Gbigbɔ Kinkwɛn can Banabasi kpodo Solu kpo
13
1 Le Antyɔcu we agun ji, oxolɔɖonyitɔ kpo onukplan-ɛmɛtɔ ɖeye le. Ɛmɛ mɛ laye xɛn: Banabasi, Simɛnyɔ xena ye sɔ nyikɔ na tun Ɛmɛwi, Liswisi Silɛnu we toxomɛtɔ, Solu kpodo Manayɛnu xe kpo Elodu ni hwɛn do okpɔ. Elodu mɛ la wɛ ɖu xɔlu le Galile we kansinmɛ saa. 2 Gbeɖokpo, le hwexenu na ye lo sɛn Xwetɔ la nɔ, bo lo bla onu nɔ, Gbigbɔ Kinkwɛn lɔ na ye tun mɔ: «Mi sɔ Banabasi kpodo Solu kpo ɖo ovo na-a, na odan xena ko yɔ ye na.» 3 Mi wɛ, xena ye bla onu bo xo ɛɖɛ vɔ, ye ɖo alɔ ota na Banabasi kpodo Solu kpo, bo jo ye do, ye bo sɔn.Banabasi kpodo Solu kpo yi Ciplu
4 Xena Gbigbɔ Kinkwɛn dɔn Banabasi kpodo Solu kpo ɖodan, ye va yi Selesi, blɛ wɛ ye ɖyɛ otɔjihun mɛ le bo do sɔn yi otɔdodomɛ we oto xena ye nɔ yɔ tun Ciplu mɛ. 5 Xena ye va Salaminu, ye jɛ Mawu we oxo jijla ji gbɔn Jwifuye we okplityɔnye. Jan-Makia bo kplɔ ye do, a do kpedo ye wu. 6 Ye gbɔn otɔdodomɛ we oto la mɛ seŋu gbɔɔn bo yi Pafosu. Blɛ, ye va yi kpɔn majikiwasitɔ ɖe le, nyikɔ etɔn bo nɔ nyi Ba-Yesu, e bo nyi Jwifu. Oxolɔɖonyitɔ ojokantɔ wɛ e nyi. 7 Dahwe xe la bo nɔ nɔ oga otɔdodomɛ we oto la tɔn kɔn. Oga mɛ la nɔ nyi Sɛjiwusi Polwisi, bo nyi zinzinnɔ. Oga xe yɔ Banabasi kpodo Solu kpo ɖo e jlo na se Mawu we oxo. 8 Vɔ Elimasi majikiwasitɔ la, (mɔsinha wɛ ye nɔ yɔ Ba-Yesu la le glɛkigbe mɛ) site do ye wu, bo glɔn omɔ na oga la nɔ, e ko mɔ do kan do Yesu ji nɔ. 9 Mi wɛ Solu, xena ye mɔ nɔ yɔ tun Pɔlu, xeni gɔ kpo Gbigbɔ Kinkwɛn, kpɔn Elimasi la nɔ trululu, 10 bo lɔ tun mɔ: «Ayixa gɛdɛ-gɛdɛ kɛɖɛ wɛ le siwe, o bo nyi danuwatɔ kpligidi, bo nyi lɛgba vyɛ. O bo mɔ nyi ɛgbɛ jijwɛ we kɛntɔ. Gbɔɔn do yi ogan ŋukɔ mɛ lɛ o na do avaja Xwetɔ la we tito nwyɛye mɛ jɛ? 11 Fifi, Xwetɔ la we alɔ jɛ wu we, o na vaŋu, o ko mɔ kpɔn ohwe nɔ gbɔɔn do jɛ hweɖenu.» Le e tɛnxo zɔnɖokpo, ŋumɛ do vulvu na Elimasi cuɖu-cuɖu, e bo vaŋu. E bo lɛto nɔ, bo do kan ɛmɛ xeni na hɛn alɔ ni-i nɔ. 12 Xena oga la kpɔn onu xeni jɔ la, e kan do Xwetɔ la ji, ɖo onu xena ye kplan-ɛ do Xwetɔ la wu, jɛŋu ni-i taŋu.
