Lɔga Ibbaysiyɛa :Yesusi Hira Kawarɛ Chaga
9
1 Na Yesus hunaa dhoo gangguye,
aru hirre dha bere ihineya hudhukkinyanɛa kawarɛ a chagi.
2 Na ghini :zuga gɛnyɛ kɔbhbhɛa na seyɛsɛ,
“Hira madhdhiy,
ngangaye,
mɛa ngahirra hunde a nganda kùhudhukkono kawarɛ ke chagiye go,
dha bere lɔga gɛrsa me :nɛa oo messɛ :zuga gɛnyɛ?”
3 Na nɔng yagɛsɛ na sɛɛsɛ,
“Ngahirra bhee kawarɛ anɛ chagiye a ngaya Tumu se kɔdhɔlay lɔga messo :nɛa bhɛa nɛnɛ na kargi :zuguye.
Ke bhɛa bere messɛa :nɛa oo :zuga gɛnyɛ lɔga gɛrsa ngayo.
4 Na mɛa hunde bho ngani a kaliye agge maya kème lɔga hira bere ekkononyi.
Nɔng bho kɔrrɔyna chɔɔ hirre dhɔnɛ zinggo ngamessɛayo ale kundɔ.
5 Nɔng anye hunde ngani kihi bay ngayaye,
kani hɔldina zuga bhakkɛa ba kumulɔng.”
6 Na nɔng hunaa yogoa ngalɔkta na tewa ushaye,
tuhɛsɛ mɔdha ba na chuchugo dhɔr na dhagɛ kawara hiraa kawarɛ chaga.
7 Na sɛɛsɛ,
“Bana ok bholonga kèe Solom na chura kawarɛ.”
(Solom a bhɛa kènɛa,
“Na kèkko.”)
Na hiri ogu na chura kawarɛ na kawarɛ oyɛ na aru bho na ogu doraa nɛnɛ.
8 Na zuga bhakkɛa ko nɔng jaa jaa na taa orrɛa hunde ogolnɛye,
hunaa orrɛaye,
se,
“Nganda ngayo hira taa ogolnɛna bay ngonu?”
9 Na yɔk gen se,
“Kèe a nɔng chi!”
Na gen se,
“Ay,
hɛttɔ,
nɔng ngayo.”
Na nɔng sɛɛsɛ,
“Kani nɔng chi!”
10 Na ghini :zugu na seyɛsɛ,
“Na kawara gunyu oninya ɛnɛng?”
11 Na nɔng yagɛsɛ na sɛɛsɛ,
“Anye wa chuchugoa :hirre kèe Yesus dhɔr na dhakkɛanyɔ kawarɛ na seaganyɔ,
‘Bana ok Solomɔ na chura kawarɛ.’
Na kokka na kuchurau kawarɛ na kawara ganyu oyɛa na karra bho.”
12 Na ghini na seyɛsɛ,
“Na mɛa ngahirronu i ori?”
Na nɔng yagɛsɛ na sɛɛsɛ,
“Inggarɛni.”
Lɔga Maragɛa :Zuga Kɔbhbhɛa Damiya Bhɛrɛsi Bhee Bassɛ :Hiriyɔye
13 Na yɔk ibhta hiraa kawarɛ chaga na dhigana bhɛa zuga kɔbhbhɛa damiya Bhɛrɛsi.
14 Nɔng kala Yesus chuchukkonɛa dhɔr na dhagɛa hiri kawarɛ na onɛnɛa bere anna Kala Ayawsuny.
15 Na ko yɔk zuga kɔbhbhɛa damiya Bhɛrɛsi ghini hiri hunde dhaa bho or ɛnɛngge.
Na nɔng sɛɛsɛ,
“Anye wa dhakkɛanyi :hirre kèe Yesus dhɔr kawarɛ na koo kuchurau na karra bho.”
16 Na zuga kɔbhbhɛa damiya Bhɛrɛsi gen se,
“Ngahirra me ngangaye,
hira ekkono :Tumu ngaanno ke ngaya damiya Kala Ayawsuny ngabhɛgɛoye.”
Na yɔk gen se,
“Na hunde kete hirre me lɔga gɛrsa,
anda ngalɔkta bu bararte me ɛnɛng?”
Na ɛkkɛnyandɛ na kendɛ kɛngɔ.
17 Na ghini hira bɔɔ kawarɛ chaga sɛgɛn na seyɛsɛ,
“Na mɛa inye ngalɔkta ngahirra wa seni ooniny kawarɛye,
seni ɛnɛng?”
Na nɔng yagɛsɛ na sɛɛsɛ,
“Nɔng ngahirra a hira yogɛsɛna zugo lɔga yokkono :Tumu.”
18 Yɔk zuga Ayhudhi hunde ngahirra a hira dha bere kawarɛ chaga na koo oninyanaye,
yɔk bere ngayɛbhbhɛayo.
Na koo eliyo chɔgɔnɛ ko jɔnɛ.
19 Na ghini na seyɛsɛ,
“Ngangaye,
nganda a erite nu taa senno,
‘Bere ihineya hudhukkinyanɛa kawarɛ a chagiye’ chi dha?
Na mɛa bho wa aru ɛnɛng?”
20 Na yɔk yaktɛsɛ na seyɛsɛ,
“Nɔng bhɛa anɛa eriya nayo ko bhɛa bere hudhukkinyanɛa kawarɛ ke chagi,
kaggaoyɔ.
