Ye hu Jaki bo mɔ wle Piyɛ do ogankpa mɛ
12
1 Le hwemɛnu, xɔlu Elodu na na ye wle agunvi ɖeye, a bo do do aya na ye. 2 E bo na na ye hu Jaki xeni nyi Jan nɔvyɛ le dɛnkpwe nu. 3 Xena e kpɔn tun onu mɛ la bo jɛŋu na Jwifuye, e na na ye wle Piyɛ can le hwexenu na ye lo ɖu kpɔnnɔ ma ɖo tinkɛn we oxwe nɔ. 4 Xena, e na na ye wle Piyɛ bo sɔ-ɛ flɛn do ogankpa mɛ vɔ, e ɖe ogbe na sɔjagbɛ ɛnɛ xeye mɛ na sɔja ɛnɛ-ɛnɛ le, tun ye boo cɔ-ɛ nɔ. E bo wasi tito tun heye a bo ɖo kojo ni-i le otogun la we ŋukɔn le Pake we oxwe la godo. 5 Mi wɛ Piyɛ le ogankpa la mɛ, vɔ, agunviye bo lo xo ɛɖɛ na Mawu nɔ do ota ni-i, gbɔjwɛ ma ɖo.Xwetɔ la we ɛwɛndotɔ ɖe Piyɛ tɔn-ɛ le ogankpa mɛ
6 Elodu o le ogbesisɔ bo na do ɖe Piyɛ tɔn-ɛ na kojoɖiɖo la, le ozan mɛ la mɛ, Piyɛ xena ye do gɛdɛ owe na, bo lo dɔ awlɔn nɔ, sɔja owe bo lɛ do-e. Sɔja ɛmɛ cɔtɔye bo le agbo la nu bo cɔ ogankpa la nɔ. 7 Haŋu zɔnɖokpo, Xwetɔ la we ɛwɛndotɔ ɖe bo va, kinklɛn ɖe bo tɛ do oxɔ la mɛ. Ɛwɛndotɔ la bo xo akpa ɖokpo na Piyɛ, bo fɔn-ɛ, bo lɔ ni-i tun mɔ: «Site bleŋu!» Gɛdɛ laye bo flɛ le alɔye na Piyɛ. 8 Mi wɛ, Mawu we ɛwɛndotɔ la lɔ ni-i tun mɔ: «Bla alin tɔwe ji, a bo bla afɔkpakan tɔweye.» Piyɛ bo wasi ɖo mɔsinha. Ɛwɛndotɔ la bo mɔ lɔ ni-i tun mɔ: «Sɔ awu ɖaxo tɔwe sɔ do, a bo kplɔ-ɔ do.» 9 Piyɛ tɔn, bo kplɔ-ɛ do, e ko nyɔ-ɛ tun oxojɔxo wɛ nyi onu xeni lo jɔ nɔ dogbɔn ɛwɛndotɔ la ji, vɔ, e bo bu-i tun ɖiɖexlɛ ɖe wɛ e lo kpɔn nɔ ha. 10 Xena ye gbɔn sɔjagbɛ ɛmɛcɔtɔ tantyantɔn kpodo owegɔ wu, ye va jɛ agbo ogannɔ xe nu na ye nɔ gbɔn a do ɖyɛ toxo la mɛ nu, agbo la ŋutɔ bo hun le eɖe nu. Ye bo tɔn, bo sɔ omɔ ɖe, haŋu zɔnɖokpo, ɛwɛndotɔ la bo lɛ le Piyɛ kɔn.
11 Xena e trɔ ɖyɛ eɖe mɛ, e lɔ tun mɔ: «Fifi, ko nyɔ-ɛ le oxojɔxo mɛ tun Xwetɔ la bo dɔn ɛwɛndotɔ etɔn ɖodan, bo hwlɛn-ɔ gan le Elodu we alɔmɛ kpodo onu zɛtɛye xena Jwifuye we otogun la lo tre kpɔn nɔ ye mɛ».