Pɔlu kpo Banabasi kpo yi Antyɔcu le Pisidi we kansimɛ
13 Pɔlu kpodo ɛmɛ xeye ni kplɔ-ɛ do ye, va do otɔjihun sɔn Pafosu, bo va yi jɛ Pɛji le Panfili we kansimɛ. Jan-Maki lɛ le ye kɔn le blɛ, bo do sɔn yi Jeluzalɛmu. 14 Ɛmɛ gbokpweye bo mɔ wle omɔ sɔn Pɛji gbɔɔn bo yi Antyɔcub le Pisidi we kansimɛ. Le gbɔjwɛzan Jwifuyetɔn gbe, ye ɖyɛ Jwifuye we okplityɔn, bo xlɔn onyi. 15 Xena ye xlɛ onu le Osɛn kpodo oxolɔɖonyitɔye we wemaye mɛ vɔ, okplityɔn la we ogaye bo na na ye va yi lɔ na ye tun mɔ: «Nɔvyee mi, na e nyi tun mi ɖo oxo ɖe bo na do do zozo lanmɛ na otogun la, mi bo lɔ.» 16 Pɔlu site, bo wasi alɔ na ye, bo tun mɔ: «Miye Izrayɛli vikpɛye, kpodo ɛmɛ gbokpwe xeye ni nɔ vɔ Mawu ye, mi ɖo oto. 17 Izrayɛli we otogun xe we Mawu, can mía dagbwaye, bo na na otogun la ji do e ji le hwexenu na ye nyi jonɔ le Ejiputi we oto mɛ. E bo va ɖe ye tɔn-ɛ kpodo alɔ sinsyɛnxu etɔn. 18 E do oji bo hɛn ye na oxwe kanɖe mɔsinha le zogbeji. 19 Xena e crɔn otogun acowe le Kana we oto mɛ vɔ, e sɔ nyixɔ yetɔn sɔ na Izrayɛli vikpɛye ɖi cinɔ ha, 20 Onu mɛ la zɛtɛye bo jɔ na oxwe sandi ɛnɛ ota atun mɔsinha.
E mɛ godo, e va ɖo ɛhwɛɖɔtɔye do mía dagbwaye nu, gbɔɔn va jɛ oxolɔɖonyitɔ Samyɛli ji. 21 E mɛ godo, ye va byɔ xɔlu, Mawu bo sɔ Sawilu do ɖo xɔlu na ye na oxwe kanɖe. Sawilu la bo nyi Kisi vyɛ, e bo tɔn sɔn Bɛnyaminu we akɔta mɛ. 22 Xena Mawu ɖe okpo le agɔ na Sawilu la vɔ, e sɔ Davidi do ɖo xɔlu na ye. E bo ɖe kunu do e wu tun mɔ: “Ko kpɔn Davidi Jese vyɛ, e bo sɔgbe kpodo ojlo tɛye, e na wasi onu xe zɛtɛye na ko jlo ye.” 23 Mi wɛ Mawu can ɛmɛ ɖokpo le Davidi we jijimɛviye mɛ, bo do ɖo hwlɛngantɔ na Izrayɛli ɖi lena e fyan jɔgbe etɔn ɖo ha, ɛmɛ mɛ la wɛ nyi Yesu. 24 Vɔ, keŋu gbɔxwe e na do va, Jan lɔ oxo na Izrayɛli we otogun la zɛtɛye, ye ba do ɖɔli jijɔ a bo lɛ Mawu we ɛsin. 25 Mi wɛ, hwexenu na Jan lo vɔ odan etɔn nɔ, e lɔ nɔ tun mɔ: “Onu lɛ mi bu-i nɔ tun ko nyi? Ko ɔn nyi ɛmɛ xena mi lo tre kpɔn nɔ la. Vɔ mi ɖo oto: ɛmɛ mɛ la le godo bo gbɔn nɔ, ko ɔn jɛ bo na do tun afɔkpakanye le afɔ ni-i vɔvɔ can”.
