Ye dɔn onu do ada gbigbo we oxo wu
15
1 Ɛmɛ ɖeye sɔn Yude we oto mɛ, bo va Antyɔcu, bo kplan onu nɔvi xɔsetɔye nɔ tun mɔ: «Na ye ɔn gbo ada na mi ɖi lena Mɔyizi we akɔnu la byɔ ɖo ha, mi ɔn kpewu na kpɔn hwlɛngan.» 2 Pɔlu kpodo Banabasi kpo bo gbɛ oxo mɛ la, e bo hɛn onu dindɔn taŋu do va yee kpodo ɛmɛ laye mɛ. Ye bo sɔ ogbeta tun, Pɔlu kpodo Banabasi, kpodo xɔsetɔ buye, a bo yi Jeluzalɛmu, le ɛmɛ dindɔn laye kpodo agunmɛhyɔnye kɔn, na ye a do va yi lɔ oxo mɛ la. 3 Agun Antyɔcutɔn bo sɔ ye ɖodan, ye bo gbɔn Fenisi kpodo Samali we kansinye mɛ, bo lɔ lena ɛmɛ xeye ni ɔn nyi Jwifuye trɔ ji mɛ ɖo, e bo do jijwɛ ɖaxo ɖe na nɔvi xɔsetɔ zɛtɛye. 4 Xena ye va yi jɛ Jeluzalɛmu, agun la, kpodo ɛmɛ dindɔnye kpodo agunmɛhyɔnye, yi ye, ye bo lɔ onu zɛtɛye xena Mawu wasi dogbɔn ye ji ye, na ye.Ɛmɛ dindɔnye gbo ɛmɛ xeye ni ɔn nyi Jwifuye we adagbigbo we oxo le Jeluzalɛmu
5 Vɔ, Falizitɔ ɖeye xeni va kan do Yesu ji ye, bo lɔ nɔ tun ye bo ɖo na gbo ada na xɔsetɔ xeye ni ɔn nyi Jwifuye, a bo mɔ lɔ na ye tun, ye bo ɖo na zɔn do Mɔyizi we Osɛn la ji. 6 Yesu we ɛmɛ dindɔn laye kpodo agunmɛhyɔnye, bo kpli a do gbeje oxo mɛ la kpɔn. 7 Ye bo dɔn onu na oganxixo susu, e mɛ godo Piyɛ bo site bo lɔ tun mɔ: «Nɔvyee, mi nyɔ-ɛ tun, e dɛn fi, na Mawu do can-a le mia mɛ, na ma do jla Ɛwɛn Nywɛ la na ɛmɛ xeye ni ɔn nyi Jwifuye, ye ba do se a bo do kan do Yesu ji. 8 Mi wɛ, Mawu xeni nyɔ onu xeni le ojiye mɛ, na ye Gbigbɔ Kinkwɛn ɖi míye can ha, bo do ɖe kunu tun he bo yi ye. 9 Mawu ko wasi ovotintɔn ti le míye kpodo ye kpo mɛ, dogbɔn xɔse mɛ e na na oji yetɔn kɔn. 10 Fifi ɖe, ɛlɛ jɔ na mi do tɛn Mawu kpɔn nɔ, bo do sɔ okɔnugban xena mía dagbwaye kpodo míye ŋutɔye ɔn kpewu hɛn, bo sɔ do okɔ na onukplanviye nɔ? 11 Vɔ, mí kan do e ji tun, dogbɔn Xwetɔ Yesu we ɛfɛnu mɛ, wɛ mí kpɔn hwlɛngan le ɖi yee can ha».
