Dadaba Bere Kɔdhdhana :Yaykobi
1
1 Ngadadabta kɔgɔdhdhagung :anynyo Yaykobi,
hira kagay Tumu ko Komoru Yesus Kirisos.
Na kittonnogung igge,
ngagettoya ku 12a bere bhassanyɛsɛno ba kumulɔngge.
Na kissaunggɔ,
anno challi hung?
Yɛbha Ko Bho Gaana
2 Gochonginyaye,
hunde dokkono lɔga bo mɛra chɔllanɛnɛoye,
hinisiya gu any kete ga bo hɔla na gɔnyɔ huna lɔga challa.
3 Yɔk lɔkte dhandal illobbungɛ na se Tumu ngayɛbhbhoye,
hunde agga irishshongɛa na senno nyimbɛ lɔgɔ na yɛbhtɛ Tumu gooreye,
igge gaoyɔ.
4 Na hunde nyimbo lɔgɔ dirr na hinisi ngani ngakedhdhoo na yɛbhto Tumu dhulde,
ngangaye teyo zuga ojjɛsɛno rɛhi hirimo na gao bho na lɔkte gɛrsi ngalɔmmoo.
5 Na nɔng bhɛa nu hunde hir kona imag bhoye,
any kogol Tumu na aynde ale kàjjɛ bhɛa gayɛa bhoye.
Nɔng Tumu a Komoruya challa hini ngangɔayo ɛdhɛttana zugo lɔkke kumulɔng.
6 Na hunde ogol Tumuye,
maya yɛbh na ogol surr hinisɔ toye dhere,
na ko hini ngadhaginɛo.
Nɔng hirre dhaginɛ ko hiniye heo ko zurgayab ɛbbɛkkana :huroyɔ na kɔyɛa bhokonnɔ.
7 Nɔng ngahirronu bhɛa senno kɔjɔyay lɔk gena bhɛa Komoruny,
maya ngaɛsɛdhdho
8 ke ngaya lɔga ɛsɛdhdha :nɛa anɛ ramman na dhaginɛ ko hini kali kaliye.
Lɔga Hini Hɔldina Hira Aha Ningginɛna Ko Na Naa Aha Mɛra
9 Gochongge ku bhoyogi marrɛ :zuguye,
hinisa nɛnɛ any kete hɔli ke ngaya dhɔngɛ :Tumu na anɛ hira boye.
10 Na ko nɔng gochongge bu lɔ aha ku dɛlɛlɛyte,
hinisa nɛnɛ any kete hɔli ke ngaya lachchanɛ :Tumu na anɛ hira chinyoye.
Nɔng ngahirra bu aha mɛrte heo ko kɛya hulno na ale uruttono.
11 Na su hunde ujjono na kɔn ngakɛtonu hulende,
mudhugu na urutinya na ɛa nɛnɛ bo challa garasɔ.
Na ko nɔng ngahirronu bu aha mɛrte,
hunde ngani me ngagaymoa nɛnɛye,
urutinya na gara nganga.
Lɔga Dokkonɛa :Zugu
12 Hirre nyim lɔga kìllobɛaye,
a tuhinɛ ke ngaya iriynɛnɛ na anɛ dhandaliye.
Nɔng ale ajjɛ :Tumu basseya iho dhul ko kingi damiya bere bhiigɛsɛna zuga ibhɛsɛnɛa nɔng hinisi.
13 Na hirre killob :lɔk genneye,
ngakese,
“Wa illobonyɔ :Tumu.”
Tumu nɔng lɔga gɛrsa ngaillobbiysho.
Na nɔng anna chɔɔ lɔga gɛrsa ngakìlobboo.
14 Na nɔng bhee killobbɛiyte,
a ngaya kìchirkanɛ lɔga gɛrsa kìhinnono sabbiya ga na itabhbhaniyɛye.
15 Na ngalɔktonu gɛrɛ kìhinnono :aggeuye hɛ na mesiyɛ na kɔ̀lɔ ridhing.
Na ngaridhinggonu hunde idhigisɛɛ na te buye,
ujjukkey na kɛ̀rɛsɔ.
16 Ngagochonginyaa ganyde,
c ngakitabhtung :genne go!
17 Yɔk lɔkte chal tuhinɛ na ɛl hurrte kumulɔng hony surr tumɔ bhɛa Babaa na Tumu,
bere ghendono su ko tagi ko munyunya.
Nɔng chɔɔ anna ngabhɔdhinɛnao na ziggoo huna rijjuny.
18 Nɔng annaa bere bɛrraniy na yokkogiy lɔga gɛnyɛ ku dhere na kàbayɛyɔ.
Na agge bhɛa ahaa bere ghendono kumulɔng kète ga ku sabba.d
Lɔga Kìshikko Na Maya Kùrrugɛsɛna
19 Ngagochonginyaa ganyde,
e ga shigitɔ!
Hunde dokkono lɔgɔye,
chirara shɛɛ na tunggɛsɛ haalɛ.
Shaw hung ngadharachinynyano na wologinɛno
20 ke ngaya dɛmneya zugony imaginɛnɛ ko lɔga hinno :Tumu ridhing ningginɛnaye.
21 Na mɛa dhɔyɔ kuhuyamo ko ngalɔkta bu mɛr gɛrɛse kumulɔng na layta rɛhi na tɔlɔmɔ ngalɔkta kèe bayɛ :iggeu bere ajjung :Tumu na lɔmmo hinisichinneye.
22 Ngatiranydɛ rɛhi na te zuga shikko lɔga Tumu nyabha sɔng!
Shigi na urruktɛsɛyɔ.
23 Hirre shik lɔga Tumu na ngaurrugɛsɛnnoye,
hɛt ko hira terinynɛna mirayagiye,
24 na hunde tewa ushaye,
botto gɔrre hinde.
Na ɛa nɛnɛ hunde wa i ɛnɛngge,
dhinyɛsɛna sabba shaw hung.
25 Na nɔng hirre guny kera challa iho hurr obhonisisɛna zugo bhɛa hɔla na marak shɛɛ na ngadhɔtto na sabba ngadhinyɛsɛnnoye,
lɔga messo :nɛa kumulɔng ale tuh :Tumu.
26 Hirre se,
“Kani hira kɛbhɛgi lɔga Tumu shɛɛ,”
na tuga nɛnɛ ngakabhbhoye,
nɔng ngangaye,
tiranyɛ rɛ na bhɛa bhɛgɛa lɔga Tumu dhaa a butogi.
27 Yɔk lɔkte chal hinnogiy :Babaa na Tumu na kɛ̀bhɛgɛ na ridhing ngakɔ̀lɔmiye a ɛnɛnggeo,
kèe kɛ̀ya erroa ku bhoyoga ko tɛrroa ku bhoyogaf chɔllanɛna na kɛ̀bhɛgɛ rɛhiya ga bhɛa lɔga gɛrsa lɔmmɛa ridhing messɛa :zugu.