26 Nɔvi xɔsetɔye, mi ɛmɛ xeye ni jɔ sɔn Ablaxamu we okunkan mɛ ye, kpodo ɛmɛ gbokpwe xeye ni nɔ vɔ Mawu ye, míye wɛ ye ɖo hwlɛngan we oxo mɛ la ɖodan. 27 Ganke, Jeluzalɛmutɔye kpodo oga yetɔnye kpo, ɔn nyɔ ɛmɛ xena Yesu nyi, ye ko se gɔnmɛ na oxolɔɖonyitɔye we oxo xena ye nɔ xlɛ nɔ le gbɔjwɛzangbe tɛgbɛ. Dogbɔn ɛhwɛ xena ye ɖɔ ni-i ji, ye sɔ oxo mɛ laye do va cicɛ mɛ. 28 Ye ɔn kpɔn oxo ti bo na do ɖɔ oku hwɛ ni-i, ganke, ye bo byɔ Pilati tun ni boo na na ye a hu-i. 29 Xena ye wasi onu xeye na wiwlan laye lɔ do e wu ye vɔ, Yesu we hadweye va ɖe-e jɛ ote sɔn otinsoga ji, bo sɔ-ɛ do yɔgun mɛ. 30 Vɔ Mawu bo fɔn-ɛ sɔn oku. 31 Le azan susu gblamɛ, e ɖe eɖe sɔ xlɛ ɛmɛ xeye ni kplɔ-ɛ do sɔn Galile we kansinmɛ gbɔɔn do va yi jɛ Jeluzalɛmu ye. Fifi ɛmɛ mɛ laye bo nyi kunuɖetɔ etɔnye le Izrayɛli we otogun la mɛ. 32 Mi wɛ míye ŋutɔ, mí jla Ɛwɛn Nywɛ la na mi nɔ tun, jɔgbe xena Mawu fyan na mía dagbwaye, 33 e na na e cɛ na mí ɛmɛ vikpɛ etɔnye, bo do fɔn Yesu sɔn oku ɖi lena ye wlan ɖo le Ohan jiji we wema ota owegɔ mɛ tun:
“Myɔ wɛ nyi ovi tɛye,
Bɛ sɔn egbe mɔ wɛ nyi otɔ na we”.
34 Mawu o lɔ saa tun he bo na fɔn-ɛ sɔn oku, agbaza etɔn ko mɔ va nyɔ ke le yɔgun mɛ nɔ gbeɖe. Mi la wɛ Mawu lɔ, bo do tun:
“Ko na na mi dona kinkwɛnye, xeye ni na cɛ le dandan mɛ.
Xeye we jɔgbe na ko fyan na Davidi.”
35 E bo mɔ lɔ le ofi bu le winwlan la mɛ tun mɔ:
“O ɔn yi ogbe na ɛmɛ kinkwɛn tɔwe nyɔ le yɔgun mɛ nɔ.”
36 Le hwexenu na Davidi nɔ ɛgbɛ, bo wasi ojlo Mawutɔn, Mawu va yɔ-ɛ, ye bo ɖi-i do ofi xena ye ɖi dagbwaye do, ocɔ etɔn bo nyɔ le yɔgun mɛ. 37 Vɔ, ɛmɛ xena Mawu fɔn sɔn oku, agbaza etɔn ɔn nyɔ. 38 Nɔvyee mi, mi ɖo na nyɔ-ɛ tun: mí jla na mi nɔ tun dogbɔn Yesu la ji mi na yi onu nyanylaye we sisɔ kɛ. Mi ɔn kpewu na nyi ɛmɛ jijwɛ le ŋumɛ na Mawu dogbɔn Osɛn xena e na Mɔyizi ji. 39 Vɔ, ɛmɛ ɖekpekpe xeni kan do Yesu ji e trɔ zun ɛmɛ jijwɛ le ŋumɛ na Mawu. 40 Mi wɛ dɔn, mi cɔ miaɖe, na oxo xena oxolɔɖonyitɔye lɔ, ko mɔ va jɔ do mia ji nɔ.
