Lɔga Abhanyisiyɛa :Yesusi Zuga Ku 5,000 Amissɛyɔ
6
1 Na kali kona koo Yesus bana na erreu gonggulɔ na ogu chɔɔ Yirisiya Gelila tandɔ.
Nɔng ngayirisitonu sar gena keli Tibirado.
2 Na zuga bo mɛra kɔbhɔ nɔng ke ngaya wa dhaa orɛ lɔga messo :nɛa bu barara bhɛa zuga ilagassɛaye.
3 Na nɔng Yesus tɔdhɔ ko zuga kɔbhbhɛa nɔng dhum na tɛldi bay ngonu.
4 Nɔng ngakaldonu kolea senno kussɛ :zuga Ayhudhi Gibiriya nɛ Basika bere iho jaa.
5 Na Yesus dhɔnga sabba na aru zuga bo mɛra hunde hony gɔra nɛnɛye.
Na ghinu Bhilibhos na sɛɛsɛ,
“Na mɛa ale tilɛnde ammɛ :ngazuktaye kàtallana ori?”
6 Nɔng dha bere Yesus lɔga senno keme gayɔ,
na ghin tɔllɔng ke bhɛa senno kilobɛ hung.
7 Na nɔng Bhilibhos yagɛsɛ na sɛɛsɛ,
“Chɔɔ hunde kibhta birinyaa kàgadhiyɛa hira messo zinggo taginya issey na kàtalday amissɛa na kɛ̀ngɛrtɛsɛ chinyi chinyi kumulɔng,
ngahɛtinɛnɛo.”
8 Na bhɛa zuga kɔbhbhɛa Yesus nɔng gochonga Simon Betirosi kèe Indiriyas seu,
9 “Bheya erite lɔ tilɛna gosoyny hayna ko urguse chichi ku ramman ihe.
Na ale ko ngazukta kumulɔng hɛtinɛnɛyɔ dha?”
10 Na Yesus seu,
“Ga yoktɛsɛ zugo na kɛtɛlda bay!”
Nɔng ngonu bere lɔmma lanjoya bo mɔrɔdhɔga na zugo kumulɔng tɛlda bay.
Yɔk zuga maya kumulɔng heo bere anna 5,000.
11 Na Yesus ibha tilɛnaa gina na tuhu Tumu na ngɛrɛsɛ zugaa ɛlla bay.
Na ibha urgusaa gina na tuhu Tumu nganga sɛgɛn na ngɛrɛsɛ.
Na yɔk usigi ko bhee chassɛ.
12 Na hunaa ussɛa kumulɔng na chayaye,
Yesus sɛɛsɛ zuga kɔbhbhɛa nɔng,
“Amissɛ hande dhɔynɛye muktɛɛ bhee dhɔnɛ,
ngakusurrandɛ na kagarayɛ.”
13 Na yɔk zuga kɔbhbhɛa nɔng mukta urutaa dhaa churinyana ngatilɛnda gosoyny ku haynaye na dhi gɛlachin tɔmmɔn ko ramman dhik dhik.
14 Na hunaa zugo orrɛa ngalɔkta bu barar me :Yesusiye,
iwachiyɛ na se,
“Kèe dhaa nganda a hira bere sennɛa ale kun na yogɛsɛn zugo lɔga yokkono :Tumu ba kumulɔng dhere chi.”
15 Na Yesus tagu hunde se kayɛ komorumo gidhdhingɔye,
na kɛnga rɛ bhiy sɛgɛn na ogo surr kutul konnɔ.
Lɔga Woyɛa :Yesusi Ma Tundɔ
16 Na hunaa bho barsaye zuga kɔbhbhɛa nɔng shittɛ gɔrre yirisinyde.
17 Na koo irrɔgɔ gonggul na banda na kerre Kibiromɔ.
Na yɔk huna bere hɛa,
bho bere anna bar na chɔɔ Yesus yɔk ngani kɔɔbhbhao.
