Dadaba Bere Kɔdhdhana :Bhaulosi Na Ittonɛsɛna Silimona
Lɔga Issayɛa :Bhaulosi Zugo
1
1 Ngadadabta kɔgɔdhdhan :anynyo Bhaulosi,
hira kìchibbɛanyi lɔga Yesus Kirisosi.
Na kɛllo ko gochonga na Timotiyos.
Na kìttonnoginy inye Silimona,
gochonga nayo kìbhbhaginyi hinisi na kòyogɛsɛna zugo kamannaa Yesus Kirisosi kari,
2 ko ngɔnaa na Ngaabhiya,
ko gochonga na Arikibho ku bholisiya kamannaa Kirisosi madhɛsɛna zugo lɔgɔ hunde naye,
ko zuga yɛbhbhɛa Yesus eterrisannɛa Tumu doraa nunu.
3 Any kichirbhiseong :Babaa na Tumu ko Komoruya na Yesus Kirisosi na kaung zany na bhaga ba ke na bo challa.
Lɔga Bhaulosi Ogolɛsɛna Silimona Tumu
4 Anye hunde kallinɛno ko Tumuye,
kali kali kagadhdhaniny inye na keterrisani Komoru Tumu,
5 ke ngaya bɔɔ kishigɛ bhɛa yɛbhɛi Komoru Yesus ko bhɛa ibhɛsɛni zuga yɛbhbhɛa Yesus kumulɔng hinisiye.
6 Na kogolloginy Tumu na lɔga challa kɔ̀lɔmma :aggeu kumulɔng bere ajjiy :Kirisosi,
tag shɛɛ na kali kali madhɛsɛ zugo lɔga bere yɛbhɛi nɔng.
7 Gochongnge,
inye wa iriyonyɔ na hinisa nanu tewa hɔli goore ke ngaya ibhɛsɛnɛ zuga yɛbhbhɛa Yesus hinisi na ilalɛ hinisiya gɛye.
Lɔga Bhaulos Tɔllɔhɛsɛna Silimona Na Kalammay Anisimo
8 Na mɛa ga kɔ̀tɔllɔhaginydɔ.
Nɔng hunde kàiny lɔgɔ,
anda kajjiny dib ke ngaya kɔlɔmɛ buyn bhɛa Kirisosiye.
9 Na nɔng lɔgɔ nganga hung ngakajjinyo,
a kɔtɔllɔhaginy ke ngaya kìbhinɛnɛ hinisi na anye kanɛ hira nyagasa kìchibbɛanyi lɔga Yesus Kirisosiye.
10 Na kɔtɔllɔhaginy lɔga eriya nanu kèe Anisimo,
bɔɔ kaganinynyano huna kihi doraa chibinuny hɛtta ko eriya nanu ku dhere.
11 Anisimob nɔng kesea bere sabbɔ lɔkke ngaɛyaninyo dhul.
Na nɔng mɛa bɔɔ tewa hira ɛaniy agge taninya kari.
12 Na mɛa ngahirra kibhinɛno hinisi gooreye keni kawak bhɛa nunu sɛgɛn.
13 Nɔng chɔɔ hunde kɛsɛrɛ bhɛa nunu na kɛ̀tɛldo kari gɔrra kìchibbɛany lɔga kamanna Yesusi challaye na kɛanyɔ,
anda hini hɔllany goore.
14 Nɔng anye bhee kadhdhagɛiny lɔgɔ ninggɛ.
Yɔk lɔkte chal seni messe maya hinnon ɛna na mesi damite hinɛye.
15 Yɔk ngataginyaya bɔɔ kennɛnɛo ko Anisimo chichi muchukte kako a ngaya ale itinyanɛnɛo na bhagɛo kari ke dhɔnɛ ko kingiye.
16 Na nɔng hunde kalda wurtɔ ale bhakko kariye,
gaymay ngani ngaanno.
Na chɔɔ ale jorrono bhɛa bere anɛa gaymay na heo ko gochonga nunu ku tull.
Nɔng chɔɔ ko hunde bhɛa nanu kete gochonga kibhinɛno hinisi,
inye kalda jaraany anye na ibhtɛ hinisi goore ke ngaya ale anɛo dehunyɛa na chɔɔ bhɛa Komoru Tumu anɛo gochonginyaye.
17 Na mɛa inye hunde gɔnyanyɔ anye huna gochonga nunu kàgachcha Tumu kariye,
ga lamma nɔng damite anda ale lammanɛany anyeye.
18 Hunde kesea bɔɔ ɛddɛ lɔk gena bhɛa nunu oo lɔmmaginy ewoye,
any kɔ̀tɔlɔ :anynyo.
19 Ngalɔkta kɔgɔdhdhaginy :anynyo Bhaulosi sabbaa nanu na kesennaginy,
hunde lɔmmaginy ewoye,
ale kagadhieny :anynyo.
Chɔɔ inye ewoa basseya nunu lɔmmaganydɔ na maya sabba ngadhinyakinyo.
20 Na mɛa gochongnge,
keni me lɔkte chal hin :Komoruyɔye na hinisa nanu kɛtɛa bay ke ngaya kànɛ zuga Kirisosi kariye.
21 Nɔng mɛa anye kɔgɔdhdhaginy ngadadabta ke ngaya kɛyɛbhbhɛiny na ale mesɛ ngalɔkta na chɔɔ jorronɛye.
22 Na mɛa kesennagung ɛnɛnggeo,
ga lameogonyu bhee ale kungusɛ na oytogonyu kɔk ke ngaya kɛyɛbhɛ bhɛa bere ogollogɛanyu Tumu hunde ale urruknyɛsɛn na ɔkkanany ngadoriya chibinunyde.
23-24 Na hira kèe Ebabhara kìchibbɛiy lɔga Yesus Kirisosi kari ko zuga kagachcho Tumu kari kèleo Markos ko Artiroko ko Demas ko Lukas sennaginyɛ,
“Saro!
Saro!”
25 Na any kichirbhiseong :Komoruya na Yesus Kirisosi na tɛldi ko igge kari.