Lɔga Tɛriya Ajɛa Tumu Tamuninya Ramman
21
1 Na Yesus hunaa gunyo zugoye,
aru zuga lɔma aha hunde ibhanɛ birinya na ojɛsɛnɛ koliteya kumugɛsɛna birinyaa kajɛa Tumuye.
2 Na aru tɛrite ku bhoyogi hunde ibhana tamuninya ramman na ko nɔng ojɛsɛnde.
3 Na nɔng sɛɛsɛ zugo,
"Ga heo gɔnyigi ngatɛrita ku bhoyogite na shiktonyuyɔ.
Ko ngagiya lɔmɛ ngaahaya bu mɛrte ngahɛto.
4 Nɔng a bhoyogi na nɔng ibhana ahaa gɛnyɛ lɔma kumulɔng na ajɛ Tumu shɛɛ.
Yɔk ngagiya lɔmɛ ahaye ajɛ bhɛlɛga."
Lɔga Bɛrgua Ale Wurtune
5 Na yɔk zuga kɔbhɛa nɔng gena ɛsɛdhɛ lɔgɔ na se,
"Ngadoriya Tumuye bere kèmeso bɛnaa bo challa.
Na ahaa bere ajɛa ꞉zugu na kemesɛ dori agga bo challa."
Na nɔng sɛɛsɛ,
6 "Ale ngaahaya oroye kumulɔng kolee nɛ ihe.
Kolea chɔɔ bɛ ko bɛ lallɛn ngaibhinɛnɛawo na nyomnɛnɛa kundɔ."
7 Na yɔk ghini Yesus na seyɛsɛ,
"Hira madhi,
ngangaye ngabɛrguonu ale kun kole inong?
Na kalde se konyomɛyte,
a minang?"
8 Na nɔng ibbayu na sɛɛsɛ,
"Ale butok gen honydɔ.
Na aminɛnɛany anye na senɛ,
‘Kolea kunɛa ꞉komoruyɔ wa tewa ja.
Na nɔng kani ꞉anyo."
Senagungɛ nganga.
Na iwo rɛhi na tɛldi kɔk.
Na yɔk ngakɔbho.
9 Hunde bɛr se kabana na ba se kɔbhɔdhɛye,
ngadɛɛso.
Nɔng bɛr ale a shaw na nɔng kolea dheshinyanɛa ꞉lɔku ngani i rɛna.
10 Na bhorinya ale kɔnnɛ kɛngɔ na manggisi ko manggisi lallɛn kɔnnɛ kɛngɔ sɛgɛn.
11 Na ba han gena chukinɛ na mutan ko hozzo a bu.
Na ale Tumu dhɔllana lɔga bo kɛ̀dɛɛsa.
12 Nɔng ga sabɔ hunde ngalɔkta ngani kohoyawoye,
ale marɛungɛ ꞉zugu lɔga ganyu na ibhongɛ na ajagungɛ gulsachinaa doraa kàmadhɛa zugo lɔga Tumu na hɛyɛungɛ doraa chibinuny.
Na yɔk ajagungɛ komortɛn ko gulsachina.
13 Na a bhee madhɛo yɔkte.
14 Na ngashurtɛ sabɔ na se,
‘Mɛya dha ale koyokkono ge ke gìyɔng?"
Te dhandale.
15 Ali kajung bho gaana ko lɔga dhugunɛsɛno mirɔga gu hologuno na dalnɛnɛa.
16-17 Nɔng ale marɛungɛ ꞉zugu lɔga ganyu.
Na chɔɔ bhɛnɛna gu ko jugu ko shɔwnggu ko gɔwnggu ko bɛkanyaa gu kɔdhagungɛ mirɔga na gen kɔdhdhɛ ꞉yɔkku.
18 Na nɔng ahite dhɔnɛ amung igge ninggɛ.
19 Hunde iritɛo na teyo dhandaleye,
jɔano baseya ku dhul.
20 Na hunde arto Yerusalem na baga ꞉mirokuye,
tagatɔ bhɛa ɔr senno konyomɛy ngangaye,
te ja.
21 Na ngakaldonu hunde se ke ngangaye,
zuga ɛla Yudhagiye yɔk kajara kutulo.
Ga ɛla ɔrɔ toye ɔr kɔdhɔyɔtɔ.
Ga ɛla ɔr dheyyɔ ko yɔk ɔr toye ngahonyi.
22 Te kala chachanɛa ꞉Tumu lɔga ɛdɛa zuga Isirayeli damiya bere kɔ̀gɔdhɛsɛna dadaba lɔga Tumu.
Na mɛya bhugunyɛsɛ.
23 Na ngakaldonu tɛrroa ku oshogi ko ga rɛhi dhidhinga bhɛa nɛ a dhandale.
Na Tumu ajɛ zugo chɔlla na kuwasɛyɔ.
24 Na zuga Yurusalemi bansɛsɛnɛ ꞉miroku na kɔdhdhɛ na gen kàbhasa na kɛ̀hɛɛ ori genne.
Na Yerusalem sɛrɛ ꞉zukte ana ko bhee dheshinyanɛ unga bere gɛ.
25 Na su ko tagi ko munyunya bhɔdhinɛ na bhɔdhanɛ bhee ɛngɛrsɛ ꞉zugu.
Na ma ko huroy yirsɛne bansɛ na bhor tan kon bay dɛɛsɛ na idhayɛ ba.
26 Na ahaa ɛla tumɔ bhɔdhinɛ na zugo ujɛ ba 'Bum,
bum' ke ngaya orɛ ba bhɔdha na dɛɛsɛye.
27 Na kɔ anye Hiri Hoynɛ ngakoleonu oronyɛ ꞉zugu hunde kidhiyano ko idhoye na kɔlɔman barartin ko dirambe.
28 Na igge hunde ngalɔkta se kubhugunyɛsɛye,
banda,
dhɔngga sabi na tɛldi kɔk.
Ngangaye,
kolea senno kibaysiyɛung ꞉Tumu te ja."
29 Na ɛlɛhɛnɛsɛ lɔk gena na sɛɛsɛ,
"Ga gɔnyigi chamochi ko kɛnɔ kumulɔng.
30 Daminyaa gɛ gaoyɔ.
Hunde urutonɛ nyawa na ujɛye,
dhakɛ bɛrgu.
31 Ko igge hunde oro zugo na bo dɛɛsɛye,
tagatɔ.
Ngangaye,
kolea senno zugo kɔtɔlɔmɛ ꞉Tumu te ja.
32 Ngamɛa ga shiktonyuyɔ,
ko bhee uturonɛ ngalɔktaye,
ngatenyda ngagarsɛo.
33 Ali ba ko Tumu yɔk garsɛyɔ.
Nɔng lɔga ganyu ngagarsɛo dhul ko kingi.
34 Tɛldi kɔk.
Ige ngashurtɛ na irgi ahaye barari na dhutti na se,
‘Agge kemeso damite kihinonoye’ na ujugu rɛhi.
Ngakaldonu lɔgɔ ngakudhulda dari na karaktung huna tarbhanyuny.
35 Ali yɔk ngalɔkta dokonɛ zuga bhakkɛa ba kumulɔng.
36 Ngakale kon kargari.
Alliyɛ ko Tumu tiyi na nyimi ngalɔkta na ale shili ko Hiri Hoynɛ kari ngakusɛung ꞉liya."