18 Na huroy yirisiyɔ toye bere anna bu na maa yirisiny chukkinɛna goore.
19 Na yɔk zuga kɔbhbhɛa Yesus hunaa hɛa gonggulɔ na dokkɛa ko rɛnaye,
b argi Yesus hunde woono ma tundɔ na se kuturbhan yɔkte na tɛngɛrɛ bho goore.
20 Na nɔng sɛɛsɛ,
“Kani anye!
Bho ngaɛngɛrso!”
21 Na yaktɛɛ hinisi na tɛhɛndɛsɛ wochin na kidhi gonggulɔ kari.
Na koo ago na daga yirisi dhey shaw hung.
22 Na bhorroyɔ zuga bare dhɔynɛna yirisiyɔ tandɔ taga hunde gonggul dha bare a dhɔnɛ sɔng na zuga kɔbhbhɛa Yesus hɛ bhichang na ko Yesus gonggulɔ kari ngani kidhittoye.
23 Na gongguloa honynyo Tibiradosɔ gena hoya na daga yirisi tugɔ jaa bhɛa bare ammɛa :zugu tilaa tuhɛa :Yesusi Tumu.
24 Na hunaa zugo takta bhɛa Yesus ko zuga kɔbhbhɛa nɔng ngonu ningginɛnaye,
irrɔgɔ gongguloaa honynyo na ago Kibiromɔ na kalami Yesus.
Lɔga Yokkonɛa :Yesusi Hunde Nɔng A Tilaa Basseynyde
25 Na zugo hunaa hɛa na orrɛa Yesus yirisiyɔ tandɔye,
ghini na seyɛsɛ,
“Hira Madhdhiye,
ngaya kuni minang?”
26 Na nɔng yagɛsɛ na sɛɛsɛ,
“A challi,
ga shigitɔ!
Igge mɛa bhee lamiyɛanyuye a ngaya wa ammeo amissɛ na chasseoye.
Ke bhɛaa orɛo lɔga bu barara kemesi :anynyo,
ngayo.
27 Na mɛa igge zinggoa jɔanɛo amissɛa ale mujjusso na garsa ngamesso.
c Mesigi zinggoa jɔanɛo amissɛa lɔmma basseya iho dhul ale ɛdhdhɛttannɛungu :Hiriyɔ Hoynɛ.
Nɔng a hira bere sennana :Babaa Nɛnɛ Tumu na ajjɛa buyn bhɛa ngalɔkta.”
28 Na yɔk ghini na seyɛsɛ,
“Na mɛa hunde kenno kèmesso lɔkte hin :Tumuye,
maya kemesso ɔng?”
29 Na nɔng yagɛsɛ na sɛɛsɛ,
“Yɔk lɔkte hin :Tumu na kèe mesigite a ɛnɛnggeo,
se yɛbhtanyu anye,
hira bere ekkononyi :nɛa.”
30 Na yɔk ghini na seyɛsɛ,
“Na mɛa agge bhɛa kenno kɛ̀yɛbhtɛiny inye,
lɔkte bu barari anda dhɔlagiy na korroye a ɔng?
Oo anda lɔkte mesiye a ɔng?
31 Yɔk kokonginyaa gayo annaa bere ussa tilaa kèleo ‘Manna’ korugiye,
d damiya lɔga Tumu bere kɔ̀gɔdhdhɛsɛna dadab na sennɛa,
‘Nɔng bere kuyɛyɛa tilaa kèe “Manna” tumɔ na aynɛa na ussa.’”
32 Na nɔng Yesus sɛɛsɛ,
“A challi,
ga shigitɔ!
Ngatilaya ku dhere kòhonyɛ tumɔye ajjung :Babaa Nanu.
Muse ngani kaungo
33 ke ngaya ngatilaya Tumuye anɛ na kunno tumɔ na ajjɛa zuga bhakkɛa ba kumulɔng basseyte.”
34 Na yɔk ogolo na seyɛsɛ,
“Komorue,
ayiy ngatilaya ku ngangaye kali kali.”
35 Na nɔng sɛɛsɛ,
“Tilaa basseyny kani :anynyo.
Na inde kun gɔra nanuye,
ale hozzo ngani ngadhakko dhul.
Na inde yɛbhbhanyde,
ko nɔng huny ale ngani ngadhakko dhul.
36 Nɔng damiya bɔɔ koyokkogɛungu annaa artanyu na ngani yɛbhtanyuo.
37 Na yɔk zuga ajjanyi :Babaa nanu kumulɔng ale hony gɔra nanu.
Na gee honyde ngakahangiyo
38 ke ngaya bere kugunɛ tumɔ na kùrrugɛsɛ lɔga ekkonɛanyi :Tumuye.
Bhee bere kugunɛ na kèmesɛ lɔga sabbaa nanu,
ngayo.
39 Na lɔga Babaa nanu bere ajjanyi na ekkonɛanyi a ɛnɛnggeo,
kèe kɛ̀bhɛk zuga bere ajjanyi kumulɔng na chɔɔ dhɔnɛ ngakiggarisi na kala ale wurtune kɔ̀dhɔngnga rɛsɛyɔ.
40 Na sɛgɛn lɔkte hin :Babaa Nanuye gena,
a ngaya kèe inde orrony anye Eriya Tumu,
na yɛbhbhanyde,
kɔjɔa basseya iho dhul na kala ale wurtune kɔ̀dhɔngnga :anynyo rɛsɛɔye.”
41 Na hunaa zuga Ayhudhi shikkɛa bhɛa senɛa,
“Tilaa bere kunno tumɔ kani :anynyoye,”
mɛzzi girɔngichinne.
42 Na se,
“Nganda ngaanno eriya jɔnɛ ko chɔgɔnɛ kàggaa?
Ngaanno eriya Yosebi kèe Yesus?
Na nɔng dha,
‘Anye bere kuguni tumɔ,’
se ke ore?”
43 Na nɔng Yesus yagɛsɛ na sɛɛsɛ,
“Kɛngɔ girɔngichinne ngamɛzzeo!
44 Nɔng inde kun bhɛa nanuye a hira lammana :Babaa Nanu bere ekkononyi sɔng.
Na hunde kun gɔra nanuye,
anye kala ale wurtune,
kɔdhɔngngan rɛsɛyɔ.
45 Yɔk lɔga bere kɔdhdhɛsɛnɛa :zuga yogɛsɛnɛa zugo lɔga yokkono :Tumu dadab annaa sennɛa,
‘Zugo kumulɔng ale madh :Tumu.’
Na ga kàmadhɛsɛna na shikkɛa lɔga Babaa Nanu kumulɔng ale hony gɔra nanu.
46 Nɔng hirre bere or Baba Nanu Tumu ninggɛ dhul.
Nɔng inde bere or nɔngge a :hira bere kunno bhɛa nɛnɛ sɔng.
Kona ngani karro dhul.
47 Na mɛa ga shigi shɛɛ!
Inde yɛbhbhany anyeye nɔng lɔ basseya iho dhul.
48 Tilaa basseyny kani :anynyo.
49 Yɔk kokonginyaa gu annaa bere ussa tilaa kèleo ‘Manna’ korugiye na chɔɔ erta.
50 Na nɔng tilaa kunno tumɔ na kènno kusigi :zugu na ko kingi ngarɛsɛ,
a nganda.
51 Tilaa basseyny bere kuguni tumɔ kani :anynyo.
Na inde am ngatilayaye kàjjɛ basseya iho dhul.
Nɔng ngatilaya a ngaayukta nan ale kajjɛ zuga bhakkɛa ba kumulɔng na kɔtɔlɔmɔ basseyte.”
52 Na zuga Ayhudhi ɛkkɛnyandɛ kɛngɔ na se,
“Na mɛa dha ngahirra se kayiy ayuga rɛa nɛnɛ na kùsigi ɛnɛng?”
53 Na nɔng yagɛsɛ na sɛɛsɛ,
“A challi,
ga shigitɔ!
Hunde Hiri Hoynɛ ayuga rɛa nɛnɛ ngani usigito na nyawaa gɛnyɛ irgitoye,
bassey ninggɛnungɔ.
54 Na nɔng inde am ayuga rɛa nanu na ma nyawaa ganyuye,
lɔ basseya iho dhul.
Na ale kala wurtune kɔdhɔngngan rɛsɛyɔ
55 ke ngaya ayuga rɛa nanu anɛ amissɛa ku dhere na nyawaa ganyu anɛ gala kàmatta ku dhereye.
56 Nɔng inde am ayuga rɛa nanu na ma nyawaa ganyuye,
anye ko nɔng ngakegennɛnoo dhul.
Kɛllo kari tii na kanno dhɔnɛ.
57 Na damiya bere ekkonɛanyi :Babaa Nanu lɔmma basseya iho dhul na ajjanyi ngabasseytonu,
ko nɔng inde am ayuga rɛa nanuye,
ale kajjɛ basseya iho dhul.
58 Tilaa bere kòhonyɛa tumɔ a nganda.
Nɔng ngatilaya ko na kèe Manna bere ammɛa :kokonginyaa gu ngahɛtto.
Yɔk zuga bere ammɛa ngatilaonu annaa bere tɛlda na koo erta.
Na yɔk gee ammɛ ngatilayaye ale kàjjɛ basseya iho dhul.”
59 Yɔk ngalɔkta agga bere yokkono kala bere madhɛa zugo doraa madhinɛnɛa zuga Ayhudhi lɔga Tumu iho Kibiromɔ.
Lɔga Zuga Bo Mɛra Kɔbhbhɛa Yesus Na Koo Dhɔyɛa Nɔng
60 Na zuga kɔbhbhɛa Yesus ga bo mɛra hunaa shikkɛa ngalɔktaye se,
“Na dha yokkono ngalɔkta bu dhandalde,
na kishik :nonni?”
61 Na Yesus tagu zuga kɔbhbhɛa nɔng hunde mɛzzɛɛ girɔngichinneye,
na sɛɛsɛ,
“Ngangaye,
ngalɔkta ɛllagungɛ gɛrrɛng dha?
62 Na igge hunde mɛa argi Hiri Hoynɛ hunde bana na wok gɔra bere kunɛaye,
anda senno se ɛnɛng?
63 Nɔng inde ajjɛ zugo basseya iho dhulde,
a :Kuloya Tumu.
Yɔk lɔga messɛa :zugu sabbiya gɛ na kɔjɔyay basseya iho dhul,
hologun ninggɛ.
Na yɔk ngalɔkta wa koyokkogung :anynyoye agga yokkono :Kuloya Tumu na ajjɛa zugo basseya iho dhul.
64 Na yɔk bhɛa nu zuga ngalɔkta ngayɛbhbhɛayo gena ɛllɛ.”
Nɔng bhee Yesus senɛ ngangaye,
a ngaya dha bere sabbɔ gaɛ zukte nɔng ngayɛbhbhɛoye ko inde ale kɔdhdhɛsɛn nɔng mirɔgaye.
65 Na tɔrɛ sɛgɛn na sɛɛsɛ,
“Ngaya a bhee wa kesennagɛung,
‘Inde kun bhɛa nanuye a hira lammana :Babaa Nanu sɔngge.’”
66 Na zuga kɔbhbhɛa nɔng ga bo mɛra hunaa shikkɛa ngalɔktaye,
dhɔyɔ Yesus na ngani ngakɔbhbhɛo.
67 Na nɔng Yesus ghinu zuga bere bɛrrana :nɛa ku tɔmmɔn ko ramman na sɛɛsɛ,
“Na ko igge senno dhɔttɛanyuyɔ ka?”
68 Na Simon Betiros yagɛsɛ na sɛɛsɛ,
“Komorue,
anda ale kɛhɛo bhɛa nini?
Lɔga ajjiyɛa basseya iho dhul lɔmi :inynyo.
69 Na chɔɔ hunde ani Hira Kullɛna Bere Bɛrraninyi :Tumuye wa kàtaktinyɔ na kɛ̀yɛbhtinyɔ.”