41 Ye lɔ tun mɔ: “Mi kpɔn, mi ɛmɛ xeye ni nɔ dovɔn ɛmɛ ye,
Ni kpaca do mi, na mi a bu!
Ɖo le hwe miatɔn nu, ko na wa odan ɖe,
Na ɛmɛ ɖe mɔ do va xo gbexo etɔn na mi can, mi ɔn kan do e ji nɔ gbeɖe”».
42 Xena Pɔlu kpodo Banabasi kpo tɔn le okplityɔn la, ɛmɛ laye bo ɖe kuku na ye ŋuklɛn-ŋuklɛn tun ye boo mɔ trɔ va le gbɔjwɛzan xeni gbɔn nɔ gbe, a bo mɔ do va lɔ oxo do oxota mɛ la ke ji. 43 Okpli la godo, Jwifuye kpodo ɛmɛ xeye ni va kplɔ Jwifuye we osɛn do nɔ ye, kplɔ Pɔlu kpodo Banabasi do. Ye bo jɛ jɛtun kpodo ɛmɛ xeye ni kplɔ ye do laye nɔ, bo do hɔnhlɔn ye nɔ tun ye boo tɛ do Mawu we ɛfɛnu wu.
Pɔlu kpo Banabasi kpo lɔ oxo na ɛmɛ xeye ni ɔn nyi Jwifuye
44 Le Jwifuye we gbɔjwɛzan xeni kplɔ-ɛ do gbe, toxo la mɛtɔ zɛtɛye seŋu wɛ tun ma tɔn, ye bo va kple a do se Mawu we oxo. 45 Xena Jwifuye kpɔn ɛmɛ susu mɛ laye, ye bɛ ɛwu hwihwan, bo tɔ ota te na oxo etɔn nɔ, bo zun-i nɔ. 46 Kpo ojiɖiɖe kpo Pɔlu kpodo Banabasi lɔ na ye tun mɔ: «Miye wɛ nyi ɛmɛ tantyantɔn xeye na ye ɖo na lɔ Mawu we oxo la na ye, vɔ, xena mi lo gbɛ nɔ, bo kpɔn nɔ tun heye bo ɔn jɛ na Ɛgbɛ Mavɔmavɔ la, mi kpɔn, míye, mí na trɔ, a bo sɔn yi ɛmɛ xeye ni ɔn nyi Jwifuye kɔn. 47 Ɖo, odan xena Xwetɔ la sɔ do asi na mí xɛn:
“Ko sɔ we sɔ ɖo nyi na do nyi kinklɛn na otogun xeye ni ɔn nyi Jwifuye,
A bo do jla hwlɛngan we oxo la gbɔɔn do yi nyixɔ la we vivɔnu zɛtɛye”».
48 Xena ye ɛmɛ xeye ni ɔn yi Jwifuye se oxo mɛ la, ye kpɔn jijwɛ nɔ, bo do kanfu Xwetɔ la we oxo nɔ. Ɛmɛ xeye na Mawu o can na Ɛgbɛ Mavɔmavɔ ye, kan do Xwetɔ la ji. 49 Xwetɔ la we oxo bo gbakpe nɔ gbɔn oto la mɛ seŋu. 50 Vɔ Jwifuye do toxo la we ɛmɛjɔmɛye kpodo nyɔnusi xeye ji na ŋukunsin le ye, xeye ni nɔ vɔ Mawu ye, ye bo ɖe ofun na Pɔlu kpodo Banabasi kpo, bo nya ye le oto yetɔn mɛ. 51 Mi wɛ Pɔlu kpodo Banabasi kpo hunhun ofinzɔ xeni le afɔ yetɔnye kpan ŋukɔn yec, bo sɔn yi Ikonyɔmu. 52 Vɔ, onukplanvi xeye ni le Antyɔcu ye bo le jijwɛ mɛ taŋu, bo gɔ kpo Gbigbɔ Kinkwɛn kpo.