12 Ɛmɛ xeye ni va kple la zɛtɛye seŋu bo bɔ onu xwii, bo ɖo oto Pɔlu kpodo Banabasi kpo, ye bo lɔ lena Mawu wasi onu kpaca-ɛmɛye kpodo ŋudandonuye ɖo dogbɔn ye ji le ɛmɛ xeye ni ɔn nyi Jwifuye mɛ. 13 Xena Pɔlu kpodo Banabasi lɔ oxo vɔ, Jaki bo yi oxo bo lɔ tun mɔ: «Nɔvi xɔsetɔye, mi ɖo oto-o! 14 Simɔ lɔ lena sɔn titɔ e ji gbɔɔn, Mawu can otogun xeni nyi etɔn le ɛmɛ xeye ni ɔn nyi Jwifuye mɛ ɖo. 15 Onu mɛ laye bo sɔgbe kpodo oxo xena oxolɔɖonyitɔye lɔ, ɖo, ye wlan le Mawu we oxo la mɛ tun mɔ:
16 “E mɛ godo, ko na trɔ va,
A bo trɔ gbá oxwe Daviditɔn xeni mu la,
Ofi xeye ni hɔ na oxwe la, ko na mɔ trɔ gbá ye,
A bo fɔn ye ɖote,
17 Na ɛgbɛtɔ gbokpweye a do kan Xwetɔ la,
Ɛɛn, otogun zɛtɛye xena ko yɔ tun ye bo na nyi tɛyee.
Onu xena Xwetɔ la lɔ nɔ mɛ
E wasi tito mɛ laye
18 Ɛmɛye bo nyɔ-ɛ sɔn saa xixo-xixo gbɔɔn do yi.”»
19 Jaki bo mɔ lɔ tun mɔ: «Ko yi ogbe tun ɛmɛ ɖe ni ká mɔ do tagba na ɛmɛ xeye ni ɔn nyi Jwifuye, xeni lɛkɔ va Mawu kɔn nɔ ye, 20 vɔ, ye na wlan ɖodan ye tun, ye boo ká ɖu olan xeye na ɛmɛye do san ovɔ na yɔhweye o, ɖo onu ɖuɖyu wɛ, ye ni boo ɖe yeɖe ɖo ovo le aledida wu, ye ni boo ká mɔ ɖu kanlin xeye na ye tu gbigbɔ do oxo na bo do hu ye, mɔsinha ke ye ni boo ká mɔ ɖu ɛhun. 21 Ɖo, sɔn mía dagbwaye we hwenu gbɔɔn, ye nɔ kplan Mɔyizi we Osɛn la ɛmɛye nɔ, gbɔn toxo ɖokpo-ɖokpo mɛ, ye bo nɔ xlɛ-ɛ nɔ le okplityɔnye le gbɔjwɛzan ɖekpekpe gbe».
Ye wlan wema ɖodan xɔsetɔ xeye ni ɔn nyi Jwifuye
22 Mi wɛ, agun la seŋu, ɛmɛ dindɔn laye kpodo agunmɛhyɔnye, can Judi xena ye mɔ nɔ yɔ tun Basabasi kpodo Silasi le ye mɛ, bo sɔ ɖodan Antyɔcu, ye ba kplɔ Pɔlu kpodo Banabasi do, a do yi toxo mɛ la mɛ. Nɔvi xɔsetɔye bo nɔ ɖo sisi na Basabasi kpodo Silasi la taŋu. 23 Ye bo wlan wema xe do asi na ye:
«Ɛmɛ dindɔnye kpodo agunmɛhyɔnye, míye, xeni nyi mianɔvyɛye, lo do ogbe na mía nɔvyɛ xɔsetɔye xeni ɔn nyi Jwifuye nɔ, mi ɛmɛ xeye ni le Antyɔcu, bo mɔ le Sili kpodo Silisi we kansinye mɛ can. 24 Mí se tun ɛmɛ ɖeye bo sɔn mía kɔn, ɛmɛ xeye na mí ɔn na ɛcɛ ti, ye bo flu mi kpodo oxo lilɔ yetɔnye, bo do sɔ mi do onulilo mɛ. 25 Mi