Timɔte kplɔ Pɔlu kpodo Silasi kpo do
16
1 Pɔlu va jɛ Dɛbu, e mɛ godo e bo va yi Lisri. Le blɛ, onukplanvi ɖe le, ye bo nɔ yɔ-ɛ tun Timɔte, e bo nyi nahwe Jwifu ɖe xeni va kan do Xwetɔ la ji we ovi, otɔ ko nyi Jwifu. 2 Nɔvi xɔsetɔ xeye ni le Lisri kpodo Ikonyɔmu ye, nɔ ɖe kunu nywɛ do e wu nɔ. 3 Pɔlu bo jlo na kplɔ-ɛ, mi wɛ, do Jwifu xeye ni le kansin la mɛ ye wu, e bo gbo ada ni-i gbɔxwe, ɖo, ye ɛmɛ zɛtɛye nyɔ-ɛ tun otɔ bo ɔn nyi Jwifu. 4 Le toxo xeye mɛ na ye gbɔn nɔ ye, ogbeta xeye na Yesu we ɛmɛ dindɔnye kpodo agunmɛhyɔn Jeluzalɛmutɔnye sɔ na ye, ye nɔ lɔ ye na xɔsetɔye nɔ, na ye a do zɔn do ye ji. 5 Mi wɛ agun laye lo syɛnxu le xɔse mɛ nɔ, xɔsetɔye bo lo su do e ji nɔ onyihinhɔngbe-onyihinhɔngbe.Gbigbɔ Kinkwɛn kplɔ Pɔlu do yi Masedwanu
6 Xena Gbigbɔ Kinkwɛn gbɛ na ye tun ye boo ká jla Mawu we oxo le Azi we kansinmɛ, ye gbɔn Fliji we kansinmɛ, bo gbɔn Galasi we oto mɛ. 7 Xena ye va yi jɛ Mizi we kansinmɛ, ye jɛ gbagba nɔ bo na do yi Bitini we kansinmɛ, vɔ, Gbigbɔ Yesutɔn ɔn ɖe omɔ na ye. 8 Mi wɛ dɔn, ye gbɔn Mizi la bo va yi jɛ Trowasi. 9 Le ozan mɛ, Pɔlu kpɔn ɖiɖexlɛ ɖe: e kpɔn Masedwanu we otomɛtɔ ɖe, le ote, bo lo ɖe kuku ni-i nɔ tun mɔ: «Va Masedwanu, va kpedo mía wu.» 10 Xena Pɔlu kpɔn ɖiɖexlɛ mɛ la vɔ, zɔnɖokpo mí jlo na yi Masedwanu la, ɖo, mí ɖo kan do e ji tun Mawu bo lo yɔ mí nɔ tun míye boo va yi jla Ɛwɛn Nywɛ la le blɛ.
Lidi trɔ oji mɛ le Filipu we toxo mɛ
11 Mí do otɔjihun le Trowasi, bo zɔn trelele bo va yi jɛ Samɔtrasi we oto mɛ; onyihinhɔngbe etɔn, mí va yi jɛ Nɛyapolisi. 12 Mí lɛ le blɛ bo va yi jɛ Filipu, toxo mɛ la bo le otomimavi tantyan Masedwanutɔn mɛ. Toxo mɛ la mɛtɔye bo ɖo ɛcɛ ɖi Hlɔma we otoviye ha. Mí bo nɔ toxo mɛ la mɛ na azan ovi ɖe. 13 Le Jwifuye we gbɔjwɛzangbe, mi tɔn le toxo la mɛ, bo do va yi otɔ ɖe to, mí bo lo bu-i nɔ tun mí na kpɔn ɛɖɛxoxwe ɖe le blɛ wɛ ha. Mí bo xlɔn onyi, bo lɔ oxo kpodo nyɔnusi xeye ni kpli le blɛ laye. 14 Nyɔnu ɖe le ye mɛ, bo nɔ nyi Lidi, e bo sɔn Tyatili, bo nɔ sa avɔ ovɛ adodweye, bo nɔ vɔ Mawu. E bo lo ɖo oto mí nɔ, Xwetɔ la bo hun oji etɔn, e ba do ɖo tɛ oto, a do se oxo xena Pɔlu lo lɔ nɔ. 15 Ye bo lɛ Mawu we ɛsin na Lidi la kpodo xwedo etɔn kpo. E mɛ godo, e bo yɔ mí bo lɔ tun mɔ: «Na mi kpɔn tun ko bo le ogbeji na Xwetɔ la, mi bo ɖyɛ oxwe tɛye gbe, a bo nɔ blɛ.» E bo zin mía ji taŋu na mí a do yi ogbe.
