni nga sakup ni Juan mituaˈ dia, inangay nilan sug bangkay ni Juan, dayun nilan lebengay. Benaˈ milebeng nilan, minundas ilan tu ni Isus, inukit nilan diniin su mipenggulaula ni Juan.
Pinaan ni Isus sug Lima Ngibu Tawan
13 Naa si Isus, benaˈ midengegen su pitenday kia di mipenggulaula ni Juan, migawaˈ dayun diag benwa kia, suminakay sekayan, adun mekpain pa sia di meliawliaw benwa. Laak su nga melaun getaw dia ngag lumibut lunsud, misuunan nilani kepanaw kia ni Isus. Saˈ maˈantu, miglendug ilan, ditu ilan minian lupaˈan. 14 Saˈ maˈnia, benaˈ mikelusad si Isus tu sekayan, minitaˈen ki melaun gupia getaw. Milelaat dinilan si Isus, pineguliˈanen dayun su nga pegladu dinilan.
15 Naa benaˈ sungu na mesindepi gendaw, mikpesempel dini Isus su nga sakupen, kaliˈ ilan pektaluˈ, “Sir, sungu na mesindepi gendaw, mukaˈ kig benwa kini, meliaw pa pelum. Kaas melengas suguˈen mu, Sir, su nga getaw, mangay ilan tu ngag lunsud puˈ adun mekesaluy ilan lebungan nilan.”
16 Sumimbag si Isus, “Ndiˈ ilan kambat mundas ditu. Yamu mai mekpaan dinilan!”
17 “Apelai, Sir!” simbag nu nga sakupen. “Duun laakig lima buuk pan nami kini, dayun duunig duaˈ buuk sedaˈ.”
18 Laung ni Isus, “Naa, uit niu dini naan.” 19 Mendadi, pimaingkud dayun ni Isus su melaun getaw diag lamalama. Mendadi benaˈ migelaˈ ilan mekaingkud, inimud ni Isus kig lima buuk pan mukaˈ sug duaˈ buuk sedaˈ, dayun megangag tug langit mukaˈ mekpaladpalad tu Megbebayaˈ. Pikpetapetanen dayun su pan kia, piktukiden pegilasay tu nga sakupen. Pingilak nilan dayun tu nga melaun getaw. 20 Minaan dayun su kelaun getaw, mukaˈ migelaˈ ilan mbesug. Benaˈ mibesug nailan, kaliˈ penikpesay nu nga sakup ni Isus su sawad nilan dun, sepuluˈ buˈ duaˈ dig belanan mipenuˈen. 21 Su getaw minaan dun, lima ngibu tawan su laak lumbus laki, ndaˈig labeti ngag libun mukaˈ nga gembataˈ.
Mipanaw si Isus dig Dibabaw Tubig
22 Naa benaˈ mitubus maan su nga kelaun getaw, pisakay ni Isus su nga sakupen tu sekayan, piunanen ilan dumipag tug linaw. Daniin, piuliˈen pa su melaun getaw. 23 Naa benaˈ migudas na dema ditu nga getaw, tumiwad dayun si Isus salanen dig bentud, adun menenabi dia. Saˈ maˈantu, benaˈ miglegebii na, sala da ni Isus dia. 24 Su sekayan nu nga sakupen, ditu na titengaˈ laud nug linaw. Mikiwangiwang patiˈ sabaˈ nu medekdes nabek, puˈ misensung nilan su genus.
25 Mendadi, benaˈ sungu na daliˈ endaw, minangay si Isus ditu nilan, pekpanaw diag dibabaw tubig. 26 Benaˈ midayag nilan si Isus masiˈ pekpanaw diag dibabaw tubig, mindek ilan patiˈ. Migbeksay ilan, laung nilan, “Multu main!”
27 Dagid miktaluˈ si Isus dinilan, “Naa, gempia dai ginaa niu. Naan daini. Ndiˈ amu mendek.”
28 Si Pedro, suminambut mektaluˈ, laungen, “Kaunutan, saˈ metuud puˈ yaˈa tuˈu, sabi mau mediin niˈa, pepenaun mau dema dig dibabaw tubig kini.”
29 “Naa, diniin ka!” simbag ni Isus. Aba, guminawas dayun si Pedro di sekayan, mukaˈ mipanaw dema diag dibabaw tubig, suminungkak sia dini Isus. 30 Dagid kaliˈen mbetikay su metikteg genus, mindek pelum si Pedro, benaˈ peglened na. “Kaunutan,” laungen, “gawen mau!”
31 Tinggal dayun ni Isus sug baingkenen, piguidanen si Pedro, laungen diniin, “Mauma dema maikaˈi kesalig mu dinaan? Mauma dema duaˈduaˈi kesalig mu dinaan?”
32 Suminakay dayun ilan duaˈ dia sekayan. Misikpaˈ dayuni genus. 33 Minginlulud dayun di gedapan ni Isus su nga sakupen dia sekayan, laung nilan, “Metuud lai daan, yaˈa na gupia sug Bataˈ nu Megbebayaˈ!”
Pineguliˈan ni Isus su nga Pegladu tu Genesaret
34 Mendadi, minundas si nga Isus dumipag diag linaw. Benaˈ dumingguˈ ilan tu Genesaret, 35 miˈilala dayun nu nga getaw dia si Isus. Saˈ maˈnia, pimuun nilan dayun su nga pegladu di kelaun lumibut benwa, pinguit ilan dayun dia ni Isus. 36 Inubug nilan dini Isus, pia laak daw sia medeluˈ nu nga megladu su kuyamay suuben. Mukaˈ adin su taman getaw mikedeluˈ dun, migelaˈ ilan dayun mauliˈay.