16
1 “Anye bhee koyokkogɛung ngalɔkta kumulɔngge,
keni yɛbhtanyu anye na hunde illobbungɛ :genneye,
ngadhɔyɔ ngaya yɛbhbhɛanyuye.
2 Nɔng igge ale marrungɛ :zugu na obhoniseungɛ doriyoa madhinɛnɛa zuga Ayhudhi lɔga Tumu na chukkongɛyɔ.
Na chɔɔ kolea ale nissɛungɛa :zugu na ɛsɛdhɛa huna zuga kachchɛa Tumu,
ale andanayɔ.
3 Nɔng bhee ale messɛungɛ ngangaye,
a ngaya imaggɛanyɛ anye oo Baba nanuye.
4 Na ngaya koyokkogɛung ngalɔktaye,
keni hunde ale ngakoleonu andanaye,
katta ngalɔkta kibbashshɛungge.
Yɔk ngalɔkta bere sabbɔ annaa ngani kòyogogunguo ke ngaya taa kɛlɛ kariye.
Lɔga Messo :Kuloya Tumu
5 “Nɔng mɛa anye keni kòk bhɛa hira bere ekkononyi,
na chɔɔ bhɛa nu hirre ghinnony na sennagany,
‘Kɔ ori?’
ninggɛ.
6 Nɔng igge mɛa wa munyuyo goore na hinisiya gu teya kɔrrɔ ke ngaya koyokkogɛung ngalɔktaye.
7 Na nɔng mɛa ga shigitɔ!
Nɔng anye ngaya keni kɔ̀gɛye,
bhɛa nu a challi.
Nɔng hunde ngakɔgɔyoye,
bhee ale kunɛ :Hira Irishshongngu ninggɛ.
Na nɔng hunde kokkaye,
ale kekkon nɔng na assanunggɔ.
8 Na hunde ale kunde,
ale bhɛsi zuga bhakkɛa ba kumulɔng sabbi na dhugunɛsɛn bhɛa anɛa zuga lɔmmɛa ridhing na imagɛa lɔga gɛrsa ko hira ridhing ningginɛna ko bhɛa ale kedhdhɛa :Tumu lɔga zugony.
9 Na bhee ale dhugunɛsɛn yɔk bhɛa lɔmɛa ridhing na imagɛa lɔga gɛrsaye,
a ngaya yɔk anye ngayɛbhbhɛanyɛoye.
10 Na sɛgɛn bhee ale dhugunɛsɛn bhɛa imagɛa hira ridhing ningginɛnaye,
a ngaya anye ale kɔgɔɛ bhɛa Babaa Nanu na igge sɛgɛn ngaorrɛanyuoye.
11 Na sɛgɛn bhee ale dhugunɛsɛn bhɛa imagɛa lɔga ale kedhdhɛa :Tumu lɔga zugonyde,
a ngaya Tumu bere kedhdhɛ lɔga komoruya allinɛnɛa ngabaya kumulɔng na ujjukkanɛ dhulde.
12 “Nɔng anye ngani kɔlɔmi lɔga bo mɛra dhogoy keni kòyogogungɔ.
Na nɔng mɛa hunde kòyogogungɔ,
bhee ungusɛɛno na gayɛo ninggɛ.
13 Nɔng Kuloya Tumu madhɛsɛna zugo lɔga ku dhere hunde ale kunde,
dhugunnogung bhɛa lɔga Tumu anɛa dhere na gao kumulɔng.
Na nɔng ale yokkono lɔga shikkana bhɛa nanu sɔng.
Ga sabbaa nɛnɛ ngayokkonoo dhul.
Na chɔɔ ale yokkogung lɔkte ale ngani ɛrrinyaye.
14 Na ale shikkana lɔga ganyu na yokkogung igge.
Na hunde me ngangaye,
ajjany diram.
15 Yɔk lɔga Babaa nanu kumulɔng ko yɔk agga ganyu.
Na aynde kesennagɛung ‘Ale Kuloya Tumu shikkana lɔga ganyu na yokkogung iggeye.’
16 “Nɔng ale kɛllana kari bhe chinyi na ngaorronyuo.
Na ale ɛllano bhe chinyi na orronyo sɛgɛn.”
Lɔga Ale Bhɔdhinɛnɛa Lɔga Munyusɛa :Zuga Kɔbhbhɛa Yesus Na Dɛlɛa
17 Na zuga kɔbhbhɛa nɔng gena rɛgɛ :lɔkku na ghindɛ kɛngɔ na se,
“Na mɛa dha ngaya senɛ,
‘Nɔng ale kɛllana kari bhe chinyi na ngaorronyuo.
Na ale ɛllano bhe chinyi na orronyu sɛgɛnde’ ko ngaya senɛ,
‘A ngaya anye ale kɔgɔɛ bhɛa Babaa Nanuye,’
dha a bhɛa senno keseɛ ɛnɛng?”
