Lɔga Kìbbayɛa Zuga Aha Mɛra
5
1 Ngazukta aha mɛrte,
ga mɛa shigitɔ na ara wuy na turgi ke ngaya ale dokkonɛo chɔllaa bo dhandalaye.
2 Ahaa gu wa mujuya kumulɔng na chɔɔ ruminyaa gu ussa :gal genne na teya tudhay tudhay.
3 Na worginyaa gu ko tomoga gu hɔla gaw dhandala tɛhɛrta.
Nɔng hunde ale Tumu se kegen lɔga gu bɛrgunyaye wurtuneye,
ale or worginyaa gu ko tomoga gu hɔla gaw dhandala hunde hɛrtɛye,
na ujukkanung na iggariseong huna ahaa dheshana :go ke ngaya anɛo lɛsiyaga na chirbhisiyɛo ahaa guye.
4 Alala!
Chɔɔ birinyaa senno gadhiyɛ zuga suninɛna gunyaa gu lɔmmo dhɛɛ.
Na ngabirinyaonu yɔk a ngagiya arrɛ wuy na ujukkanungɛ igge ke ngaya zugo ngagadhiyeoyoye.
Na wuyya arrɛa :zuga suninɛna wa shikka :Tumu Komoruya Ɔana Lɔgɔ Kumulɔng.
5 Na igge anno ga bo bhɔnynɛno na messo dɛlɛk dɛlɛk huna bɛa kìrogito na kènno kìndiyɛ.
6 Na duhiyo zuga ridhing ningginɛna ko igge ngani ɛkɛnyandɛayo na tɔgɔndo.
Lɔga Kènno Kìnyimbɛ Lɔgɔ Na Kèreyɛ Komoru
7 Na mɛa gochonginyaye,
ko bhee kunɛ Komoruyɔ,
gɔyɔ lɔgɔ na reyɛyɔ.
Ga gɔnyɔ chɔɔ hira kɔhinɛna hunde kolea asandayny ko kolea luguru duginɛ na dhak kolea suniuny na suneono liwaa bo mɛraye.
8 Nɔng kolea kunɛa :Komoruyɔ mɛa te ja na ko igge gɔyɔ lɔgɔ ngadamita na te dhandali na re nɔng.
9 Gochonginyaye,
igge kɛngɔ girɔngichinne ngaalleo.
Hunde messo ngangaye,
ale ujukkanung :Hira Kedhdho Lɔgɔ.
Chɔɔ kolea kunɛa :nɛa dhaa te girɔng ko tugɔ.
10 Na ga igge tɛhɛyɛ ko zuga bere yokkonɛa lɔga yokkono :Tumu chɔllanɛna na guchchɛa lɔgɔ.
11 Nɔng igge gaoyɔ hunde zuga nyimmɛa lɔgɔ a tuhinɛye.
Chɔɔ Iyob annaa bere guchcho lɔgɔ goore na chirbhiseo :Komoruyɔ na bassa.
Nɔng Komoru a hira wonyɛsɛnɛa :zugu na chirbhiseo.
12 Gochonginyaye,
bhɛa ngalɔkta kumulɔng hunde yokkono lɔgɔye ngagamsio ba na senno,
“Any karany :tumu ko ba,”
oo “Any karany :gali konnɔ.”
Hunde yoktoo lɔgɔ na seyo,
“A dhereye,”
any kete dhere.
Hunde senno a butomoye,
any kete butomo chi.
Nɔng hunde lɔga ku dib ngayokkonoye,
ale ujukkanung :Tumu.
Lɔga Kɛ̀yɛbhɛa Tumu Na Kògolɛa
13 Na hunde bhɛa nu lɔ hirre chɔllanɛye,
any kalliyɛ ko Tumu.
Na hunde lɔ inde hini hɔliye,
any keterrisan Tumu yello hinisa bo hɔla.
14 Na hunde lɔ inde ilagasse,
any keli zuga bibiyo doraa Tumu yɛbhbhɛa Yesus.
Na yɔk kuhudhu nɔng malɔ na kogoldɛsɛ Tumu.
15 Hunde kògol Tumu na kɛ̀yɛbh hinisɔye,
hira ilagasa ibaysi :Komoruyɔ Tumu na bassɔ.
Na hunde bere me lɔga gɛrsaye,
ujuk :Tumu na garsɛyɔ.
16 Na mɛa mɛzi kɛngɔ na ujugu lɔga gu gɛrsa na ogolo Tumu na kibayseunggɔ.
Nɔng hira ridhing ningginɛna hunde allinɛ ko Tumuye,
shik :Tumu na ajjɛ barartin na me lɔga bo dhandala.
17 Nɔng Eliyas bere anna hiri hunde naye.
Na ogollo Tumu goore na guyɔ ngadhagi.
Na koo oynya sizzi ko taginya illɛy kari ba te su.
18 Na koo ogolu Tumu sɛgɛn na guyɔ dhagu na liwa eggiyo.
19 Gochonginyaa ganyuye,
hunde lɔ inde lammana hirre tanggil gɔra lɔga gɛrsa na dhigannana gɔra lɔga ku dhereye,
20 tunggɛsɛ ngalɔkta sennɛ,
“Nɔng inde lammana hirre ɛddɛ lɔga gɛrsaye,
kìbaysi bhɛa senno kerɛ ko bhɛa ngaridhingɛta bu mɛrte.”