Lɔga Madhɛa :Yesusi Nikodhimos
3
1 Na bere lɔmma hirre kèe Nikodhimos kɔbh damiya Bhɛrɛsi,
na bhɛa gulsachina kedhdhɛa lɔga zuga Ayhudhi,
kona a :nɛa.
2 Na barɔ ogu na assa Yesus na sɛɛsɛ,
“Hira Madhdhiy,
a hunde ani hira ekkoninyi :Tumu na madhdhagiy lɔgɔye,
kaggaoyɔ ke ngaya mesɛ ngalɔkta bu bararte.
Inde ajjiny bhɛa mesɛi ngalɔktaye a Tumu sɔng.
Kona ngayo.”
3 Na Yesus yagɛsɛ na sɛɛsɛ,
“A challi.
Ga shiktɔ!
Hunde hiri sɛgɛn ngani kùhudhukkiyaayoye,
bhee lɔmɛ :Tumu,
ninggɛ.”
4 Na nɔng Nikodhimos ghinu na sɛɛsɛ,
“Hunde hiri te buye,
ale sɛgɛn hudhukkinya ɛnɛng?
Anda ale wogɛsɛn jɔnɛ kɛngɔ na hudhukkinya sɛgɛn?”
5 Na nɔng yagɛsɛ na sɛɛsɛ,
“A challi.
Ga shiktɔ!
Hiri hunde ma ko Kuloya Tumu ngani kùchuruttoye,
b bhee kɔɛ na assanɛ Tumu na lɔmɛ ninggɛ.
6 Yɔk zugo rɛhiya gɛ a ayugɛna ko giga.
Na erroa gɛ hudhukkonɛa ko yɔk a nganga.
Na nɔng Kuloya Tumu hudhukkono kuloy.
7 Na hunde kesennaginy,
‘Igge maya hudhukkinyano sɛgɛnde,’
ngaiwachinɛni.
8 Nɔng ngɔyɔ a nganda ɛbbɛk na kɔ gɔrre hinde na hunde rɔkte,
shigiye.
Na nɔng hunde kun ori na kɔ oriye,
imagiyɔ.
Na ko nɔng Kuloya Tumu hunde mesinɛ ɛnɛngge,
kìmaktɔ.
Na ko yɔk zuga hudhukkono :Kuloya Tumu kumulɔng a nganga.”
9 Na nɔng Nikodhimos ghinu na sɛɛsɛ,
“Ngangaye ngalɔkta a ɛnɛng wa?”
10 Na nɔng yagɛsɛ na sɛɛsɛ,
“Inye ngaaniyo hira madhɛsɛni zuga Isirayeli lɔgɔ?
Na ngalɔkta imagi ɛnɛng?
11 A challi.
Ga shiktɔ!
Lɔga kaggao :aggeu,
a gee koyogɛsɛno zugoye.
Na ga korrono kawarre,
a gee kɔɔbhɛsɛno zugo dibte.
Na yɔk lɔga korrono :aggeu kawarre,
igge ngahinnoo.
12 Nɔng anye a nganda koyokkogung lɔga ɛlla bay ngaya na ngayɛbhbhooye.
Na mɛa hunde kòyogogung lɔga ɛlla tumɔ,
anda ale yɛbhbho ɛnɛng?
13 Hirre bere kɔ tumɔ na ga lɔga ɛlla ngonu,
kona ninggɛ dhul.
Ga :Hiriyɔ Hoynɛ sɔng,
naa bere kunno ngonu.
14 Na damiya bere ilagɛa :Muse kono korugiye,
ko nɔng Hiri Hoynɛ maya ale kilak ngadamitonu
15 na zukte yɛbhbhɛ nɔngge kumulɔng ale kɔjɔya basseya iho dhul.
16 “Nɔng Tumu annaa bere ibhɛsɛa zugo kumulɔng hini goore na chɔɔ ibhaa Eriya Nɛnɛ dhɔnɛna na aynɛa.
Na gee yɛbhbhɛ Eriya Nɛnɛye kumulɔng ale kɔjɔya basseya iho dhul na ngagarsɛ.
17 Nɔng huna bere ekkono eriya nɛnɛ ba,
bhee bere ekkonɛ na kujjuga zugo ngayo.
Bere ekkono na kibbaysiyɔ.
18 Na hirre yɛbh eriya nɛnɛye nɔng ngakujjukkanao.
Na nɔng inde ngayɛbhbhoye bere kùjjuktaa,
ke ngaya eriya Tumu dhɔnɛna ngani kɛyɛbhɛoye.
19 Yɔk lɔga zugony bere kedhdho :Tumu a ɛnɛnggeo,
‘Hɔldin annaa bere kowa ba na yɔk zugo tamarta.
Na bhɛa senno kɛtɛhɛndɛ hɔldin,
tɛhɛnda kɔrrɔyn ke ngaya mesɛ kuhuyamoye.’
20 Yɔk zuga messɛa kuhuyamo kumulɔng marrɛ hɔldin.
Se lɔga gɛ gɛrsa ngakudhugundiyaa na aynde gɔra hɔldinuny ngahonynyɛoye.
21 Na nɔng inde me lɔga ku dhereye kun gɔra hɔldinuny ke ngaya lɔga gɛnyɛ kèe kudhugundiya tok na kàtaktɛ hunde dha bere ɛana :Tumuye.”
22 Na koo Yesus ko zuga kɔbhbhɛa nɔng banda na ago baa Yudha bhokkonnɔ na tɛldi kari ungge muchugi ngonu na nɔng churu zugo.
23 Na ngakoleonu ko nɔng Yohanis bere churro zugo baye kèe Henon i Salemɔ jaa ngoonu,
ke ngaya ma anɛ mɛriye.
Na zugo bere honynyo kali kali na kùchurutɔ.
24 (Nɔng ngakaldonu bere anna kolea Yohanis ngani kɛ̀chɛbɛtayo.)
25 Na zuga kɔbhbhɛa Yohanis ko hira Ayhudhi kona ɛkkɛnyandɛy damiya kònyonɛa ridhing.
26 Na zuga kɔbhbhɛa Yohanis hoya na assa nɔng na seyɛsɛ,
“Hira Madhdhiye,
hira bere ɛllo Yordanosɔ tandɔ kari na inye kɔbhbhagiy lɔga gɛnyɛ,
ko nɔng mɛa a ngandonu chur zugo na zugo kumulɔng hɛ bhɛa nɛnɛye.”
27 Na nɔng Yohanis yagɛsɛ na sɛɛsɛ,
“Tumu hunde hiri lɔga kènno keme ngani kaynɛoye,
bhee mesɛ ga sabbaa nɛnɛ ninggɛ.
28 Nɔng anye annaa bɔɔ keseni,
‘Anye Kirisos ngakaniyo.
Kani hira kèkkononyi na kijimmani sabbɔ hunde nɔng ngani kugooye.
Na chɔɔ igge sabbiya gu anno zuga bɔɔ shikkano ngalɔkta nyawa.’
29 Chɔɔ ga kɛ̀lɛhɛnagung lɔga wololo.
Kolea wololo ɛnaa tɛriyny a :roriyɔ.
Na bàra dori kùduriyɛa i kɔk na chirar lɔga yogɛsɛna :roriyɔ.
Na hunde shikte,
dɛl na hini a hɔli.
Na mɛa ngadamita dɛlɛ :barte,
ko anye bhɛa Kirisosi hini hɔllany goore.
30 Nɔng maya jorronony anye na a bu.
Na anye bhɛa nɛnɛ maya kani chinyi.
31 “Hira kunno tumɔ ko zuga bany ngahɛtto.
Nɔng a bu.
Yɔk zuga ɛlla bay ngaya agga bany na yokkonɛ lɔga bany.
Na nɔng bhɛa ngazukta ɛl bayte kumulɔng,
hira kunno tumɔ a bu.
32 Nɔng yokkono lɔga orrono kawarre ko ga shikkana nyabha na yɔk zukte hinnɛ lɔga gɛnyɛ ninggɛ.
33 Na hunde hir kona tɛhɛnu ngalɔkta yokkono :ngahirra kun tumɔye,
ngangaye dhugunnono bhɛa Tumu anɛa dhere dib.
34 Nɔng hira bere bɛrrana :Tumu na ekkono,
yogɛsɛn zugo lɔga Tumu,
ke ngaya Tumu ajjɛ nɔng Kuloya nɛnɛ na ngaɛmɛgɛsɛnnoye.
35 Nɔng Baba Tumu ibhɛsɛn Eriya Nɛnɛ hini na aynde bere ibhbhanɛ lɔgɔ kumulɔng na ajjɛ nɔng na mɛa lɔmɛ siya nɛnɛye.
36 Na hirre yɛbh Eriya nɛnɛye,
lɔ basseya iho dhul.
Nɔng inde Eriya nɛnɛ ngayɛbhbhoye,
bassey ngajɔanao ke ngaya ngani lɔmɛɛn :Tumu lɔgɔye.”