18 Na ghindɛ kɛngɔ dirr na se,
“Na mɛa dha ngaya senɛ ‘bhe chinyiye,’
a bhɛa senno keseɛ ɛnɛng?
Ngalɔkta mɛzzi :nɛaye kìmaktɔ.”
19 Na Yesus aru hunde se kighini nɔng hologuna ngalɔktaye,
na sɛɛsɛ,
“Kɛngɔ ghinnɛno hologuna ngalɔkta kesenɛ,
‘Nɔng ale kɛ̀llana kari bhe chinyi na ngaorronyuo.
Na ale ɛllano bhe chinyi na orronyu sɛgɛnde,’
chi dha?
20 A challi,
ga shigitɔ!
Nɔng igge hunde ale ruo na munyusso gooreye,
yɔk zuga marrɛa Tumu ale hinisiya gɛ a hɔli.
Nɔng igge ale ruo chi,
na nɔng roa nu ale kɔ na bhɔdhinɛ ke hini hɔldin.
21 Nɔng chɔɔ hira ngaha hunde se kete kolea hudhuginɛnɛaye,
shurnɛ goore ke ngaya ilagasɛye.
Na nɔng hunde hudhugo eri na te ushaye,
ilagay dhinyɛsɛn sabba na dɛl goore ke ngaya eri hudhukkinyanɛ shɛɛ na ɛlɛ ko zugo bayte.
22 Na ko igge mɛa lɔga gu a nganga.
Nɔng mɛa munyussoyɔ.
Na nɔng ale kòrnɛ sɛgɛn na dɛllo goore.
Na chɔɔ hirre ale kedhdhung hinisi na ajjung munyusey,
ninggɛ dhul.
23 Na ngakaldonu lɔkte ale ogollonyu anye ninggɛ dhul.
Na mɛa ga shigitɔ!
Yɔk lɔkte hinnono na ogollo Babaa nanu sara ganyuye kumulɔng,
ale ajjunggɔ.
24 Nɔng ko mɛa toye lɔk gena sara ganyu ngani ogolotto.
Na mɛa ogoloyɛ!
Nɔng ale ajjung na dɛllo na hinisi hɔllung goore.
25 “Nɔng anye ko mɛa toye annaa bɔɔ kɛlɛhɛnagungɔ lɔgɔ kɛr.
Na ko hunde kete nganga,
nɔng kolea lɔgɔ ngadamita ngakɛlɛhɛnnagɛunguo na kudhugunnogɛungu lɔga Babaa nanu dib,
ale andanayɔ.
26 Na ngakaldonu igge ale ogollo Babaa nanu sara ganyu.
Na nɔng ngaya kesennagɛung ngangaye,
bhɛa kenɛi ale kɛsɛrɛ bhɛa nu na kogoli Baba nanu ngayo.
27 Anye bhee kesenɛ ngangaye,
a ngaya Baba nanu ibhbhagung igge hini ke bhɛa bere ibhbhagɛanyu hinisi na yɛbhɛo bhɛa bere kugunɛi bhɛa nɛnɛye.
28 Nɔng anye annaa bere kabansani bhɛa ihɛa Babaa nanu na kuguni chɔɔ ba.
Na mɛa ale kɔdhɔyi ba na kowogi bhɛa Babaa nanu sɛgɛn.”
29 Na zuga kɔbhbhɛa nɔng se,
“Na kèe inye wa dhugunnogiyɔ lɔgɔ dib na ngani ngaɛlɛhɛnnagiyyo.
30 Na mɛa wa katakto hunde inye dhaa ani hira gai lɔgɔ kumulɔng,
na chɔɔ bhee ghinnɛinynyɛ :zugu lɔga lɔmmɛa hinisichinne ninggɛye.
Na ngaya gaɛ lɔgɔ ngangaye,
wa dhugunogiyɔ bhɛa bere kunɛi bhɛa Tumu na kɛyɛbhto.”
31 Na nɔng yagɛsɛ na sɛɛsɛ,
“Yee!
Na kèe mɛa dhaa yɛbhtanyu!
32 Nɔng kolea dhɔtɛanyu bhichang na bhasanɛnɛo na hɛyɛo doriyoa gu bhiy bhiy ale kundɔ.
Nɔng chɔɔ ngakoleonu a mɛa toye rɛ.
Na nɔng ko hunde kete nganga,
anye bhichang ngakihiyo ke ngaya kɛlɛo ko Baba nanuye.
33 Na ngaya koyokkogɛung ngalɔktaye keni tɔlɔmɔ zany na tɛldi ke na bo challa ke ngaya yɛbhbhɛanyu anyeye.
Nɔng hunde ngani bhakko ba ngayaye,
ale chɔllanɛno goore.
Na chɔyɛsɛ hinisi bɛna na te dhandali!
Nɔng anye wa kɔmɔgga barartina bany kumulɔng.”