Ye wle Pɔlu kpodo Silasi kpo do ogankpa mɛ
16 Hwexenu na mí lo sɔn yi ɛɖɛxoxwe nɔ, nyɔnuvi ɛmɛxixɔ ɖe xena dangbwe we gbigbɔ le e mɛ, va kpe mí. Nyɔnuvi mɛ la, nɔ zan gbigbɔ etɔn la a do kan onu na ɛmɛ. Odan mɛ la wɛ e nɔ wa nɔ, bo nɔ do hɛn oho susu va na xwetɔ etɔnye. 17 E bo jɛ ɛtɛ na míye kpodo Pɔlu kpo, e bo do axwa nɔ bo lɔ nɔ tun mɔ: «Ɛmɛ xeye nyi odansɔvi na Mawu Ɖaxo, ye bo lo xlɛ mi hwlɛngan we omɔ nɔ.» 18 Nyɔnuvi la bo wasi onu mɛ la na azan susu. Xena aɖi wle Pɔlu, e trɔ okɔ bo lɔ na gbigbɔ la tun mɔ: «Ko ɖe ogbe do we le Yesu we nyikɔ mɛ tun myɔ boo tɔn le e mɛ.» Gbigbɔ la bo tɔn le e mɛ zɔnɖokpo. 19 Xena nyɔnuvi ɛmɛxixɔ la we xwetɔye, kpɔn tun ye bo ɔn mɔ kpewu na zan-ɛ ke a do kpɔn oho, ye wle Pɔlu kpodo Silasi kpo bo dɔn ye yi dogbaji le otogaye kɔn. 20 Xena ye kplɔ ye yi Hlɔmatɔye we kojoɖotɔ laye kɔn, ye lɔ tun mɔ: «Dahwe xeye lo hlu toxo míatɔn do e wu nɔ; Jwifuye bɛ ye nyi, 21 ye bo lo kplan akɔtanu buye ɛmɛye nɔ. Omɔ ɖiɖe ko le, na mí Hlɔmatɔye na do yi ogbe na akɔtanu mɛ laye gbɔɔn a bo do zɔn do ye ji can.» 22 Ɛmɛ susuye can bo site kpan ŋukɔn Pɔlu kpodo Silasi; Hlɔmatɔye we kojoɖotɔ laye na na ye yi onudido yetɔnye, bo ɖe ogbe tun ye boo do oxa na ye. 23 Xena ye xo ye nywɛɖe vɔ, ye sɔ ye sɔ do ogankpa mɛ, bo lɔ na ogankpacɔtɔ la tun ni boo kpe ŋukunsin do ye wu nywɛɖe. 24 Xena ogankpacɔtɔ la se ogbeɖiɖe mɛ la, e sɔ ye sɔ do ogankpa la mɛ daan, bo do ogan afɔ na ye. 25 Le ozangan weve mɛ mɔsinha, Pɔlu kpodo Silasi kpo lo xo ɛɖɛ nɔ, bo ji kanfu we ohanye na Mawu nɔ, ogantɔ gbokpweye bo lo ɖo oto ye nɔ. 26 Zɔnɖokpo kpoŋu, nyixɔ hunhun taŋu kpo hɔnhlɔn kpo gbɔɔn ogankpa la we dodweye can bo hunhun; le zɔnɖokpo mɛ, ogankpa la we ohɔn zɛtɛye bo hun seŋu, ogantɔ zɛtɛye we kpɛŋubɛye bo hun. 27 Xena ogankpacɔtɔ la fɔn, bo kpɔn ogankpa la we ohɔnye le hunhun, e