Lɔga Yogɛsɛna ꞉Tumu Yonas Na Shikko
3
1 Na Tumu aynɛ Yonas lɔgɔ sɛgɛn na sɛɛsɛ,
2 "Bana og ngaɔrronu bu gore ke Nɛnɛweye na madhɛsɛ zugo ngalɔkta bɔrɔ anda koyokkoginyde."
3 Na shigu na bana na ogu Nɛnɛwegiye.
Nɔ dha bere Nɛnɛwe a ɔrre bu gore.
Hunde kɔ̀gɔdhanɛ ɔr dheyɔ na ke kuluhite,
kowo ungo sizzi kari.
4 Na Yonas bhɛlu ɔr toye ungge dhɔnɛ sɔng na aynɛ zugo lɔgɔ na sɛɛsɛ,
"Mɛya kɔdhdhanɛ ngakalda,
na ɛllo ungo zugo raman na Nɛnɛwe dhitinɛyɔ."
5 Na yɔk zuga Nɛnɛwe kumulo yɛbhɛ lɔga Tumu na kata lɔga bere gɛ ɛdɛa na tɛldi huynɛn na malugu ruminyaa kìbhɛa duhu. c
6 Na hunaa lɔgɔ asanɛa komoruya Nɛnɛweye,
bana bhɛa ihɛa alleya nɛnɛ komoruny na bhuruya ruminyaa gɛnyɛ bo challa na malugu ruma kìbhɛa duhu na tɛu bay burɔ. d
7 Na koo arɛ zuga gɛnyɛ wuy na sɛɛsɛ,
"Anye ko gulsachinaa ganyu kenagung ɛnɛnggio,
ngamɛa zugo any kɛtɛldi huynɛn.
Na chɔɔ hirre dhɔnɛ ko beo ko mɛdɛrni ma ngakirgiyɛ ko amisɛ ngakusigiyɛ.
8 Na zugo any kamalugu ruminyaa kìbhɛa duhu.
Na beo ko mɛdɛrnia gɛ ko yɔk any kulubutɔ.
Na kaliɛ ko Tumu gore na kɔdhɔyɔ lɔga gɛrsa ko kuhuyamoa taa nɛ.
9 Ka ale Tumu ujuk lɔga bare wolokey na chirbhisiey na ngakɛrɛso."
10 Na Tumu hunaa oro lɔga gɛ ko bhɛa ujugɛa lɔga gɛ gɛrsaye,
chirbhisiu na dhɔyu lɔga senno kidhiyɛ yɔk.