Pɔlu kpo Silasi kpo yi Tɛsalonika
17
1 Pɔlu kpodo Silasi kpo gbɔn Anfipolisi kpo Apoloni we toxoye mɛ bo va jɛ toxo Tɛsalonikatɔn mɛ. Jwifuye bo ɖo okplityɔn yetɔn do blɛ la. 2 Pɔlu yi okplityɔn mɛ la ɖi lena e nɔ wasi ɖo ha. Jwifuye we gbɔjwɛzan atɔn wɛ e sɔ, ɖe kplɔ ɖe do, bo do jɛ jɛtun kpodo ye sɔn Mawu we oxo la wu. 3 E ɖe e gɔnmɛ na ye nɔ, bo ɖe xlɛ ye nɔ tun Klisu la bo ɖo na ɖu aya, a bo fɔn sɔn oku. E bo lɔ na ye nɔ tun mɔ: «Klisu la wɛ nyi Yesu xe we oxo na ko lɔ na mi nɔ.» 4 Ɛmɛ ɖeye kan do oxo la ji bo kplɔ Pɔlu kpo Silasi kpo do. Ɛmɛ susu gbagbagba xeye ni ɔn nyi Jwifuye, bo nɔ vɔ Mawu ye, kpodo nyɔnu ɛmɛjɔmɛ susu can bo kplɔ ye do. 5 Vɔ, Jwifuye bo jɛ awu hwinwan ji, bo va yi da otovi nyanyla nuvɔnɔ xeye ni nɔ ɖi asa gbɔn omɔ ji nɔ ye. Ye bo va do otogun la, bo hlu toxo la do e wu. Ye fɔn ogu bo yi Jazɔn we oxwegbe, bo va yi kan Pɔlu kpodo Silasi kpo, a do dɔn ye yi otogun la we ŋukɔn. 6 Xena ye ɔn kpɔn ye, ye wle Jazɔn kpo nɔvi xɔsetɔ ɖeye, bo dɔn ye yi toxo la we ogaye kɔn, bo do axwa nɔ bo tun mɔ: «Ɛmɛ xeye wɛ hɛn agla jijɛ va ɛgbɛ la mɛ seŋu, fifi ye va toxo míatɔn mɛ, 7 Jazɔn bo yi ye do oxwe etɔn gbe. Ye ɛmɛ zɛtɛye wɛ nɔ gba osɛn xena xɔlu ɖaxo Hlɔmatɔn do laye, ɖo ye nɔ lɔ tun xɔlu bu bo mɔ le bo nɔ nyi Yesu.» 8 Oxo mɛ laye hlu otogun la kpodo otogaye do e wu. 9 Oho wɛ Jazɔn kpodo xɔsetɔ gbokpweye sɔ ɖo onyi gbɔxwe ye do jo ye do.Pɔlu kpodo Silasi kpo yi Bele
10 Zɔnɖokpo, nɔvi xɔsetɔ laye na na Pɔlu kpodo Silasi kpo sɔn yi Bele le ozan mɛ. Xena ye va yi jɛ toxo la mɛ, ye ɖyɛ Jwifuye we okplityɔn. 11 Jwifu mɛ laye bo ɖo dɔmɛfaa sɔ hugan Tɛsalonikatɔnye. Ye bo yi Mawu we oxo la kpodo akpakpa ɖaxo. Onyihinhɔngbe-onyihinhɔngbe ye nɔ gbeje Mawu we oxo la kpɔn nɔ, a do kpɔn tun oxo na Pɔlu kpodo Silasi lɔ nɔ la, sɔgbe jaa. 12 Ɛmɛ susu le ye mɛ bo kan do Xwetɔ la ji. Nyɔnu ɛmɛjɔmɛ xeye ni nyi glɛkitɔye, kpodo ŋusuglo susuye can, bo kan do Xwetɔ la ji. 13 Vɔ, xena Jwifu Tɛsalonikatɔnye se tun Pɔlu bo jla Mawu we oxo la le Bele can nɔ, ye va blɛ la bo hlu otogun la do e wu, bo do zigidi te. 14 Mi wɛ nɔvi xɔsetɔ laye na na Pɔlu sɔn yi ɛxuto zɔnɖokpo, vɔ, Silasi kpo Timɔte bo ci Bele we toxo la mɛ. 15 Ɛmɛ xeye ni ka va yi ɖo Pɔlu nɔ laye, bo kplɔ-ɛ do gbɔɔn do yi Atɛnu. Pɔlu bo do ɛwɛn na ye tun ye boo lɔ na Silasi kpodo Timɔte kpo tun ye boo va kpɔn he le Atɛnu la le madɛn-madɛn mɛ. E mɛ godo ye bo lɛkɔ.
