Poli y'á lɛsɛ prɛ Agripa yɛɛ lo
26
1 Agripa ni pɛn Poli nɛ:— Ń yi zoore ń ni ń lɛsɛ pɛn.»
Poli n'á wɔn sa len, a n'á lɛsɛ pɛn ci giri:
2 — Cii Agripa, a Zuwifun bɛ sɛ kənan da mə la, mǝ fɔ yi nina pəri mǝ ni mə lɛsɛ pɛn ń nɛ yi sɛ ma. 3 A buru, ń yi wa Zuwifun fu landa sɛn nkə ǹ fu susɔn tuman dɔnɛ á kun ma. Yi tɔ ma, ń fɔ taasɔ ń ni ń tɔkɔ mǝ ji.
4 A n gun ma ɲaabra ma, Zuwifun tuman yi mə jina gɔn dɔn. A buru mə ya tɔ ma tɔyɛ mun jire Zeruzalɛmu. 5 Ǹ yi mə dɔnɛ a zaan ma. Mə̀ ǹ n'a ji ǹ ni caan pɛn, ǹ y'a dɔn mə̀ mə yi Farisɛn lɛ. Farisɛn dɔ n fu Laa zɛ sɛ yi tiin tantan. 6 Laa bɛ n'á lɛkan wu yilon nɛ kǝ sɛ kǝna, mə fɔ dwarɛ yi yi wulɛ la, yi tɔ ma ya, ǹ yi ciiwɔ mǝ ma pəri. 7 Wa tɔyɛ kusi fule pra yi Laa dokɔ pini n bɔ nkə jɛn ci, a buru ǹ fɔ dwarɛ y'a la mə̀ yi lɛkanwɔ ci da zanɛ. Cii Agripa, ci fɔ dwa sɛ ci tɔ ma ya Zuwifun ni zɛda mə ma. 8 Kəcɛnɔ mə̀ kɔn! Kɔn ya kə bə larɛ a la mə̀ Laa yi zoore a n jiin yɛɛ cira ba?
9 Ma yii rɔ, mə mə yi narɛ ma mə za bɔ Nazarɛtina Yezu tɔ ma kə gɔn tuma. 10 Yi wulɛ dɔ ya mə ni zan Zeruzalɛmu. Mə ya Krista cɛladana mɔnlɛ da kasa nɔ, a buru a kanbɔlɛ cidan ya yi gɔɔn kɔ mə la. Mə̀ ǹ n'a pɛn mə̀ ǹ ni ǹ jɛ ǹ ni gin, mə yi mə lɛ kɔrɛ. 11 Mə yi yɔɔ cilo cin nɔ mǝ ni ǹ kukweye, cina ǹ ni ǹ lɛbɔ Yezu ma. Ma fɔtana bubu tɔ ma, mə yi wulɛ ǹ bɔsɛ bɔ tɔyɛn silan fu ganan dɔ n nɔ.
12 Yi ni kura gɔ pini, mə ya sa mə n wulɛ Damasi, a buru a kanbɔlɛ cidan ya zɛkɔ mə la. 13 Cii Agripa, a ni mə kura a zɛ la wulɛ, pini n bɔ waarɛ mə ya fulen gɔ ye bɔ len a n pəsa wɔsɔ fulen nɛ. A ya da ka ma nkə mə munu zɛ tɔwulen ma. 14 Wu tuma ya məna turu, mə tǝ lɛsɛ gɔ ma sɛ prɛ mǝ ji Ɛburu lɛsɛ nɔ: «Sɔli, Sɔli, kɔn ya ń yi mə kukwere? A bɔ lɔn ń yi gɔnlɛ gɔɔn ma tɔn də yi gɔnlɛ gɔɔn ma á dana lo?» 15 Mǝ t'a lɛsi: «Je yi kə ńcɛn, Dana?» Dana ni mə lɛsi: «Ma Yezu ya, ń ni mə kukwere. 16 Fo, sa ń gɔnɔ! Mə ni mə ɲa ń nɛ, cina ń bɔ ma jiɲɛlɛ lɛ. Ń bɛ ni mə ye pə kəna giri, ń da bɔ mə sɛɛrɛ lɛ ń yi pɛn. Mə bɛ da sɛ kənan ɲa ń nɛ, ń yin dɔ n pɛn. 17 Mǝ bɛ da ń ja Zuwifun nkə tɔyɛ sila mun kənan jire, mə da ń kana yin ma. 18 Ń da ǹ yɛɛ mɛ ǹ ni sɔ mute rɔ ǹ ni da fulen ma. Ǹ ni sɔ Suntana gɔɔn lo ǹ ni da Laa ma. Mə̀ ǹ ni la ma la, ǹ fu sɛ bubun da kura ǹ nɛ, ǹ ni jina jɛn ye Laa fu mun sɔbɛn jire.»
