Pɔlu kpodo Banabasi kpo jla Mawu we oxo le Ikonyɔmu we toxo mɛ
14
1 Le Ikonyɔmu can, Pɔlu kpodo Banabasi kpo ɖyɛ Jwifuye we okplityɔn, bo lɔ oxo gbɔɔn Jwifuye kpodo ɛmɛ xeye ni ɔn nyi Jwifuye, susu gbagbagba bo kan do Xwetɔ la ji. 2 Vɔ, Jwifu ɖeye xeni gbɛ tun heye bo ɔn kan do Xwetɔ la ji nɔ ye, bo va yi do ɛmɛ xeye ni ɔn nyi Jwifuye, na ye a do ɖe susu nyanyla do kpan ŋukɔn nɔvi xɔsetɔye. 3 Do e mɛ la wu, Pɔlu kpodo Banabasi bo nɔ Ikonyɔmu na azan susu. Ye bo nɔ lɔ oxo nɔ kpodo ojiɖiɖe xena ye ɖo le Xwetɔ la mɛ. Xwetɔ la bo nɔ ɖe kunu na ɛfɛnu we oxo etɔn nɔ gbɔn onu kpaca-ɛmɛye kpodo ŋudandonuye xeni nɔ jɔ nɔ dogbɔn alɔ yetɔnye mɛ. 4 Ɛmɛ xeye ni le toxo la mɛ ye bo ma. Ɛmɛ ɖeye le Jwifuye ji, gbokpweye bo le ɛmɛ dindɔn laye ji. 5 Ɛmɛ xeye ni ɔn Jwifuye kpodo Jwifuye kpodo oga yetɔnye bo wasi tito a do do aya na Pɔlu kpodo Banabasi kpo, a bo mɔ do tɔ ɛkpɛn ye a bo do hu ye, 6 xena ye ɛmɛ owe laye mɔ onu jɛ e wu, ye si, bo sɔn yi toxo xeye ni nyi Lisri, Dɛbu kpodo ofi xeni lɛ do ye, mɛ, le Likawoni we kansinmɛ. 7 Ye bo jla Ɛwɛn Nywɛ la nɔ le blɛ laye can.Mawu gɔ adɔn na kplibɔnɔ ɖe dogbɔn Pɔlu kpodo Banabasi ji
8 Le Lisri we toxo la mɛ, dahwe ɖe le, e ko kpewu nɔ nɔ ote, ɖo, afɔ kplibɔ ni-i sɔn gbe xe gbe na ye ji-i gbɔɔn, e ko zɔn zɔnlin kpɔn. 9 E bo lo ɖo oto Pɔlu we oxo nɔ, Pɔlu la kpɔn-ɛ nɔ trululu, bo kpɔn tun e bo ɖo xɔse a do kpɔn hwlɛngan. 10 Mi wɛ, e lɔ ni-i kpodo ogbe sinsyɛnxu ɖe tun mɔ: «Site, a bo nɔ ote le afɔ tɔweye ji.» Dahwe la bo site hayaŋu bo jɛ zɔnlin zinzɔn ji. 11 Xena otogun la kpɔn onu xena Pɔlu wasi, ye do Likawonitomɛ we ogbe kpo axwa kpo bo tun mɔ: «Yɔhweye do ɛgbɛtɔ agbaza, bo jɛ ote va mía kɔn.» 12 Ye bo ɖo yɔhwe nyikɔye na ye, bo yɔ Banabasi tun Zesi, vɔ, ye bo yɔ Pɔlu tun Ɛlumɛsi, ɖo, emyɔ wɛ nɔ lɔ oxo do ye ɛmɛ owe laye nua. 13 Yɔhwe Zesi la we oxɔ bo le toxo la we agbo mɔnu. Ovɔsantɔ yɔhwe mɛ la tɔn, bo hɛn onyisu xeye na ye ɖo acɔ na kpodo flawaye kpo do va yɔhwexɔ la kɔn. Emyɔ kpodo otogun la jlo na san ovɔ na Pɔlu kpodo Banabasi kpo. 14 Xena Pɔlu kpodo Banabasi kpo se oxo mɛ la, ɖokpo-ɖokpo yetɔn vunb awu ɖaxo xeni