Ɛmɛ xeye na ye trɔ xɔ ye, lo ji ohan nɔ
14
1 Mi wɛ ko na mɔ kpɔn kpoŋu, ko kpɔn Lɛngbɔvi la le ote le Syɔn we okpó la ji, emyɔ kpodo ɛmɛ akpo sandi ɖokpo akpo ota ɛnɛ akpo ŋukun ɛnɛ (144.000), xeye na ye wlan nyikɔ etɔn kpodo Otɔ we nyikɔ do ŋukɔnnu na ye. 2 Ko se ogbe ɖe ɖi le jiŋukunsin ɖi otɔ ɖaxo ɖe wɛ do nɔ ha, alo oju ɖaxo ɖe wɛ do ogbe nɔ ha. Ogbe xena ko se la bo le ɖi ogbe xena onuxonu okannɔ nɔ do, na ye xo ye nɔ ha. 3 Ye bo lo ji ohan yɔyɔ ɖe nɔ le xɔluzinkpwe la we ŋukɔn, le onu le ɛgbɛ ɛnɛ laye kpodo ɛmɛhyɔn laye we ŋumɛ. Ɛmɛ ti ɔn kpewu na kplan ohan la, zɛgbɔn ɛmɛ akpo sandi ɖokpo akpo ota ɛnɛ akpo ŋukun ɛnɛ (144.000) laye xena ye trɔ xɔ le nyixɔ la ji ye wu. 4 Ɛmɛ mɛ ye, ɔn do oɖyu yeɖe kpodo nyɔnusiye, ye ɔn tɛkpɔ nyɔnu kpɔn. Ye nɔ le ɛtɛ na Lɛngbɔvi la a do yi ofi ɖekpekpe xena e lo yi nɔ. Ye trɔ xɔ ye le ɛgbɛtɔye mɛ na ye a do nyi ɛmɛ tantyantɔn xeye na ye sɔ na Mawu kpodo Lɛngbɔvi la. 5 Ye ɔn kan ojo kpɔn. Ofɛn ti ɔn le ye wu.Mawu we ɛwɛndotɔ atɔn we oxo
6 Mi wɛ ko kpɔn ɛwɛndotɔ bu, e bo zɔn gbɔn jiŋukunsin mɛ daan nɔ; Ɛwɛn Nywɛ mavɔmavɔ ɖe le e si, e bo ka do na ɛmɛ xeye ni le nyixɔ la ji zɛtɛye nɔ, otogun ɖekpekpe, akɔta ɖekpekpe, ogbe ɖekpekpe, kpodo oto ɖekpekpe. 7 E do axwa sinsyɛnxu ɖe bo lɔ nɔ tun mɔ: «Mi ɖo sisi na Mawu, a bo kanfu-i, ɖo kojoɖiɖo etɔn we ogan xo, mi sɛn ɛmɛ xeni ɖo jiŋukunsin, nyixɔ, ɛxu kpodo otɔjɔtyɔnye!» 8 Mawu we ɛwɛndotɔ owegɔ bu, jɛ ɛtɛ na tantyantɔn la, bo lɔ nɔ tun mɔ: «E gba, e gba, Babilɔnu toxo ɖaxo la, emyɔ xeni dɔn otogun zɛtɛye do agalilɛ mɛ ɖi tun vɛn wɛ ye kpe na ye ha, e bo hɛn aɖidido taŋu va ye ji!» 9 Mawu we ɛwɛndotɔ bu, ɛwɛndotɔ atɔngɔ, jɛ ɛtɛ na owe tantyantɔn laye, bo lɔ nɔ kpodo axwa kpo tun mɔ: «Na ɛmɛ ɖe sɛn kanlin la kpodo onutita etɔn, bo yi josi ɖe do ŋukɔnnu alo alɔ wu, 10 emyɔ can na nu Mawu we aɖidido taŋu ɖi vɛn aku-aku xena ye kɔn do aɖidido we kɔkpo etɔn mɛ ha. E bo na se vivɛ taŋu le ozo kpodo ohwemi mɛ, le ŋumɛ na