19 Poli ni pɛn:
— Cii Agripa, A n gun yi ma, mə bɛ sɛ kəna ye a n bɔ Laa ji, mə bə mə ban yi zan nɛ ba. 20 A n gun Damasi ma sina, Zeruzalɛmu nkə Zude jɛn tuma, a n wɔ tɔyɛ silan ji, ci ya mə ni prɛ ǹ nɛ: «Kə ka sɛ bubun lɛ dala kə da Laa ma, kə jina gɔn zaan wɔ, kəna bɛ ɲarɛ mə̀ kə ni ka sɛ bubun lɛ dala. 21 Yi bɔsɛ ji ya Zuwifun ni mə ye Laa fu Cin do nɔ, ǹ ni mə gun ǹ ni da mə jɛ. 22 Fo Laa n'á dɔ mə lɛ, fantan a n da kɔ pə lɛ, mə yi cina bɔrɛ a sɛɛrɛ lɛ mu ɲalɔn nkə mun don jire. A tu la jipɛlɛn nkə Moyizi n bɛ ni kəna pɛn zilɛ m'a da zanɛ, mə bə fɔ zɛɛn da yin ji ba: 23 «Krista da kukweye, aci da bɔ a bile lɛ a n'á yɛɛ cira, a n bɔ jiin ji. A yi zaanɛ a n da fulen bɔ wa tɔyɛ mun nkə tɔyɛ silan mun nɛ.
24 A n Poli kura yi sɛ yɛɛ ɲa ma, Fɛsitusi n'á kura kə lɛsɛ dolo:
— Poli, ń ɲiin pɛ banba! Ń fu sɛdɔn do yi lanba sǎ ń la.
25 Poli ni lɛsi:
—Cii Fɛsitusi, mə bə lanba lɛ ba, mə yi caan prɛ á kun ma. 26 A cii yi ci tuma waa ma, yi wulɛ ya mə yi sɛ prɛ kə fɔtiinbra a yɛɛ lo. Mə dɔ y'a dɔn m'a yi ci sɛ cin tuman kunpaa ma, a buru a bə zan jɛn dunu nɔ ba. 27 Cii Agripa, ń la yi tu la jipɛlɛn fu sɛprɛn la? Mə y'a dɔn mə ń la yi ǹ la.
28 Agripa mə̀ Poli nɛ:
— A gura ɲalɔ ń ni mǝ bɔ Krista fu mu lɛ.»
29 Poli t'a pɛn a nɛ: «A n sisa lɛ woo, a n miɲaa woo, m'a n nina Laa nɛ, a bə ra bɔ ńci jinɛn lɛ ba; fo ńci nkə kənan tunun bɛ kə tɔkɔ mə ji pəri, kə bɔ tɔn ma bɛ kəna giri, fo ǹ bə ra zɔɔnɛn da kə ma ba!»
30 Agripa nkǝ Fɛsitusi nkə Berenisi nkǝ ǹ fu mun ya sa. 31 Ǹ ya sɔrɔ mə̀ ǹ n'a prɛ ǹ ɲɛ nɛ: «A gulɛ ci bə sɛ zɛɛn zanɛ, kǝna bɛ ɲarɛ m'a n jɛ, yi ba a n da kasa nɔ ba.
32 Agripa t'a pɛn Fɛsitusi nɛ:
— M'a ci ce bə Rɔmu cii do gɔn da a nɔ ba, bɛ wu yi zoore w'a dala.