Dadaba Sabbune Bere Kɔdhdhana :Yohanisi Na Ittonɛsɛna Zugo
Lɔga Ajjɛa Zugo Bassey
1
1 Ngalɔkta kenno kòyoktogung :aggeuye agga ajjɛa zugo bassey.
Na ngalɔkta rɛ a hiri.
Na ngahirra bere ihono kingi huna chɔɔ tumu ko ba ngani kètegenydoayo.
Na agge chɔɔ bere karto kawarre,
na hunde mɛzziye,
kishikto na kamarakto shɛɛ na kugumbo chɔɔ sɛnɛ.
2 Nɔng ngahirra ku basseyte annaa bere ɛlla ko Baba Na Tumu na koo kowa ba na dhɔlagiyɔ rɛ na karto.
Na mɛa agge kɔ̀ɔbhbhagung lɔga gɛnyɛ bere korrono kawarre na kùdhugunnogung bhɛa nɔng anɛa basseya iho dhul.
3 Na ngalɔkta bere korrono kawarre na kishikkano nyabhaye kɔ̀ɔbhbhagung na ko igge yɛbhɛ na kète zuga dhɔnɛna ke ngaya kɛ̀lɛ ko Baba Na Tumu ko Eriya Nɛnɛ Yesus Kirisos kariye.
4 Na bhee kɔ̀gɔdhdhagɛung ngalɔktaye,
a ngaya kenno hinisiya ga keteyɛ hɔli goore dhogoniye.a
Lɔga Maya Kòwoyɛa Hɔldinɔ
5 Nɔng kammannaye bere kishikkano bhɛa nɛnɛ na mɛa kòyokkogung iggeye a ɛnɛnggeo,
“Tumu i hurr huna hɔldinuny.
Na bhɛa nɛnɛ kɔrrɔyn ninggɛ dhul.”
6 Na agge ko hunde kèse,
“Kɛ̀yɛbh Tumu na kàn dhɔnɛ,”
na kɔ̀tɔ kɔrrɔynɔ,
kàn butoga na lɔga gɛnyɛ ku dhere ngangaye dhaa ngakèmesso.
7 Na nɔng hunde kɔ̀tɔ hɔldinɔ ngadamita ihɛ :Tumu hɔldinɔye,
anda kàn dhɔnɛ na nyawaa Eriya Nɛnɛ Yesusi onynyoniyɛ ridhingɛte kumulɔng.b
8 Na ko hunde kèse,
“Agge ridhing ninggɛnniyɔ,”
nɔng kìtabh rɛhiya ga na chɔɔ lɔga ku dhere bhɛa na dhaa ninggɛ dhul.
9 Na nɔng hunde kùdhugundɛsɛ Tumu lɔga ga gɛrsa dib,
nɔng ujjuk na sennagiy,
“Any kagarayɛ,”
na onynyono ridhingɛa ga kumulɔng ke ngaya anɛ hira kìbhɛsɛna hinisi na kedhdho lɔgɔ dibte.
10 Na agge chɔɔ ko hunde kèse,
“Lɔga gɛrsa ngani kèmesigito,”
nɔng ngangaye kòy Tumu ke butogi na chɔɔ lɔga gɛnyɛ bhɛa na dhaa ninggɛ dhul.