Lɔga Dhugunnogiyɛa Lɔga Challa
3
1 Na madhɛsɛ zuga yɛbhbhɛa kamannaa Yesusi lɔgɔ na bhɛsi sabbi na sɛɛ kalayta rɛhi na kigombɛsɛ zuga allinɛnɛa yɔk na kete zuga hunde senno kemesigi lɔga challaye hinisi ujjonɛa na ɛlla kɔk.
2 Na zugo ngakedhdhɛ na kete zuga lalna abhanyisiyɛa zugo na lachanɛa rɛhi bhɛa zugony kumulɔng.
3 Nɔng agge bere sabbɔ kànna dalnɛ na kàmarra lɔga Tumu na itabhbhagiyɛa :zugu lɔga gɛrsa na kèmessoyɔ.
Na kɛ̀hɛtta ko gaymanyaa chibbeyɛa :lɔga bo mɛra gɛrsa kìhinnono :aggeu na bhɛa kɔ̀dhɔyɛa ningginɛna.
Na kànna ga bo kɔ̀chɔlɔssa ahaa zugony na kèmesso zugo gɛrrɛng gɛrrɛng na chɔɔ kàmarnɛna kɛngɔ na marriyɛa :zugu.
4-5 Na nɔng Tumu,
Komoruya na bere Ibayseiy agge,
annaa bere dhugunogiyɔ chaldina nɛnɛ ko bhɛa yellɛiy agge na ibayseiyɔ.
Na ngaya ibaysiyɛiyte,
bhɛa bere kèmessɛa lɔga challa ridhing ningginɛna ngayo.
Bere ibayseiy ke ngaya chirbhisiyɛiy :nɛaye.
Na ridhinga bere kɔlɔmma :aggeu annaa tonyoiyɔ :Kuloya Nɛnɛ na agge kɛ̀tɛhɛtta ko zuga ngani kùhudhukkoniy na kɔ̀tɔlɔmba basseya ngani chaga.
6 Na bhɛa bere Tumu ɛdhdhɛttanɛiy agge na ajjɛiy Kuloya nɛnɛ na kɛ̀tɛldi kari,
a ngaya bere ibhbhanɛ Hira Ibayseiy agge kènno Yesus Kirisos na rɛsɛiy aggeye.
7 Na aynde Tumu chirbhisiɛy agge na kɛ̀tɛldi hurr bhɛa nɛnɛ na kète erroa gɛnyɛ kìbhɛsɛna lɔga ale kɔ̀jɔanɛa basseya iho hinisiye dhulde.
8 Yɔk ngalɔkta koyokkoginy :anynyoye a dhere.
Na keni madhɛsɛ zuga yɛbhbhɛa Tumu ngalɔkta shɛɛ na kɛmɛtta na kemesigi lɔga challa hinno :Tumu ke ngaya ngalɔkta anɛ challi goore na irichɛ zugo kumulɔngge.
9 Na mɛa inye bhɛa zukte ɛkɛnyanɛnɛ lɔkte hologun ninggɛye ko bhɛa gee kɔbhbhɛ lɔga bere tenyiya zugony kinginye na ɛkɛnyannɛ ko zugoye ko bhɛa gee wologinɛnɛ lɔga kera Ayhudhiye,
maya ihi rɛna ke ngaya ngalɔkta kumulɔng anɛ ga kedhdhɛa zugo hinisi ko ga hologun ningginɛnaye.
10 Na hunde lɔ hirre ti zugo na kegendɛ kɛngɔye,
ibbaytɔ.
Na hunde ngani me ngangaye,
ibbay sɛgɛn.
Na kalda wurtɔ hunde tɔrɛye,
dhuy go dhɛɛ.
11 Hunde hiri me ngangaye,
taktɔ hunde dhaa a hirre ku kuhuyagi mar lɔga Tumu ku dhere na lɔ ridhing na ujukkana rɛa nɛnɛye.
Lɔga Kìbbayɛa Zugo Na Uturronɛa :Lɔkku
12 Nɔng anye keni kègoginy Artima oo Tikiko.
Na hunde kona ogo na dagu ngonuye,
inye wo shaw na kìtinyandɛy Nikobhili.
Anye keni ngaasandayta dhɔng kɛ̀tɛ ngonu.
13 Na hunde Abholos ko hira gaa kera Rome kèleo Zena tɛhɛnɛ wochin na tɛldi kɔkte,
ɛa na aynɛ gàla ko ahaye hinnɛye kumulɔng.
14 Na hunde mesi ngangaye ko yɔk zuga ga ale ɛdhɛmisɛɛ bhɛa hinisi ujjonɛa na messɛa lɔga challa.
Na jɔanɛ ahaa ammɛa kali kali na chɔɔ ɛanɛ zug gena na todhdhonya ngaanno.
15 Na zukta kɛllo gɔrra kariye kumulɔng sennaginyɛ,
“Saro!
Saro!”
Na ko inye ngazuktonu ɛl ngonu ku dehunyɛaa ga kɛ̀yɛbhbha Tumu kariye sɛɛsɛ,
“Saro!
Saro!”
Na Tumu any kichirbhiseong igge kumulɔng.