Kanlin owe xeye ni tɔn ye
13
1 E mɛ godo, ko kpɔn kanlin ɖe tɔn sɔn ɛxu mɛ, bo ɖo azo owo kpodo ota acowe. E bo cɔn xɔlu we ogbavi do azo ɖokpo-ɖokpo ji. Ye bo wlan nyikɔ xeni nyi ozun na Mawu do ota ɖokpo-ɖokpo wu. 2 Kanlin xena ko kpɔn la le ɖi okpɔ ha, afɔ etɔnye bo ɖi ohla we afɔ ha, onu etɔn bo ɖi kini-kini jaŋuta we onu ha. Dlagɔn la bo sɔ hɔnhlɔn etɔn, xɔluzinkpwe etɔn kpodo ɛcɛ ɖaxo ɖe sɔ ni-i. 3 Kanlin la we ota ɖokpo le ɖi onu xena ye do abi e wu ha gbɔɔn kanlin la bo tun ma ku, vɔ abi xeni tun ma hɛn oku va la, bo ku. E mɛ la bo jɛŋu na ɛmɛ zɛtɛye xeni le nyixɔ la ji, ye bo kplɔ-ɛ do. 4 Ɛmɛ zɛtɛye jɛ dlagɔn la sinsɛn ji, ɖo, e na ɛcɛ kanlin la. Ye nɔ sɛn kanlin la can a bo lɔ tun mɔ: «Onu lɛ le ɖi kanlin xe ha, onu lɛ na kpewu fun ahwan kpan ŋukɔn-ɛ?»5 Ye ni-i ogbe, e ba do lɔ gonyi we oxoye, a bo zun Mawu; ye ni-i ɛcɛ ni a do wa odan na sunzan kanɖe ŋukun owe. 6 Kanlin la jɛ oxo nyanyla lilɔ ji bo do zun Mawu nɔ, e nɔ zun nyikɔ etɔn, a bo zun ofi xena e nɔ nɔ, a bo mɔ zun ɛmɛ xeni nɔ nɔ sɛxwe zɛtɛye. 7 Ye ni-i ogbe ni a do fun ahwan kpan ŋukɔn Mawu we ɛmɛ ɖe ɖo ovo ye, a bo ɖu le ye ji. Ye ni-i ɛcɛ do akɔta ɖekpekpe, oto ɖekpekpe, ogbe ɖekpekpe kpodo otogun ɖekpekpe ji. 8 Ɛmɛ zɛtɛye xeni le nyixɔ la ji ye na sɛn-ɛ. Ye ɛmɛ xeye na ye ɔn wlan nyikɔ yetɔnye do Lɛngbɔvi xena ye hu la we ɛgbɛ we wema la mɛ ye sɔn ɛgbɛ la we dojɛ gbɔɔn ye, wɛ na sɛn-ɛ.
9 Na ɛmɛ ɖe ɖo oto, ni se onu! 10 Ɛmɛ xeni ɖo na yi ogankpa mɛ, na yi ogankpa mɛ, ɛmɛ xeni ɖo na ku le dɛnkpwe nu, bo na ku le dɛnkpwe nu. Mi wɛ dɔn na Mawu we ɛmɛ ɖe ɖo ovoye ɖo na do vivɛnu a bo ɖo xɔse.
11 Mi wɛ ko mɔ kpɔn kanlin bu, e bo tɔn sɔn nyixɔ gɔ. E ɖo azo owe ɖi lɛngbɔvi we azoye ha, e bo lɔ oxo nɔ ɖi dlagɔn ha. 12 Kanlin tantyantɔn la we ɛcɛ zɛtɛye wɛ e lo zan nɔ le ŋumɛ etɔn. E bo na na ɛmɛ zɛtɛye xeni le nyixɔ la ji ye sɛn kanlin tantyan xena abi xeni tun ma hu-i la, va ku na. 13 Kanlin owegɔ mɛ la, bo jlɛ onu ɖaxo-ɖaxoye nɔ, gbɔɔn bo nɔ na na ozo nɔ jɛ ote sɔn jiŋukunsin a bo jɛ nyixɔ ji, le ŋumɛ na ɛmɛ zɛtɛye. 14 Onu xeye na ye ɖe omɔ ni-i tun ni boo jlɛ le ŋumɛ na kanlin ɖe la ye, e nɔ sɔ ye do blɛ nyixɔ ji tɔ ye ɖu. E nɔ do nyixɔ ji tɔ laye nɔ tun ye boo wasi kanlin xena ye xu dɛnkpwe, e bo mɔ gbɔn va ɛgbɛ la we onutita. 15 Ye na ogbe kanlin owegɔ la tun ni boo na ɛgbɛ kanlin tantyan la we onutita, e mɛ, onutita ba lɔ oxo, a bo na na ye a hu ɛmɛ zɛtɛye xeni ɔn sɛn nɔ ye. 16 Kanlin la nɔ zin ɛmɛye ji gannu-gannu, vikpɛviye kpodo ɛmɛhyɔnye, dɔkunnɔye kpodo ayanɔye, ɛmɛxixɔye kpodo ɛmɛ xeye ni le yeɖe nu ye, na ye a do yi josi ɖe do aɖusilɔ wu alo ŋukɔnnu yetɔnye. 17 E mɛ, ɛmɛ ti ɔn kpewu xɔ onu nɔ gbɔɔn do sa onu nɔ, na e ɔn yi josi la xeni nyi kanlin la we nyikɔ alo akɔnŋuta wemakun xeni sɔgbe kpodo nyikɔ etɔn.
18 Le bwɛ, e hyan onunyinywɛ. Ɛmɛ xeni ɖo zinzin, ni wa akɔnŋuta na kanlin la we nyikɔ. Akɔnŋuta wemakun la sɔ ogbe kpodo ɛgbɛtɔ we nyikɔ. Mi wɛ nyi sandi ɛdɛn ota ɛdɛn ŋukun ɛdɛn (666).