Lɔga Bere Rɛsɛa :Ngasara
23
1 Na Ngasara hunaa oynyaa gɛnyɛ tewa 127te,
2 koo ere ɔra iho Kananɔ kèe Kiriyaba (sara ngaɔrronu gena keli Kibiron).
Na nɔng Awuraham munyuu goore na turu na ogu duhugiye.
3 Na koo bana bhɛa ihɛa tɛriya nɛnɛ rɛsa na ogu na assa zuga bhora Hitani bhakkɛa ngabaonu na sɛɛsɛ,
4 “Anye bhɛa nu ngaya kani kɔmɔniya bhora anaa.
Na mɛa ayanyu baa nu bho kona na kàtal na kòjjɛ tɛriya nanu.”
5 Na yɔk zuga Hitani seyɛsɛ,
6 “Gulsae,
ga chirariytɔ.
Inye bhɛa nayo ani gulsaa bo ɔnnɛni kàgainyi.
Na mɛa ga ok na gɔny bolkɛna gayo gee chalde na bɛra inde hiniye na ojjɛ tɛriya nunu.
Hirre ushubhbheny bolkɛna zuga gɛnyɛ bhɛa nayo ninggɛ dhul.”
7 Na nɔng Awuraham bana na tuhua zuga bhora Hitani
8 na sɛɛsɛ,
“Hunde wa igombogonyu na ayanyu bhɛa kojjɛi tɛriya nanuye,
gab ghindogonyu hira Zohari kènno Ebherom
9 na kaany ngabhogotonu i ngerreya gua nɛnɛ kèe Magabelaye na kàtal ahaye hinde.
Na ale ko anye kete bhɛa kojɛa zuga ganyu ngabaya nuye.”
10 Nɔng ngahirronu kèe Ebherombe dha bere ɛl ko zuga bhora nɛnɛ Hitani warana ngaɔrronu bay ngonu na yogɛsɛ Awuraham lɔgɔ na kishigi :zugu kumulɔng.
Na sɛɛsɛ,
11 “Komoruya nanuye,
ga shigonydɔ!
Wa kainyɔ ngabhogotonu i guyɔ toyeye ko guyɔ kari.
Na ngaya kajjɛinyde any kataga ꞉ngazukta bhorre nan kɛl ngaya kariye.
Na mɛa ok na oy hira nunu.”
12 Na nɔng Awuraham tuhu zuga ngabaonu sɛgɛn
13 na yagɛsɛ Ebherom lɔgɔ na kishigi ꞉zugu na sɛɛsɛ,
“Ga shigonydɔ.
Anye keni kàgadhieny kumulɔng.
Na mɛa ɔgɛ ahaa katalɛi gu ko bhogo kari na anye kòy hiraa nanu.”
14 Na nɔng Ebherom yagɛsɛ na sɛɛsɛ,
15 “Komoruya nanuye,
ga shigonydɔ.
Ahaa kàgadhiyɛa ngabaya a tomoga hɔla gaw dhandalac ku 400.
Na ngatomokta yɔk seni kème ɛnɛng?
Ogo oy tɛriya nunu.”
16 Na nɔng Awuraham sɛɛsɛ,
“Ay,
any kàgadhienyɔ.”
Na yɔk shiktɛy gaw,
na Awuraham toyɛɛsɛ Ebherom ngatomoktonu hɔl gaw dhandalaye damiya makkiyɛa :ngagaynyau aha na kataga ꞉zuga Hitani.
17 Na Awuraham talu baa Ebheromi iho Magabelagiye gɔra Mamirɛ jaa lɔma gu ko bhogo ko kɛna ɛlla ngerreyɔ kumulɔng na te baa nɛnɛ.
18 Na yɔk zugaa Hitani ɛlla warana orony kumulɔng taga hunde dhaa ngabaonu te na Awurahamiye.
19 Na Awuraham ojju tɛriya nɛnɛ Ngasara bhogoya iho guyɔ Magabelagiye.
Na ngabaonu a baa iho Kananɔ Mamirɛgiye jaa.
(sara Kanani gena keli Kibiron)
20 Na zuga Hitani bhiigi ko Awuraham lɔgɔ na ngabhogotonu ko guyɔ kete bhɛa ojjɛa :Awurahami zuga gɛnyɛ ko kingi na te baa nɛnɛ.