Mawu we ɛwɛndotɔ kinkwɛnye kpodo Lɛngbɔvi la! 11 Ye ɛmɛ xeye ni lo sɛn kanlin la kpodo onutita etɔn, kpodo ɛmɛ ɖekpekpe xeni yi nyikɔ etɔn we josi la, ozo xeni na do aya na ye la we azɔ lo tun nɔ tɛgbɛ, ye ko ɖo vivo nɔ oklo kpodo ozan.» 12 Mi wɛ dɔn, Mawu we ɛmɛ ɖe ɖo ovo ye, xeye ni zɔn do osɛn etɔnye ji nɔ ye, bo ɖo xɔse do Yesu ji ye, ɖo na do vivɛnu. 13 Ko se ogbe ɖe ɖi le jiŋukunsin, bo lɔ nɔ tun mɔ: «Wlan oxo xe: “Nyɔnanɔye wɛ nyi ɛmɛ kukuye, ye ɛmɛ xeye ni ku le Xwetɔ la mɛ ye”! Ɛɛn, Gbigbɔ la lɔ tun, “ye ni boo va yi gbɔjwɛ do gbagba jijɛ yetɔnye wu, ɖo odan nywɛ-nywɛ yetɔnye kplɔ ye do”.»
Ɛjinukun gbigbo le nyixɔ la ji
14 Ko kpɔn sunwɔ owee ɖe, ɛmɛ ɖe xeni le ɖi ɛgbɛtɔ we ovi ha bo xlɔn onyi le sunwɔ la ji. Xɔlu we ogba xena ye sɔ sika do wasi bo le ota ni-i, ɛjinukungbonu ɖiɖa ɖe bo le alɔ mɛ ni-i. 15 Mawu we ɛwɛndotɔ bu tɔn sɔn Mawu we oxwe la gbe, bo lo lɔ na ɛmɛ xeni xlɔn onyi le sunwɔ la ji nɔ kpodo axwa lelele tun mɔ: «Sɔ ɛjinukungbonu tɔwe la, a bo ɖe ɛjinukun! Ɛjinukun ɖiɖe we ogan xo, ɖo nyixɔ la ji we ɛjinukunye o bya.» 16 Mi wɛ ɛmɛ xeni xlɔn onyi le sunwɔ la ji nyi ɛjinukungbonu etɔn la gbɔn nyixɔ la ji, bo ɖe ɛjinukun laye le nyixɔ la ji. 17 Mawu we ɛwɛndotɔ bu tɔn sɔn Mawu we oxwe xeni le jiŋukunsin la mɛ, emyɔ can hɛn ɛjinukungbonu ɖiɖa do asi. 18 Mawu we ɛwɛndotɔ bu xeni ɖo ɛcɛ do ozo ji, tɔn le ovɔsinsan we agba la mɛ, bo lɔ kpodo axwa lelele na ɛmɛ xeni ɖo ɛjinukungbonu ɖiɖa la tun mɔ: «Sɔ ɛjinukungbonu ɖiɖa tɔwe a bo gbo vɛntin xeye ni le nyixɔ ji we oxwiye, ɖo hlɛzɛn etɔnye o bya.» 19 Ɛwɛndotɔ la nyi ɛjinukungbonu etɔn la do nyixɔ la ji, bo gbo oxwi xeye ni le vɛngle la mɛ le nyixɔ la ji ye, bo bɛ ye kɔn do Mawu we aɖidido we onufyɔngun ɖaxo la mɛ. 20 Ye li hlɛzɛn laye le onufyɔngun la mɛ le toxo la godo. Ɛhun bo tɔn sɔn onufyɔngun la mɛ taŋu bo gbakpe gbɔɔn bo na yi kpɛntin sandi atɔn (300). Na e nyi tun osɔ ɖe ɖyɛ e mɛ, ota jan wɛ ye na kpɔn ni-i nɔ le ɛhun la mɛ.