Yezu yi bɛɛrɛ kɔ mu pə sii la
(Maco 15.32-39)
8
1 Yi waa ce nɔ, zama do ya cilo dɔ. Bɛɛrɛ bɛ ban ba ǹ ni darɛ ba ba, Yezu ya lɛ ja á cɛladanan la a ni pɛn ǹ nɛ:
2 — A mun cin maka yi mə ma, a buru, ǹ lɛ mɛ cɔw yi kǝ ce mə ji, fɔ zɛɛn dɔ bə ǹ ji ǹ ni darɛ a ba ba.
3 Mə̀ mə ni ǹ kura ǹ ni wɔ paa kə bɔɔrɔ, ǹ gɔɔn da ɲana wɔ zɛ la, a buru talan bɔ jɛn yi sa.
4 A cɛladanan t'a lɛ si:
— Wu da bɔ kə bɛɛrɛ məna a din bə ci nɔ, a ni a zama ci kan?
5 Yezu tə landa ǹ la:
— Buuru ɲiin ja yi kə le?
Ǹ mə̀ ciso.
6 A ni pɛn a mun nɛ mə̀ ǹ ni ka turu. A t'a buuru ɲiin ciso sa a n baka da Laa nɛ, a ni yiyɛrɛ a ni ǹ kɔ á cɛladanan la, mə̀ ǹ n'a bǝkan ǹ tuman nɛ. Ǹ n'a jiri a zama nɛ.
7 Za misɛn n kɔn dɔ ya gura ǹ le. Yezu ya baka da Laa nɛ a za misɛn cin tɔ ma, a ni pɛn á cɛladanan nɛ, mə̀ ǹ ni yi dɔ jiri a mun nɛ.
8 Ǹ tuma n'a sɔn ǹ ni kan, a cɛladanan n'a lunku guro ǹ ni dɔ ciso pan k'a nɔ.
9 Da yira ǹ ya dɔ mu pə sii (4 000) nɔ. Yi cɛrɛ, Yezu tə zɛ kɔ ǹ la.
10 A ya wɔ a koo nɔ á loo jɛn k'á cɛladanan nɔ, ǹ ni wɔ Dalimanuta gana nɔ.
Farizɛn yi landa Yezu la kabada sɛ ji
(Maco 16.1-4)
11 A Farizɛn ya da sɔrɔ, ǹ n'a lɛ gun ǹ ni susɔn da kə Yezu. Ǹ bɛ ji ǹ n'a lɛ bwala, ǹ ya landa a la cinsi sɛ ji, kəna bə bɔ len.
12 Yezu ya sinsin wɔ fugaa a ni pɛn:
— Kɔn ya zanɛ pə mun yi ga cinsi sɛ ji? Caan ya mə ni prɛ kə nɛ, cinsi sɛ zɛɛn ba ɲa ǹ nɛ ba!
13 A tə kan ǹ ma bi, a n wɔ wɔ a koo nɔ dɔ, a n wɔrɔ a taa cɛrɛ.
Farizɛn nkə Erɔdi fu mun fu da yii bubu la sɛrɛ
(Maco 16.5-12)
14 A cɛladanan yii bə da a ji ǹ ni buurun sa ǹ ji ba, a n bɔ ɲiin gɔrɔ jinɛn nɔ ǹ le a koo nɔ.
15 Yezu t'a wɔn naa ǹ lo ci giri:
— Haya, kə kəcɛn gun Farizɛn nkə Erɔdi fu mun fu yɛ bu ma.
16 A cɛladanan tə ǹ ɲɛ susɔn:
— Buuru bǝ wu le ba.
17 Yezu bɛ bɔ a waa ma ǹ ji, a ya landa ǹ la:
— Kɔn ya kə yi kə ɲɛ susɔnrɛ mə̀ buuru bǝ kə le ba? Yii bə kə ji kə n cina sɛ bu ma ba? Kə tɔ tan ya?
18 Yɛɛrɛn yi kə la, ǹ bǝ jɛn ye ba? Tɔn yi kə la, ǹ bǝ sɛ ma ba?
19 Mə bɛ ni a buuru ɲiin sɔɔ kəkanɛ m'a kɔ a mu pə sɔɔ la, kə ya wɔ kə a lunku dɔ yɛ ja nɔ? Kə yii b'a nɔ ba?
Ǹ n'a lɛ si mə̀ dɔ yɛ fulepra.
20 — A buuru ɲiin ciso dɔ bɛ mə ni kəkanɛ m'a kɔ a mu pə sii la, kə ya wɔ k'a lunku dɔ yɛ ja nɔ?
Ǹ n'a lɛ si mə̀ dɔ yɛ ciso.
21 A t'a pɛn ǹ nɛ:
— Haalɛ pəri kə bǝ sɛ bu ma ba?
Yɛɛ tɛra gɔ yɛɛ mɛ sɛrɛ
22 Yezu nk'á cɛladanan ya dɔ Bɛtisayida. Mun ya da kə yɛɛ tɛra gɔ Yezu ji, ǹ t'a ɲɔnɔ m'a n'á wɔn da la, a ni yɛɛ mɛ.
23 Yezu ni a gun a wɔn ma, a n sɔ k'a nɔ cuuri. A t'á lɛ mu da a yɛɛrɛn ma, a n'á wɔn da a la a n landa a la:
— Ń yɛɛ yi fɔ la?
24 A yɛɛ tɛra n'á yɛɛ sa len, a ni pɛn nɛ:
— Mə yɛɛ yi mun la, ǹ yi tɔn dan ya ǹ ni tɔrɛ.
25 Yi cɛrɛ, Yezu n'á wɔn da a yɛɛrɛn ma dɔ. A gulɛ ya ga dɔ, a yɛɛn tə mɛ, a n fɔ tuma ye fwaan.
26 Yezu tə zɛ kɔ a la a n wɔ paa. Fo, a ni pɛn a nɛ m'a bǝ ra wɔ a cuu ba.
Yezu bə mu kəna lɛ
(Maco 16.13-20; Luka 9.18-21)
27 Yezu nk'á cɛladanan ya wɔ jaa Filipu fu gana dwarɛ Sezare len ji n nɔ. Ǹ bɛ zɛ la wulɛ, a ya landa ǹ la:
— Mun y'a prɛ mə̀ ma yi je lɛ?
28 Ǹ n'a lɛ si:
— Mun talan nɔ mə̀ ń yi Zaan Batisi lɛ; talan dɔ n nɔ mə̀ ń yi Eli lɛ. A lunkun nɔ mə̀ ń yi tu la ji pɛlɛn ǹ gɔ lɛ.
29 A tə landa ǹ la:
— Kəcɛn nɔ dɔ, kə y'a prɛ mə̀ mə yi je lɛ?
Piyɛri ni lɛ si:
— Ń yi Ɲile kanawule lɛ.
30 Yezu t'a pɛn a ni tiin kɔ ǹ ma, mə̀ ǹ bǝ ra a pɛn mu zɛɛn nɛ ba.
Yezu y'a jɛɛ nk'a yɛɛ cira sɛ prɛ
(Maco 16.21-28; Luka 9.22-27)
31 Yezu ni lɛ gun a ni jije ci kɔ á cɛladanan la:
— Mu fu Nɛ gulɛna yi narɛ ma a n lwa tantan. A cuu mu sɔn nk'a kanbɔlɛ cidann nk'a landa sɛ jijewulen da ǹ ban a nɛ. Ