Lɔga Dogɛa :Zugu Go Na Senno Kɔgɔndɛ Yesus
26
1 Na Yesus hunaa madhɛsɛa zugo ngalɔkta kumulɔng na tewa ushaye, koo sɛɛsɛ zuga kɔbhbhɛa nɔng, 2 “Nɔng igge gao chi hunde ale kɛ̀l ungo ramman na ba a Gibiriya kèe Basikaye. Na ngakoleonu ko nɔng Hiri Hoynɛ ale kàjjɛ mirɔga na kilagatɔ.”3 Na yɔk gɔldangɛa bibiyo doraa Tumu barara ko zuga Ayhudhi bibiyo koo muknyɛsɛ bhɛa bhakka :gɔldanga bo doraa Tumu barara kèe Kayama. 4 Na daktɛ Yesus go na kibhigi dari na kɔgɔdhɔtɔ. 5 Na koo se, “Maya ngalɔkta kolea gibiriyny ngakèmesso. Hunde kèmese, kako zugo ale bhorɛɛ ba.”
Lɔga Tɛriya Ɛrɛsɛna Yesus Sabba Mal
6 Na Yesus hunaa ngani iho Bitaniyagiye bhɛa hira bere amma :gedhdhe kèe Simonde, 7 nɔng tɛri kona kuyɛy butulleye kèghendono bɛye kèe albatiro lɔ mala bo ɔngɔnaa hur hur gaw dhandala. Na ɛrɛsɛ Yesus sabba bhɛa ihɛa bay ammɛa tila.
8 Na zuga kɔbhbhɛa Yesus hunaa orrɛa ngalɔktaye, churu na dɛbɛ na se, “Na mɛa dha mal nganga hung tiranyɛ kɛ ɔng? 9 Ngamalda hunde katalday birinyaa bo mɛra na kàyɛ bhoyoga, anda ngayo challi?”
10 Na Yesus tagu ngalɔkta gɛye, na sɛɛsɛ, “Ngangaye margeo ngatɛrita kɛ ɔng? Nɔng wa mesogonyɔ lɔga bo challa kɛr. 11 Yɔk bhoyoga ɛllo ko igge kari tii. Nɔng anye ko igge kari tii ngakɛllo. 12 Nɔng ngatɛrita hunaa ɛrraganyi ngamalda, wa ɛrraganyi ke bhɛa ojjɛanyi kɔk hunde ngani kèrro na kòytonyoye. 13 Na mɛa ga shigitɔ! Yɔk ngalɔkta wa me :ngatɛritaye, ale yokkɛ :zugu ba kumulɔng hande hɛyɛ na madhɛsɛnɛ zugo ngakamannaya Tumu chalde, na kàgadhdhanɛ ngatɛrita.”
Lɔga Yihudha Shiginɛnɛa Ko Mirɔga Na Kɔgɔdhɛsɛ Yesus
14 Na koo bhɛa zuga kɔbhbhɛa nɔng ku 12, na kèleo Yihudhaa Askorotu ogo bhɛa gɔldangɛa bibiyo doraa Tumu barara, 15 na ghinu na sɛɛsɛ, “Mɛa anye hunde kɔ̀gɔdhagung Yesus, igge anda ajjanyu ɔng?” Na yɔk ibhta tamuninyaa ku tomoga hɔla gaw dhandala gee ku 30 na ayɛ. 16 Na kɔdhdhanɛ ngakoleonu na nɔng Yihudha bere lameo ganggoa senno kɔgɔdhɛsɛ Yesus mirɔga na kaynɛ.
Lɔga Yesus Ammɛa Ko Zuga Kɔbhbhɛa Nɔng Gibiriya Basika Na Kennɛnɛa
17 Na hunaa tewa unga ku sabba ammɛa :zugu Gibiriya Kàmmɛa Lottayiye, yɔk zuga kɔbhbhɛa Yesus hoya gɔra nɛnɛ na ghini na seyɛsɛ, “Amissɛa ami Gibiriya Basika seni kèmesoginy ori?”
18 Na nɔng yagɛsɛ na sɛɛsɛ, “Ago ɔr toye ngonu bhɛa hir konnuny, na seyɛsɛ, ‘Hira madhdhiy wa senno kèseaginy, “Kolea nanu wa tewa ja. Na Gibiriya Basika kumullo ko zuga kɔbhbhanyɛa, aleo kammo doraa nunu.”’” 19 Na zuga kɔbhbhɛa Yesus koo mesigi damiyaa yogɛsɛna :nɛa na aga amissɛa senno kussigi Basikagiye na ojjigi kɔk.
20 Na hunaa bho barsaye, Yesus tɛldi ko zuga kɔbhbhɛa nɔng ku 12 bay bhɛa ammɛa tila. 21 Na hunde chinyi ngani aminɛye, nɔng Yesus yogɛsɛ lɔgɔ na sɛɛsɛ, “Ga shigitɔ! Bhɛa nu, kona aleo kɔdhdhagany mirɔga.”
22 Na yɔk munyu goore na ghini bhiy bhiy na seyɛsɛ, “Komoru, nɔng anye ngakaniyo, oo kani anye ka?”
23 Na nɔng yagɛsɛ na sɛɛsɛ, “Hirre aleo kɔdhdhagany mirɔgaye, a hiraa kɛhɛyɛo sɛnɔ kɛdhɛmɔ na kumuruchchono tila kari. 24 Nɔng Hiri Hoynɛ damiya bere lɔga gɛnyɛ kɔ̀gɔdhdhɛsɛna dadab, ale kɔyɔ. Na nɔng hirre kɔdhdhɛsɛn nɔng mirɔgaye ale ruɛ rɛ. Nɔng chɔɔ hunde bere ngairritinya, anda a challi.”
25 Na hira kèleo Yihudha aleo kɔdhdhɛsɛna nɔng mirɔga, ghinu Yesus na sɛɛsɛ, “Hira Madhdhiy, nɔng anye ngakaniyo, oo kani anye ka?”
Na yagɛsɛ :Yesusi na sɛɛsɛ, “A ngadamita senɛ :inynyoye rɛ.”
26 Na yɔk hunaa ngani aminɛnaye, nɔng Yesus ibha lottay na tuhu Tumu na ngɛru na aynɛ zuga kɔbhbhɛa nɔng na sɛɛsɛ, “Nɔ ussigiyɛ! Nganda a rɛa nanu.” 27 Na ibha kombiya lɔmma woyna kùchudhdhana na tuhu Tumu na aynɛ na sɛɛsɛ, “Irto :iggeu kumulɔng! 28 Ngagiya a nyawaa ganyu kaalgalɛi zugo ga mɛra na kibhiigɛi lɔga ngani chaga onyonɛa ridhingɛa kumulɔng na ujjugɛa na garsɛa. 29 Na mɛa ga shigitɔ! Anye kɔdhdhanɛ ngakalda na ngawoynda sɛgɛn ngakamayiyo dhul ko bhee ale kàmayɛ ko igge kari na ngani kùchudhdhana kolea ale lɔmɛa :Babaa nanu zugo.”
30 Na hunaa ɛrta Tumu yelloyɔ na tewa ushaye, dhɔyɔ ɔr na ago Kutula Girarruny.
Lɔga Yokkonɛa :Yesusi Lɔga Ale Imagɛa :Betirosi
31 Na koo Yesus sɛɛsɛ zuga kɔbhbhɛa nɔng, “Igge ngabarta, koo dhɔttanyu na bhasanɛno kumulɔng ke ngaya aleo orɛo lɔga kodokkoni :anynyoye. Nɔng anye bhee kesennagɛung ngangaye a ore go, ngalɔkta agga bere kɔ̀gɔdhdhɛsɛna dadaba lɔga Tumu sennɛa,
“‘Anye ale kinisi hira iwonɛna
na mɛdɛrniya gɛnyɛ bhasanɛyɔ.’
32 Na nɔng anye hunde ale kabanau rɛsɛyɔ na te ushaye, ale kijimi Gelilagiye na kìtinyanɛnɛ ngoonu.”
33 Na sɛɛsɛ :Betirosi, “Chɔɔ yɔk kumulɔng hunde kɔdhɔttiny na kabhasayɛ ke ngaya orɛ lɔga dokkoni :inynyoye, nɔng anye ngakɔdhɔttinyo dhul.”
34 Na yagɛsɛ :Yesusi na sɛɛsɛ, “Ga shiktɔ! Inye aleo ngabarta hunde kobiya ku sabba ngani kɔrɔkkoye, imaggany jagarɛ kɛngi sizzi.”
35 Na nɔng Betiros kalda yogɛsɛ Yesus lɔgɔ ke dhandali na sɛɛsɛ, “Chɔɔ ko hunde kàdaga lɔkte bu dhandali kɛ̀rɛsɛ ko inye kari, anye ngakimagginyo dhul.” Na zugaa kɔbhbhɛa Yesus ku gena, ko yɔk kɔbhɔ tuga Betirosi na se nganga kumulɔng.
Lɔga Yesus Allinɛnɛa Ko Tumu Getesemaniyagiye
36 Na koo Yesus ko zuga kɔbhbhɛa nɔng banda na ago bhee kèli Getesemaniya. Na nɔng Yesus sɛɛsɛ zuga kɔbhbhɛa nɔng, “Igge ga tɛldi ngaya hunde anye ngani kɔgɔ ngonu na kallinɛno ko Tumuye.” 37 Na ibha Betiros ko erroa Zɛbɛdosi ku ramman na dhi kari. Na hunde hɛye, nɔng tɔgɔdhay shura na munyuu goore. 38 Na sɛɛsɛ, “Anye hinisa nanu wa ɛsɛdhdha lɔgɔ na kushurɛu goore na chɔɔ rɛa nanu ngani ngakoriyo. Na mɛa igge ga tɛldi ngaya, na tɛldi tunɔ hunde nande!”
39 Na nɔng sɛyɛ ko rɛna bhe chinyi na dhagɛ rɛ ba ke shura na mumɔ tɔgɔdhɛ ba na alliyɛ ko Tumu na seu, “Babae! Hunde ɔande, isogɛ ngakombita chɔllaunyde bhɛa nanu. Na nɔng any kubhugnyɛsɛ :lɔga sennani :inynyo. Ga kesennani :anynyo ngabhugnyɛsɛnɛ.”
40 Na koo waga chɔɔ bhɛaa dhɔyɛa zuga kɔbhbhɛa nɔng, na aru hunde dhaa tunggioye. Na eliu Betiros na ghinu na sɛɛsɛ, “Na igge wa rɛgung chɔɔ bhɛa kɛ̀llanɛa ko anye tunɔ sati dhɔnɛ sɔng, na ngani ngaɔanoo dhul? 41 Tɛldi tunɔ na mɛdhta na alliyɛ ko Tumu, ngadakta lɔkte illobbungɛ. Yɔk hinisiya zugony bhɛa senno kemesɛ lɔga challa, ujjonɛyɔ, na yɔk rɛhi a laynɛ.”
42 Na koo wagu sɛgɛn, na alliyɛ ko Tumu na seu, “Baba nanuye! Hunde bhee isogɛ ngakombita chɔllaunyde bhɛa nanu ninggɛ na maya dhaa kamayi ahaye ɛl toyeye, any kete damite sennanɛ :inynyoye hung.”
43 Na hunaa wokkono sɛgɛnde, aru yɔk hunde dhaa tunggi sɛgɛn ke ngaya dhaa bhiikkanɛ :ungu na dhungɛ gooreye. 44 Na nɔng dhɔyu yɔk ngonu, na wagu sɛgɛn ke jagarɛ kɛngi sizzi na alliyɛ ko Tumu damiyaa allinɛnɛa sabbɔ.
45 Na koo waga chɔɔ bhɛaa ɛlɛa zuga kɔbhbhɛa nɔng na sɛɛsɛ, “Wa ngani ayawso na ungusso dirr? Ga gɔnyigiyɛ! Wa tewa kolea kìbhbhanɛa :Hiri Hoynɛ na kàjjɛa zuga messɛa lɔga gɛrsa. 46 Na mɛa banda kàgo! Chɔɔ hira kɔdhdhaganyi mirɔga a nganda kunde.”
Lɔga Kìbhɛa Yesus
47 Na hunde chinyi ngani yokkono lɔgɔ ngangaye, bhɛa zuga kɔbhbhɛa nɔng ku 12, na kènno Yihudha ko. Nɔng bere dhɛanɛa ko zuga bo mɛra dhaa ekkonɛa :gɔldangɛa bibiyo doraa Tumu barara ko zuga Ayhudhi bibiyo na honynyo ga bo lɔmmanɛa mashachina ko lurginya. 48 Nɔng ngahirra kɔdhdhɛsɛn Yesus mirɔgaye, dhaa sabbɔ dogɛsɛn zugo go na senɛsɛn, “Hirre ginaye aynde aleo kissai na kɔchɔmiye. Na ibhigi nɔng.” 49 Na koo ogu na assa Yesus ke tiri na sɛɛsɛ, “Hira madhdhiy, ani challi?” Na chɔmu.
50 Na nɔng Yesus yagɛsɛ na sɛɛsɛ, “Dehunya nanuye, urrugɛsɛ lɔgaa kunɛi.”
Na hunaa annaa ngangaye, zugo hoya gɔra nɛnɛ na ibhigi na chɛbɛyɛ. 51 Na hunde chinyi ngani ibhbhɛ na chibbɛye, yɔk zuga ɛlla ko Yesus kari, kona hɔrɔa mashaa nɛnɛ na busiu gaymaya kachcha gɔldanga bo doraa Tumu barara na kedhdha nyabhi.
52 Na Yesus sɛɛsɛ ngahirronu, “Yagɛsɛ mashaa nunu shebbel. Zukte hɔrɔanɛ mashachinaye, ko yɔk ale rɛsɛ mashagiye. 53 Ngangaye anye hunde kògol Baba nanu, inye seni zuga bo mɛra ku kamman ekko :nɛa gaminya 12 ngaittonnogonyo ka? 54 Nɔng mɛa hunde kème nganga, yɔk lɔga bere kɔ̀gɔdhdhɛsɛna dadabinyaa lɔga Tumu kènno kurruknyɛsɛ ngalɔkta, bhee urruknyɛsɛnɛ ninggɛ.”
55 Na koo Yesus sɛɛsɛ ngazuktonu bu mɛrte, “Na ngangaye wa lɔgɔndao mashachina ko lurginya na muktiyao na ibhtonyu huna hira kani chimtay? Anye nɔng annaa taa kihi tu kɛnga doraa Tumu barara bay na kamadhi zugo, na igge ngani ibhtonyuo. 56 Na nɔng bhee ɛrrinyanɛ ngalɔkta kumulɔngge, a ngaya kèe kurruknyɛsɛ :lɔga bere kɔdhdhɛsɛnɛa :zuga yogɛsɛnɛa zugo lɔga yokkono :Tumu dadabte.” Na yɔk zuga kɔbhbhɛa nɔng dhɔyɔ nɔng kumulɔng na ngeyo.
Lɔga Kɛ̀hɛyɛa Yesus Bhɛa Zuga Ayhudhi Bibiyo Kedhdhɛa Lɔgɔ
57 Na zugaa ibhbhɛa Yesus koo ibhta nɔng na aytɛ bhɛa gɔldanga bo doraa Tumu barara kèe Kayama. Na ko yɔk zuga madhdhɛa zugo Damiya Tumu bere kàjjɛa Muse ko zuga Ayhudhi bibiyo dha bere mukkinya na ɛl ngonu. 58 Na nɔng Betiros tɛa wurtɔ ko rɛna na kɔbhbhɛ wurtɔ wurtɔ ko bhee dogɛ tu kɛnga gɔldanga bo doraa Tumu barara. Na koo tunnugu tu kɛngɔ na tɛa bay bhɛa ɛlɛa zuga bhɛginɛna na kar Yesus hunde dha se kemesigi ɛnɛngge.
59 Na yɔk gɔldangɛa bibiyo doraa Tumu barara ko zuga Ayhudhi bibiyo kedhdhɛa lɔgɔ kumulɔng bere lamiyɛa zuga ku butoga na kamaktɛsɛ Yesus butomo na kichildɛ na kinditɔ. 60 Na ko hunde zuga bo mɛra magganɛa lɔgɔ kohoya na kɔɔbhta lɔgɔ, yɔk zugo lɔga anda kàttiyɛa nɔng ngani ngajɔanɛo dhul.
Na koo wurtɔ zukte ku ramman hoya, 61 na yokto lɔgɔ na se, “Ngahirra bɔɔ yogoa lɔgɔ na sewa, ‘Anye mɛa hunde kòbolki ngadoriya Tumu bararte, na kɔ̀gɔn sɛgɛn ungo sizziyɔ, kɔgɔdhdhiyɔ.’”
62 Na koo gɔldanga bo doraa Tumu barara bana na sɛɛsɛ Yesus, “Na inye mɛa seni ɛnɛng? Ngalɔkta dhugunnonɛ :zuguye, a ɛnɛng?” 63 Na nɔng Yesus dhiyɛ rib.
Na gɔldanga bo doraa Tumu barara sɛɛsɛ nɔng, “Ga tɛngɛr Tumu, Komoruya iho basseyɔ, na dhugunogiy dib hunde ani Eriya Tumu ku Kirisose.”
64 Na nɔng Yesus yagɛsɛ na sɛɛsɛ, “A ngagiya seniye chi. Na nɔng mɛa anye kesennagung ɛnɛnggeo, igge ale orro Hiri Hoynɛ hunde i siyɔ sɛtɛna Tumu, Komoruya Bo Ɔnnɛna na kun tumɔ na bo woono idhogiyeye.”
65 Na gɔldanga bo doraa Tumu barara dɛbu na ɛrrɛyu ruma nɛnɛ na sɛɛsɛ zugo, “Na kèe nɔng wa dhɔmma Tumu! Na agge bhee kàlamɛɛ zuga orronɛa lɔgɔ kawarreye, a ore? Ga argitɔ! Nɔng igge annaa shiktao nyabha hunde dhɔm Tumuye. 66 Na mɛa senno ɛnɛng?”
Na yɔk yaktɛsɛ na seyɛsɛ, “Maya rɛsɔ!”
67 Na tusɛsɛ muma nɛnɛ mɔdha na chɔ sɛnɛ, na gen nyɔgɔ ring ring 68 na bhɔsɔrɔ na seyɛsɛ, “Kirisose, inye ani hira dhugunnoni lɔga yokkono :Tumu, na mɛa inde dhakkinyde a nɛng, ga yogogiytɔ?”
Lɔga Kɛngnganɛa :Betirosi Yesus
69 Na Betiros hunaa ngani iho tu kɛngɔye, nɔng sedhdheyte mesinɛ ngonu kona ko gɔra nɛnɛ na sɛɛsɛ, “Ko inye ani hira taa ɛllo ko Yesusa Gelila kari so.”
70 Na nɔng kɛnga lɔgɔ bhɛa ɛlɛa ko zugo kumulɔng kari na sɛɛsɛ, “Anye ngalɔkta yogiye kimagiyɔ!”
71 Na koo ogu gɔra waranuny. Na sedhdheya mesinɛna ngonu kona aru nɔng sɛgɛn na yogɛsɛ zuga ɛlla kari na sɛɛsɛ, “Ngahirra a hira taa ɛlla ko Yesusa Nazireti kari.”
72 Na nɔng Betiros kɛnga sɛgɛn, na chɔmu chɔɔ ba na seu, “Anye ngahirronu kimagiyɔ!”
73 Na koo tɛa bhe chinyi, na zugaa chillɛa ngonu hoya gɔra nɛnɛ na seyɛsɛ, “Dhaa bhɛa zuga kɔbhbhɛa nɔng kona ani :inynyo chi. Wa kàtaktinyɔ hunde mɛzziiye.”
74 Na nɔng Betiros kalda kɛnga na chɔru rɛ na sɛɛsɛ, “Anye ngahirra yokkoye, kimagi dhul!”