lyɔ dɛnkpwe etɔn bo ka va yi hu eɖe nɔ, ɖo, e bu-i tun ogantɔ laye si wɛ ha. 28 Vɔ, Pɔlu bo do axwa sinsyɛnxu ɖe bo lɔ tun mɔ: «Ká wa onu nyanyla ɖe kpo ɖiwe, mí ɛmɛ zɛtɛye le bwɛ.» 29 Ogankpacɔtɔ la bo byɔ zogyan, bo hwlɛndo do ɖyɛ ogantɔ laye ji, e bo hunhun nɔ, bo va yi jɛ onyi do afɔ nu na Pɔlu kpodo Silasi. 30 E bo kplɔ ye tɔn-ɛ, bo lɔ na ye tun mɔ: «Ɛmɛ ɖaxoye, ɛlɛ ko na wa, a do kpɔn hwlɛngan?» 31 Ye bo ɖo e wu ni-i tun mɔ: «Kan do Xwetɔ Yesu ji, myɔ kpodo xwedo tɔwe kpo ba kpɔn hwlɛngan.» 32 Ye bo lɔ Xwetɔ la we oxo ni-i, bo mɔ lɔ na ɛmɛ zɛtɛye xeni le oxwe etɔn gbe ye can. 33 Ogankpacɔtɔ la bo kplɔ Pɔlu kpodo Silasi kpo do sɔn le hwemɛ la nu le ozan la mɛ, bo va yi klɔ abi yetɔnye na ye, zɔnɖokpo, ye bo lɛ Mawu we ɛsin na emyɔ kpodo ɛmɛ etɔnye. 34 E bo kplɔ ye do yi oxwe etɔn gbe, bo na ye onuɖuɖu, e bo kpɔn jijwɛ nɔ kpodo xwedo etɔn, ɖo, e kan do Mawu ji.
35 Xena onyi hɔn, Hlɔmatɔye we kojoɖotɔ laye dɔn sɔjaye ɖodan, a do va yi lɔ na ogankpacɔtɔ la tun ni boo ɖe ogan na dahwe mɛ ye. 36 Ogankpacɔtɔ la bo lɔ oxo la na Pɔlu, tun mɔ: «Kojoɖotɔye dɔn ɛmɛye ɖodan tun, ye boo ɖe ogan na mi. Fifi, mi tɔn a bo sɔn le fifa mɛ.» 37 Vɔ, Pɔlu bo lɔ na sɔja laye tun mɔ: «Ye nɔ kojo ma ɖo na mí, bo do oxa na mí le ɛmɛ zɛtɛye we ŋumɛ, míye, xeye ni nyi Hlɔmatɔye, ye bo sɔ mí sɔ do ogankpa mɛ, fifi ye bo ka va ɖe mí tɔn-ɛ le owi mɛ nɔ wɛɛ? Gbeɖe, e ɔn nyi mɔsinha nɔ, ye ŋutɔye ni va, a bo va ɖe mí tɔn-ɛ!» 38 Sɔja laye bo va yi lɔ oxo mɛ laye na kojoɖotɔ laye, ye bo vɔ, ɖo, ye se tun Pɔlu kpodo Silasi kpo bo nyi Hlɔmatɔye. 39 Kojoɖotɔ laye bo va ɖe kuku na ye, e mɛ godo, ye bo ɖe ye tɔn-ɛ le ogankpa la mɛ, bo byɔ ye tun ye boo tɔn le toxo la mɛ. 40 Xena Pɔlu kpodo Silasi kpo tɔn le ogankpa la mɛ vɔ, ye sɔn yi Lidi kɔn, mi wɛ, xena ye kpɔn nɔvi xɔsetɔye, bo na ye ojidido vɔ, ye sɔn.