Lɔga Awurahami Ko Ga Abemeliki
20
1 Na Awuraham dhɔyu ɔra bere nɛnɛ bhakka kèe Mamirɛ na zɛgu Negebɔ na bhagu Kades ko Shur kɛrghɛn.
Na koo zɛgu Girarɔ sɛgɛn na te kɔmɔni ngonu.
Na hunaa iho ngaɔrronuye,
2 sɛɛsɛ zuga ngabaonu,
“Ngasara a ngɔnaa nanu.”
Na koo komoruya Girari kèe Abemelik egu zugo na sɛɛsɛ,
“Ago na dhigandaganyu Ngasara!”
Na yɔk ago na dhiganda.
3 Na nɔng bar konnɔ Tumu ko na yogɛsɛ Abemelik lɔgɔ kunaɔ na sɛɛsɛ,
“Ngahirrae,
ale rɛsi ke ngaya seni ɔgɛ tɛriya hirigunyde!”
4 Nɔng Abemelik dha bere Ngasara hun kona ngani kemesso na sɛɛsɛ Tumu,
“Komorue,
seni dhiyony anye ko bhora nanu lɔga ngani kɛ̀ddɛayo?
5 Bɔɔ ngasennaganyiyo :Awurahami,
‘A ngɔnaa nanu,’
na ko nɔng sennoo,
‘A goonaa nanu’ dha?
Yee,
anye ngalɔkta keni kɔgɛ nɔngge,
bare kemesi hinisa bo hɔla na ahite dununy ngani kùsso dhul.”
6 Na Tumu yagɛsɛ na sɛɛsɛ,
“Ngalɔkta hunde bɔɔ mesi hinisa bo hɔlaye anye kaggayɔ.
Na aynde kaganyɛiny bhɛa keni ngaidiranɛ nɔng na mesɛ lɔga gɛrsaye.
7 Na mɛa ngatɛrita dhiganɛsɛ hira nɛnɛ.
Nɔng hira nɛnɛ a hira yogɛsɛna zugo lɔga koyogɛsɛni ꞉anynyo.
Na inye bhɛa seni ngaerɛ,
ale nɔng ogolony anye na basiyɔ.
Hunde ngadhiganɛsɛnnoye,
nɔng inye ko zuga gunyu kumulɔng ale dheshinyanoyɔ.”
8 Na Abemelik hunaa kunawa na tewa ushaye,
bhelleyɔ eleo zuga gɛnyɛ lɔmmɛa buyn kumulɔng na kɔbhɛsɛ ngalɔkta shɛɛ na tɛngɛrɛ goore.
9 Na koo eleo Awuraham na sɛɛsɛ,
“Ngalɔkta messogiy kɛ ɔng?
Bɔɔ anye bhɛa nunu kɛddɛi ɔng lɔmmagany lɔgɔ hinisɔ na seni dhiyey ko zuga bhora nanuye?
Kèe wa inye messogiyɔ lɔga bo dhandala chɔɔ hir kona ngakèmesɛɛno.
10 Na bhee mesɛ ngalɔktaye a ore?”
11 Na nɔng Awuraham yagɛsɛ na sɛɛsɛ,
“Anye bɔɔ keseni ngabaya hirre ɛngɛrɛ Tumu ninggɛ.
Na ale ngazukta shirkannɛ tɛriya nanu na kɔdhdhanyɛyɔ.
12 Na nɔng a ngɔnaa nanu chi.
Baba nayo a dhɔnɛ na mamachinaa gayo a bhiy bhiy.
Na bere nɔng kɔgɔyɛi ke tɛriya nanu.
13 Na huna bere obhoniseononyi ꞉Tumu baa bere babaa nanu na senno kɛ̀zɛgɛ ori genne,
kesɛɛsɛu tɛriya nanu,
‘Gɔrre kizigɛye kumulɔng hunde senɛsɛn zugo,
“Ngahirra a goonaa nanuye,”
dhaa hinnony dhere chi.’”
14 Na nɔng Abemelik ibha mɛdɛrni ko beo ko gaymanyaa ngaha ko ga maya na aynɛ Awuraham na dhiganɛsɛ tɛriya nɛnɛ Ngasara.
15 Na sɛɛsɛ,
“Ga gɔny baa nanu kumulɔng na bhak bhee hiniye.”
16 Na koo sɛɛsɛ Ngasara,
“Wa kaynɛu goonu tomoga hɔla gaw dhandalaa gee ku 1000.
Na ngazukta ɛllo kariye kumulɔng kataktɛiny bhɛa anɛi hira lɔga gɛrsa ngani mesao.”
17 Na nɔng Awuraham ogolɛsɛ Abemelik Tumu.
Na nɔng Tumu koo ibaysiu Abemelik ko tɛriya nɛnɛ ko gaymanyaa gɛnyɛ ngaha na kɔtɔlɔmba erro sɛgɛn.
18 Nɔng dha bɔɔ tɛriya Abemeliki ko zuga ngaha ɛlla doraa nɛnɛ kumulɔng mar ꞉Tumu na erro ngalɔmanɛo ke ngaya doraa nɛnɛ ihɛ :tɛriya Awurahami kènno Ngasaraye.