Piyɛ lɔ onu xeni dɔn na e do yi Kɔnɛyi kɔn na agun Jeluzalɛmutɔn
11
1 Yesu we ɛmɛ dindɔnye kpodo nɔvi xɔsetɔ xeye ni le Yude we oto mɛ ye, se tun ɛmɛ xeye ni bo ɔn nyi Jwifuye can bo yi Mawu we oxo la. 2 Xena Piyɛ gbɔn va Jeluzalɛmu, xɔsetɔ Jwifuye do ɛhwɛ ni-i nɔ tun mɔ: 3 «O yi ɛmɛ xeye ni ɔn nyi Jwifuye we oxwegbe, bo ɖu onu kpo ye!» 4 Mi wɛ Piyɛ ɖe onu xeni jɔ laye gɔnmɛ na ye ɖe kplɔ ɖe do. E bo lɔ na ye tun mɔ: 5 «Ko le Yope, mi wɛ hwexenu na ko xo ɛɖɛ nɔ, ko bu do ɖiye, bo kpɔn le ɖiɖexlɛ ɖe mɛ, onu ɖi avɔ ɖaxo ɖe ha, bo le vuvlu dogbɔn azwe ɛnɛ etɔnye ji, bo jɛ ote sɔn jiŋukunsin bo va kɔn ye. 6 Ko glo avɔ la mɛ kpɔn nywɛɖe, bo kpɔn kanlin xeye ni nɔ zɔn afɔ ɛnɛ ji ye, kpodo xeye ni nɔ nɔ ogbe mɛ ye, kpodo xeye ni nɔ dɔn adɔ gbɔn nyixɔ mɛ ye, kpodo oxɛ ogbe mɛ tɔn ye. 7 Mi wɛ ko se ogbe ɖe lɔ na-a nɔ tun mɔ: “Piyɛ site, hu na ɖu.” 8 Vɔ ko bo ɖo e wu tun mɔ: “O o! Xwetɔ, onu ɖuɖyu ti alo onu xeni ɔn mɛ ti ɔn ɖyɛ onu tɛye mɛ kpɔn.” 9 Ogbe la bo mɔ ɖi sɔn jiŋukunsin zɔn owegɔ, bo tun mɔ: “Onu xena Mawu sɔ trɔ zun onu mimɛ, ká mɔ yɔ-ɛ tun onu ɖuɖyu.” 10 Onu mɛ la bo jɔ zɔn atɔn kpetyo, e mɛ godo, onu la zɛtɛye bo trɔ sɔn yi jiŋukunsin. 11 Mi wɛ zɔnɖokpo, ŋusunglo atɔn ɖeye xena ye sɔ ɖodan sɔn Sezale, va oxwe xe gbe na mí le la. 12 Gbigbɔ Kinkwɛn bo lɔ na-a tun mɔ, mɔ boo kplɔ ye do onu ti ma xo kpɔn. Nɔvi xɔsetɔ ɛdɛn xeye, bo kplɔ-ɔ do, mí bo yi Sezale la bo ɖyɛ Kɔnɛyi we oxwegbe. 13 Kɔnɛyi bo lɔ na mí lena e kpɔn Mawu we ɛwɛndotɔ ɖe, e bo le ote le oxwe etɔn gbe, bo lɔ ni-i nɔ tun mɔ: “Dɔn ɛmɛye ɖodan Yope na ye a va yi yɔ Simɔ xena ye nɔ yɔ tun Piyɛ do va. 14 E na va lɔ oxo xeye ni na hwlɛn myɔ kpodo xwedo tɔwe zɛtɛye kpo gan.” 15 Oxo wɛ ko jɛ lilɔ ji na ye kpoŋu, Gbigbɔ Kinkwɛn bo jɛ ote do ye ji, ɖi lena e jɛ ote do mía ji le titɔ e ji ɖo ha. 16 Blɛ mɛ wɛ ko va flin oxo xena Xwetɔ la lɔ, le. E lɔ tun mɔ: “Mawu we ɛsin wɛ Jan lɛ na ɛmɛye, vɔ miye, ye na lɛ Gbigbɔ Kinkwɛn na mi.” 17 Na e nyi tun Mawu na onunina ɖokpo ŋumyɔ la yee, ɖi lena e na míye xeni kan do Xwetɔ Yesu Klisu ji ɖo, onu lɛ mɔ ko nyi bo na do site kpan ŋukɔn Mawu?» 18 Xena ye se oxo mɛ laye vɔ, ye jɛ e mɛ, bo kanfu Mawu nɔ tun mɔ: «Be Mawu na jijɔ ɖiɖɔli ɛmɛ xeye ni ɔn nyi Jwifuye can, na ye a do kpɔn Ɛgbɛ Mavɔmavɔ»!Ye sɔ Banabasi ɖodan Antyɔcu
19 Xɔsetɔ xeye ni kankan do ɛtɛ cici na ɛmɛ xeni nɔ onyi le hwexenu na ye hu Etyɛnu, wu, ye yi kaka Fenisi kpodo Ciplu we kansin ye mɛ, kpodo Antyɔcu, bo nɔ jla Mawu we oxo la nɔ na ɛmɛ xeye ni nyi Jwifuye ɖoɖyo. 20 Ganke xɔsetɔ ɖeye ni nyi Ciplutɔye kpodo Silɛnu we toxomɛtɔye, va Antyɔcu bo jla Xwetɔ Yesu we Ɛwɛn Nywɛ la nɔ na ɛmɛ xeye ni ɔn nyi Jwifuye. 21 Xwetɔ la we hɔnhlɔn bo le kpo ye, ɛmɛ susu bo kan do Xwetɔ la ji bo trɔ ji mɛ. 22 Agunvi xeye ni le Jeluzalɛmu ye se oxo mɛ la, ye bo sɔ Banabasi sɔ ɖodan Antyɔcu gbɔɔn. 23 Xena e va bo kpɔn Mawu we ɛfɛnu we odanwiwa, e jɔ oji ni-i, e bo do zozo lanmɛ na ye ɛmɛ zɛtɛye tun ye boo tɛ do Xwetɔ la wu kpodo ayixa yetɔn kpo. 24 Ɖo ɛmɛ nywɛ wɛ e nyi, bo gɔ kpodo Gbigbɔ Kinkwɛn, bo ɖo xɔse ɖaxo. Ɛmɛ susu gbagbagba bo kan do Xwetɔ la ji.
25 Banabasi sɔn yi Tasi a do va yi kan Solu. 26 Xena e kpɔn-ɛ, e kplɔ-ɛ va Antyɔcu. Le oxwe ɖokpo blebu gblamɛ, ye nɔ yi agun we bibɔye nɔ a bo kplan onu ɛmɛ susu gbagbagba ye nɔ. Antyɔcu la wɛ ye na nyikɔ onukplanvi Yesutɔnye le tantyan tun «Klisutɔye».
Antyɔcu we xɔsetɔye jɔ onu ɖodan xɔsetɔ xeye ni le Yude
27 Le azan mɛ laye mɛ, oxolɔɖonyitɔye sɔn Jeluzalɛmu bo va Antyɔcu. 28 Ɛmɛ ɖokpo le ye mɛ, bo nɔ nyi Agabwisi, e bo site, Gbigbɔ Kinkwɛn bo lɔ oxo dogbɔn e ji tun xovɛ ɖaxo ɖe bo na tɔn le ɛgbɛ la mɛ seŋu. Xojɔxo, xovɛ mɛ la bo va tɔn le hwexenu na Klodu ɖu xɔlu ɖaxo le Hlɔma. 29 Mi wɛ onukplanvi laye sɔ ogbeta tun ɖokpo-ɖokpo heyetɔn bo na na onu xe wu na heye bo kpe, a bo do kpedo heye nɔvyɛ xɔsetɔ xeye ni le Yude we oto mɛ wu. 30 Ye bo wasi-i ɖo mɔsinha, bo sɔ onu xeye na ye jɔ laye sɔ ɖodan agunmɛhyɔn xeye ni le Yude ye, gbɔn Solu kpo Banabasi kpo ji.