wɛ dɔn, xena mí sɔ ogbeta le ogbenɔkpɔ mɛ, mí can ɛmɛye sɔ ɖodan mi, bɔ do nɔvi wannyinɔ Pɔlu kpodo Banabasi wu. 26 Pɔlu kpodo Banabasi laye, sɔ ɛgbɛ yetɔnye sɔ san ovɔ, na Xwetɔ Yesu Klisu we odan la. 27 Mi wɛ, mí sɔ Judi kpodo Silasi sɔ ɖodan, yee na lɔ onu xena mí wlan la na mi kpodo onu yetɔnye kpo. 28 Ɖo, Gbigbɔ Kinkwɛn kpodo míye kpo sɔ ogbeta tun mí bo ɔn do agban kpinkpɛn ti do okɔ na mi nɔ, sɔ hugan onu xeye ni le vivɛɖe ye. Mi wɛ nyi tun mɔ: 29 “Mi ká mɔ ɖu olan xena ye do san ovɔ na yɔhwe ɖe o, mi ká mɔ ɖu ɛhun, mi ká mɔ ɖu kanlin xeye na ye tu gbigbɔ do oxo na bo do hu ye, mi bo ká mɔ wa kpaco o. Na mi zɔn do onu mɛ laye ji nɔ, be mi bo wasi ɖo nywɛɖe. Mí a va kpe o».
30 Ye bo ɖe ogbe na ɛmɛ xeye na ye sɔ ɖodan laye, ye bo sɔn yi Antyɔcu, bo kpli agunvi laye le toxo mɛ la mɛ, bo sɔ wema la na ye. 31 Ye bo xlɛ-ɛ, bo kpɔn jijwɛ, ɖo e na ye ojidido. 32 Judi kpodo Silasi kpo, xeye ni nyi oxolɔɖonyitɔye can, bo lɔ oxo susu na nɔvi xɔsetɔ laye bo do na ye ojidido na ye a do li odo le xɔse mɛ. 33 Xena azan ovi ɖe va yi vɔ, nɔvi xɔsetɔye bo ɖe ogbe na Judi kpodo Silasi kpo na ye a do sɔn yi ɛmɛ xeye ni dɔn ye ɖodan kɔn, le fifa mɛ. 34 [Vɔ, Silasi bo sɔ ogbeta a do ci Antyɔcua.] 35 Pɔlu kpodo Banabasi kpo bo nɔ Antyɔcu, yee kpodo ɛmɛ susu buye can bo lo kplan onu ɛmɛye nɔ, bo jla Xwetɔ la we oxo nɔ.
Pɔlu kpodo Banabasi klan
36 Azan ovi ɖe godo, Pɔlu lɔ na Banabasi tun mɔ: «Mí a trɔ a va yi kan nɔvi xɔsetɔye kpɔn le toxo xe zɛtɛye mɛ na mí jla Xwetɔ la we oxo le ye, a bo do kpɔn lena ye le ɖo.» 37 Banabasi bo jlo tun Jan xena ye mɔ nɔ yɔ tun Maki a kplɔ ye do; 38 vɔ Pɔlu bo kpɔn tun e bo ɔn ɖo na nyi ɖo mɔsinha, ɖo, Jan la jo ye do sɔn Panfili we kansinmɛ gbɔɔn, e ko kplɔ ye do hwexenu na ye lo wa Mawu we odan nɔ. 39 Pɔlu kpodo Banabasi kpo bo dɔn onu taŋu, gbɔɔn ye ɛmɛ owe laye bo ma omɔ. Banabasi bo kplɔ Jan-Maki, ye bo ɖyɛ otɔjihun mɛ, a do yi Ciplu we oto mɛ. 40 Pɔlu bo can Silasi, xena nɔvi xɔsetɔye byɔ Xwetɔ la we ɛfɛnu ni-i vɔ, e sɔn, 41 bo gbɔn Sili kpodo Silisi we kansinye mɛ, bo do do hɔnhlɔn agunye nɔ.