le okɔ na ye, ye bo do odun do ɖyɛ otogun la mɛ, bo do axwa tun mɔ: 15 «Mía nɔvyɛye, ɛlɛ jɔ na mi do wasi mɔsinha nɔ? Ɛgbɛtɔ ke wɛ mí nyi ɖi miye can ha, Ɛwɛn Nywɛ xena mí jla na mi nɔ, wɛ nyi tun mɔ, mi lɛkɔ le onu vɔvɔ mɛ ye tɛ, a bo trɔ kpan ŋukɔn Mawu ɛgbɛ-ɛgbɛ la. Emyɔ wɛ ɖo jiŋukunsin, nyixɔ, ɛxu kpodo onu zɛtɛye xeni le ye mɛ ye. 16 Le dagbo-dagboye we hwenu, e jo otogun zɛtɛye do, ye bo sɔ omɔ yetɔnye ɖokpo-ɖokpo. 17 Ganke, e ɔn dokpo kunu ma ɖe do onu xena e nyi wu, dogbɔn onywɛ wiwa etɔnye mɛ. E nɔ na oju nɔ ja sɔn jiŋukunsin, ɛji bo nɔ jɛ na mi, onuɖuɖu bo nɔ le mia si ganji, mi bo nɔ le jijwɛ mɛ taŋu.» 18 Pɔlu kpodo Banabasi lɔ mɔsinha ganke, e ɔn fa gbɔxwe otogun la do jo ovɔ xena ye ka san na ye nɔ la, do.
19 E mɛ godo, Jwifu ɖeye sɔn Antyɔcu kpodo Ikonyɔmu we toxoye mɛ, bo dɔn otogun laye do tito yetɔn mɛ, ye bo tɔ ɛkpɛn Pɔlu a do hu-i. Mi wɛ ye dɔn-ɛ tɔn le toxo la mɛ, bo bu-i tun e bo ku wɛ ha. 20 Vɔ, hwexenu na onukplanvi laye lɛdo-e, e site, bo trɔ ɖyɛ toxo la mɛ. Onyihinhɔngbe etɔn, emyɔ kpodo Banabasi kpo bo sɔn yi Dɛbu.
Pɔlu kpodo Banabasi trɔ va sɔn yi agun yetɔn mɛ le Antyɔcu
21 Xena ye jla Ɛwɛn Nywɛ la le Dɛbu, bo do na na ɛmɛ susu trɔ zun onukplanvi, ye trɔ sɔn yi Lisri, Ikonyɔmu kpodo Antyɔcu we toxoye mɛ. 22 Ye bo do hɔnhlɔn onukplanvi laye, bo do zozo lanmɛ na ye nɔ, na ye a do nɔ xɔse la mɛ, ye bo lɔ na ye nɔ tun mɔ: «Mí ɖo na gbɔn vivɛsise susu mɛ a bo do ɖyɛ Mawu we Xɔluɖuɖu la mɛ.» 23 Le agun ɖokpo-ɖokpo mɛ, ye bo can agunmɛhyɔnye na ye, mi wɛ, xena ye bla onu bo xo ɛɖɛ vɔ, ye sɔ ye sɔ do alɔ mɛ na Xwetɔ la xe ji na ye kan do la.
24 Ye bo gbɔn Pisidi we kansinmɛ, bo va jɛ Panfili we kansinmɛ. 25 Xena ye lɔ Mawu we oxo la le Pɛji vɔ, ye sɔn yi Atali. 26 Blɛ la wɛ, ye ɖyɛ otɔjihun mɛ le a do sɔn yi Antyɔcu, toxo xe mɛ na ye sɔ ye sɔ ɖo onyi le, na ye a do wa odan xena ye o wasi fifi. 27 Xena ye va yi jɛ Antyɔcu la, ye kpli agun la, bo lɔ onu xe zɛtɛye na Mawu wasi dogbɔn ye ji na ye, bo mɔ lɔ lena Mawu hun xɔse we ohɔn na ɛmɛ xeye ni ɔn nyi Jwifuye can ɖo. 28 Ye bo nɔ onukplanvi laye kɔn na azan susu le toxo mɛ la mɛ.