Pɔlu lɔ Mawu we oxo le Atɛnu
16 Hwexenu na Pɔlu lo nɔ ote kpɔn Silasi kpodo Timɔte kpo le Atɛnu nɔ, oji fyɛ ni-i nɔ do lena toxo la gɔ kpo yɔhweye ɖo. 17 Le Jwifuye we okplityɔn, e nɔ jɛ jɛtun kpo Jwifuye kpodo ɛmɛ xeye ni ɔn nyi Jwifuye vɔ bo nɔ vɔ Mawu ye. Le onyihinhɔngbe-onyihinhɔngbe e nɔ jɛ jɛtun kpodo ɛmɛ xeye na e kpɔn le dogbaji ye can. 18 Ogbɛta xeye ni nyi Epikwitɔyea kpodo Sitoyisitɔyeb we onukplan-ɛmɛtɔ ɖeye can bo jɛ jɛtun kpo-e nɔ. Ɖeye lo kan se nɔ tun mɔ: «Ɛlɛ oxovlolɔtɔ mɛ la lo lɔ nɔ?» Ɖeye bo lɔ nɔ tun mɔ: «E le ɖi tun oto bu mɛ we yɔhweye we oxo wɛ e lɔ nɔ.» Ye lɔ mɔsinha nɔ ɖo, Pɔlu lo jla Yesu kpodo finfɔn sɔn oku we oxo nɔ. 19 Ye kplɔ Pɔlu yi otomɛhyɔnye we ogbɛta xena ye nɔ yɔ tun Alewopaji we ŋukɔn, bo lɔ tun mɔ: «Mí kpewu na nyɔ onu xeni nyi onu yɔyɔ xena o kplan nɔ la? 20 Ɖo mí ɔn se oxo mɛ haye kpɔn, mí bo jlo na kpɔn onu jɛ oxo mɛ laye wu.» 21 Vɔ, Atɛnutɔ zɛtɛye kpo jonɔ xeye ni le Atɛnu we toxo la mɛ ye, o nɔ sɔ oganxixo yetɔnye susu a do lɔ alo a bo mɔ do ɖo oto oxo yɔyɔ xeye ni le oto ji ye. 22 Mi wɛ Pɔlu site le otomɛhyɔn laye mɛ, bo lɔ tun mɔ: «Ŋusunglo atɛnutɔye, ko kpɔn tun sinsɛnnɔye wɛ mi nyi taŋu le onu zɛtɛye mɛ. 23 Ɖo, le hwexenu na ko lo gbɔn toxo míatɔn mɛ nɔ, ko kpɔn yɔhwexɔ miatɔnye, bo mɔ kpɔn ovɔsan we agba ɖe, xe wu na ye wlan do tun mɔ: “Yɔhwe xena ɛmɛ ɖe ɔn nyɔ.” Onu xena mi ɔn nyɔ, vɔ bo lo sɛn nɔ la we oxo wɛ ko lo lɔ na mi nɔ. 24 Mawu xeni ɖo ɛgbɛ la, kpodo onu xeni le e mɛ zɛtɛye, bo nyi Xwetɔ na jiŋukunsin kpodo nyixɔ kpo, e ɔn nɔ nɔ sinsɛnxɔ xena ɛgbɛtɔye wasi mɛ. 25 Ɛmɛ ɖe ɔn nɔ kpe ŋukunsin do e wu ɖi tun e hyan onu ɖe ha, ɖo, emyɔ wɛ nɔ na ɛgbɛ ɛmɛ zɛtɛye, gbigbɔ kpodo onu ɖekpekpe. 26 E na na otogun zɛtɛye xeni tɔn sɔn ɛgbɛtɔ ɖokpo mɛ, jɛ oxwe do nyixɔ la zɛtɛye ji, e bo ɖo ganmɛ vovweye, bo mɔ ɖo odo na nɔtyɔn yetɔnye. 27 Mawu wasi mɔsinha na ɛgbɛtɔye a do kan-ɛ ɖi ŋuvanɔye ha, tanyɔ ye ba va kpɔn-ɛ. Ganke, le oxojɔxo mɛ, Mawu ɔn le dindyɔnnu na ɖokpo-ɖokpo míatɔnye.
28 Ɖo emyɔ mɛ wɛ míye kpɔn ɛgbɛ le, bo yi nɔ, bo gbɔn nɔ; emyɔ bɛ mɔ dɔn na mí do le,
Ɖi lena ohanjitɔ miatɔn ɖeye o lɔ ɖo ha tun mɔ:
“Vikpɛ etɔnye wɛ míye can mí nyi.” 29 Xena e nyi tun Mawu vikpɛye wɛ mí nyi, mí ɔn ɖo na ɖe susu nɔ tun Mawu bo le ɖi sika, alo oganwe alo ɛkpɛn we yɔhweye xena ɛgbɛtɔye wasi dogbɔn aɖaŋu wiwa kpodo susu yetɔnye mɛ o. 30 Vɔ, Mawu myɔ ŋukunsin do onu xeye na ɛgbɛtɔye wasi le manyɔ-ɛ we ganxixoye mɛ, bo lo lɔ nɔ fifi na ɛgbɛtɔ zɛtɛye, le ofi ɖekpekpe na ye le tun ye boo ɖɔli jijɔ. 31 Ɖo, e ɖo azan ɖe, a do ɖo kojo na ɛgbɛ la gbɔn ɛhwɛ jijwɛ ji, dogbɔn ɛmɛ xena e o can la ji. Mawu fɔn ɛmɛ cincan mɛ la sɔn oku, bo do ɖe xlɛ tun mi bɛ bo nyi ɛhwɛɖɔtɔ xena he bo can la oxojɔxo».
32 Xena ye se Pɔlu lɔ finfɔn sɔn oku we oxo, ɛmɛ ɖeye lo ko-e nɔ, ɖeye bo lɔ tun mɔ: «Ogan bu mɛ can, o ba lɔ oxo do e wu na mí.» 33 Mi wɛ Pɔlu lɛ le ye kɔn. 34 Ganke, ɛmɛ ɖeye bo tɛ do e wu, bo kan do Xwetɔ la ji. Ɛmɛ mɛ laye we ɖeye nyi Denisi xeni le otomɛhyɔn laye mɛ, kpodo nyɔnusi xe we nyikɔ ni nyi Damalisi, kpodo ɛmɛ buye can.