Dadaba Wurtune Bere Kɔdhdhana :Bhaulosi Na Ittonɛsɛna Timotiyos
1
1 Ngadadabta kɔgɔdhdhan :anynyo Bhaulosi, hira ekkonyi :Kirisos Yesusi damiya bere sennanɛa :Tumu na kàmadhɛsɛ zugo lɔga basseya iho dhul lɔmma :Yesus Kirisosia bere bhiigɛsɛna :Tumu zugo.2 Na kɔgɔdhdhaginy inye, Timotiyos, eriya nanu kibhbhaginyi hini.
Any kɛdhdhɛttandiny :Babaa Na Tumu ko :Komoruya Na Kirisos Yesusi na kichirbhisiyeny na kayiny zany na bhak ba ke na bo challa.
Lɔga Kàmadhɛa Timotiyos Lɔga Maya Kìriynɛnɛa Na Kɛ̀yɛbhɛa Tumu
3 Nɔng anye kutuhi Tumu, Komoruya kagayi hinisa bo challa, damiya bere kayɛa :kokonginyaa ganyu, na tii kogolloginy Tumu bar ko kali hunde kallinɛno ko nɔngge. 4 Na hunde kungusɛsɛn kedhera gunyu bere ruyɛiye, kɛsɛdhi lɔga keni kàrrɛiny sɛgɛn na hinisa nanu keteɛ hɔli. 5 Na chɔɔ kagadhdhan ngaya yɛbhɛ Yesus dhere damiya bere yɛbhɛa :kakaa nunu Loyiy ko :mamaa nunu Enukiye. Na chɔɔ ko mɛa toye hunde ngani yɛbhinɛn ngadamitonuye, anye wa kutungɛsɛu na katagga shɛɛ dhogoy.
6 Na ngaya yɛbhinɛnɛ gooreye, a bhee kɛbhɛsiyɛiny sabba na kalda mɛdhai goore dhogoy na hini kɔchɔa na mesɛ lɔga bere ɛdhdhɛttanɛinyi :Tumu kala bere katadhdhɛinyi :anynyo sɛnɔye. 7 Bhee keni mesɛ ngangaye, a ngaya Tumu, kuloyte kɛ̀ngɛrsɛ bho, ngani kayiycho na kuloya bere ajjiy :nɛa anɛ na ajjiy barartin ko bhɛa kìbhɛsɛna zugo hinisi ko bhɛa kɛ̀tɛlɛa lɔgɔye. 8 Na mɛa bhɛa seni kɔbhɛsɛ zugo lɔga Komoruya na ko lɔga ganyu, ngahirra kìchibbɛany lɔga gɛnyɛye, ngakussɛiny liya. Iriyɛ barartina Tumu na tɔrany anye na kɔ̀chɔllayɛi kamannaa challa kari. 9 Nɔng Tumu bhee bere ibbaysiyɛiy na bɛrranɛiy na kèteɛ zuga kɛ̀ɛnginyana ridhing ningginɛnaye, ke bhɛa bere kèmesɛa lɔga challa ngayo. A bhɛa bere ojjonɛa :nɛa tɔllɔng ko bhɛa bere ɛdhdhɛttannɛiy agge. Na ngalɔkta ɛdhdhɛttannɛiy na ajjɛiy Kirisos Yesuse, agga bere ojjono :nɛa kingi chɔɔ huna bere ba ko tumu ngani kètegenydoyɛayo. 10 Na yɔk mɛa ngalɔkta bɔɔ dhugundiyaa tok ke bhɛa bere kunɛa :Kirisos Yesusi, Komoruya Na Ibbayseiy agge. Nɔng anna bere igariseo rɛsɛ na dhugunnogiy bhɛa kɔ̀jɔanɛa basseya iho dhul hunde kɛ̀yɛbh kamannaa challaye. 11 Na chɔɔ ko anye annaa bere kɛ̀bɛrtaanyɔ na ketewa hira kɔɔbhɛsɛni zugo lɔgɔ ko na kèkkonyi na kamadhɛsɛni zugo ngakamannaya chalde. 12 Yɔk ngalɔkta a gee mɛa kɔchɔllanɛnɛ :anynyo gooreye. Na nɔng ko hunde kète nganda kɔchɔllanɛn ngangaye, anye liya ngaamɛanynyo dhul, ke ngaya kaggaɛ hira kɛyɛbhiye. Na chɔɔ lɔga ganyu bere kɛyɛbhɛsɛni nɔng, hunde bhɛk ko bhee ale wokkonɛ :nɛaye, anye kagga shɛɛ.b
13 Na mɛa bhɛk ngalɔkta ku dhere bere shikkan bhɛa nanuye na madhɛsɛ zugo nganga tii. Na hunde madhɛsɛnde, madhɛsɛ ke na bo yɛbhi Kirisos Yesus na ibhɛsɛni zugo hini ke ngaya ɛlɛo ko Kirisos Yesus kari na anɛo dhɔnɛye. 14 Na lɔga kamannaa challa bere yɛbhbhaginyi :Tumu, any kɛyainy :Kuloya Nɛnɛ kɛ̀lla ko agge kari na bhɛk shɛɛ.
15 Yɔk zuga kɛ̀yɛbhbha Yesus kari bhakkɛa baa Isiya kumulɔng hunde annaa bɔɔ dhɔttanyɔye, inye gayɔ. Yɔk chɔɔ ngazuktonu kona a Bhilogos ko Herwagenes rɛ.
16 Na nɔng Onesibhoru ko zuga doraa nɛnɛ any kichirbhisi :Komoruyɔ Tumu, ke ngaya nɔng bere irishshɛany goore dhogoyte. Nɔng chɔɔ huna bere kìchibbonyi gɔrgɔriyaye, bhɛa senno kɔgɔnyɛanyɔ liya ngani kusɛo. 17 Na huna bere kunno Rome annaa bere lameonyi dirr ko bhee jɔanɛanyi. 18 Na kolea ale kedhdhɛa :Komoruyɔ Tumu lɔga zugony kumulɔng, nɔng any kichirbhisi :Tumu. Nɔng ngahirra huna bere kihi Ebhesonɔ, hunde bere kachchany ɛnɛngge, chɔɔ inye ga goore.