21 Na nɔng hunde dhaa kawarɛ oono :nonni na mɛa bho or ɛnɛngge,
agge kimaggoyɔ.
Nɔng a hira bo goore.
Na ga ghini ɛna na lɔgɔ kudhugunogung :nɛa.”
22 Yɔk chɔgɔnɛ ko jɔnɛ bhee bere senɛ ngangaye,
a ngaya ɛngɛrsɛ gulsachina Ayhudhiye.
Yɔk zuga Ayhudhi dha bere ojjonɛ lɔgɔ sabbɔ na sennɛ,
“Hunde tɔlɔ hirre se,
‘Yesus a Kirisose,’
a kùchugu na doraa madhinɛnɛa zuga Ayhudhi lɔga Tumu ngakuni.”
23 Na aynde chɔgɔnɛ ko jɔnɛ senɛ,
“Nɔng mɛa a hira bo goore.
Na ga ghini ɛnaye.”
24 Na koo eliyo hiraa kòono kawarɛ sɛgɛn,
na seyɛsɛ,
“Inye ga tɛngɛr Tumu na dhugunogiy lɔga ku dhere dib.
b Nɔng ngahirra ibbayseinyde hunde a hira messo lɔga gɛrsaye,
agge kaggaoyɔ.”
25 Na nɔng yagɛsɛ na sɛɛsɛ,
“Hunde ngahirra a hira messo lɔga gɛrsa oo ngamessooye,
anye kimagiyɔ.
Yɔk lɔkte kagga :anynyoye a ngaya bere kawarɛ annɛany chagi na mɛa korɛ bhoye sɔng.”
26 Na yɔk ghini na seyɛsɛ,
“Ngangaye,
wa mesiny ɛnɛng?
Na kawarɛ ooniny ɛnɛng?”
27 Na nɔng yagɛsɛ na sɛɛsɛ,
“Hunaa koyogogungɔ na ngani ngashikkonyuo.
Na mɛa senno kòyogogung na shigi sɛgɛn na mesigi ɛnɛng?
Ngangaye,
ko igge senno te zuga kɔbhbho nɔng dha?”
28 Na yɔk dhɔmɔ gɛrrɛng gɛrrɛng na seyɛsɛ,
“Hirre kɔbhi nɔngge ani :inynyo.
Nɔng agge kanno zuga kɔɔbhbho Muse.
29 Nɔng Tumu huna bere mɛzzinɛna ko Muse,
kaggaoyɔ.
Na nɔng ngahirra hunde kun oriye,
agge kimaggoyɔ.”
30 Na nɔng sɛɛsɛ,
“Nɔng ngahirra wa oyoonyɔ kawarɛ,
na igge ngaya imagɛo gɔrre kunɛ :nɛaye,
kìwachiyɔ!
31 Nɔng hunde Tumu shik hira eterrisanna nɔng na bhugɛsɛna lɔga ajjɛa :nɛa,
na hira messo lɔga gɛrsa ngashikkoye,
agge kàggayɔ.
32 Nɔng bɛrgua bere kìshigeonɛa ba ko mɛa toye,
hirre ibbaysi hira hudhukkinyana kawarɛ ke chagi,
ngani kìshigito dhul ko kingi.
33 Na hunde ngahirra Tumu ngaekkono na kuni,
anda bhee messɛ lɔkte ku nganga ninggɛ.”
34 Na yɔk hunaa shikkɛa ngalɔktaye,
seyɛsɛ,
“Inye ihineya bere hudhukkinyanɛi,
ani hira gɛrsa lɔmi ridhing!
Na mɛa seni madhiy agge ɛnɛng?”
Na chugu na obhonisi bhɔ.
Lɔga Kawarɛ Chaktina Lɔga Tumu Ngakɛ̀yɛbhɛayo
35 Na Yesus shigu hunde dhaa zugo chugu hiriye.
Na koo ogu na lameo na jɔa.
Na ghinu na sɛɛsɛ,
“Hiri Hoynɛ yɛbhiyɔ?”
36 Na ko nɔng hiri ghinu na sɛɛsɛ,
“Komorue,
Hiri Hoynɛye seni kɛ̀yɛbhte a nonni?
Ga yogogonydɔ!”
37 Na Yesus sɛɛsɛ,
“Nɔng mɛa wa aru na chɔɔ a nganda allinɛno ko inye nigiteye rɛ.”
38 Na sɛɛsɛ :hiriyɔ,
“Komorue,
kɛyɛbhbhinydɔ.”
Na tɔgɔdhɛsɛ kɔmma.
39 Na Yesus sɛɛsɛ,
“Anye huna bere kuguni ba ngaya bere kuguni na kègen lɔga zugony kumulɔng na ga kawarɛ chaga kargi bho,
na gee orrɛ bhoye kawarɛ kidhitɛyɔ.”
40 Na zugaa ɛlla ngonu kɔbhbhɛa damiya Bhɛrɛsi gena hunaa shikkɛa ngalɔktaye,
se,
“Ay!
Ngalɔkta ɛl ɛnɛng wa?
Na mɛa ko agge kawarɛ anniy dhittinɛ dha?”
41 Na sɛɛsɛ :Yesusi,
“Hunde kawarɛ keteung chagi,
anda ridhing ngalɔmmoo.
Na nɔng ngaya mɛa senɛo korro bhoye,
dhaa ngani lɔmmo ridhing chi.”