12 Xena e kpɔn onu jɛ onu xeni jɔ la wu vɔ, e sɔn yi Malya we oxwegbe. Malya mɛ la wɛ nyi Jan xena ye sɔ nyikɔ na tun Maki onɔ. Ɛmɛ susu ɖeye bo kpli le oxwe la gbe bo do xo ɛɖɛ nɔ. 13 Xena e xuxu oxwe la we agbo, nyɔnuvi odansɔvi xena ye nɔ yɔ tun Hlodu, bo va, a do va ɖo oto ɛmɛ xeni va la. 14 E bo do josi Piyɛ we ogbe, mi wɛ, le jijwɛ etɔn mɛ, e jo agbo la hunhun do, bo do odun do va yi lɔ na ɛmɛ gbokpweye tun Piyɛ bo le agbo mɔnu. 15 Ye bo lɔ ni-i tun mɔ: «O bɛ oha!» Vɔ, e bo tɛ ɛɖɛ do e ji nɔ tun, oxojɔxo, Piyɛ wɛ. Ye bo mɔ lɔ tun mɔ: «Be, ɛsɛ etɔn wɛ.» 16 Vɔ, Piyɛ bo kpɔtɔ xuxu agbo la nɔ. Xena ye hun-i, bo kpɔn tun emyɔ bɛ, e bo kpaca do ye taŋu. 17 E wasi alɔ na ye tun ye boo bɔ onu, bo lɔ lena Xwetɔ la ɖe-e tɔn-ɛ le ogankpamɛ ɖo, na ye. E bo mɔ lɔ tun mɔ: «Mi lɔ-ɛ na Jakia kpodo nɔvi xɔsetɔ gbokpweye.» E mɛ godo e bo tɔn bo sɔn yi ofi bu. 18 Xena ŋukɔn ɖe, sɔja laye flu taŋu. Ye bo lo kan yeɖe se nɔ tun, ɛlɛ Piyɛ trɔ zun. 19 Elodu bo dɔn ɛmɛye ɖodan, na ye a va yi kan Piyɛ, vɔ ye ɔn kpɔn-ɛ. E bo kan oxo sɔja ɛmɛcɔtɔ laye se, bo ɖe ogbe tun ye boo kplɔ ye sɔn-ɛ, a bo hu ye. E mɛ godo, Elodu bo lɛ le Yude we oto mɛ bo va yi Sezale, bo va yi nɔ blɛ la na azan viɖe.
Elodu ku
20 Elodu bo le okɛn mɛ kpodo Tilu kpo Sidɔn we toxoye mɛtɔye. Ye bo ɖo ogbekpɔ a do va yi kpɔn-ɛ. Do e mɛ la wu ye va yi lɔ oxo kpodo Blasitusi, xeni nɔ kpɔn xɔlu la we oxɔ dɔ e mɛ ji, e bo yi ogbe a do gɔ alɔ na ye. E mɛ godo, ye va yi lɔ oxo kpodo Elodu a do wasi fifa, ɖo, xɔlu mɛ la we oto mɛ wɛ onuɖuɖu nɔ sɔn a do yi toxo yetɔnye mɛ. 21 Le azan xena ye ɖo ji, Elodu bo do xɔlu we awu etɔn bo xlɔn onyi le xɔluzinkpwe etɔn ji le dogbaji, bo lo lɔ oxo na otogun la nɔ. 22 Mi wɛ otogun la le axwa nu, bo lɔ nɔ tun ɛgbɛtɔ we ogbe hɛn nyi e mɛ, vɔ, Mawu we ogbe wɛ. 23 Vɔ, haŋu zɔnɖokpo, Xwetɔ la we ɛwɛndotɔ ɖe bo xo Elodu la, ɖo, e ɔn do gigo na Mawu. Ovɔnye bo ɖu-i, e bo ku.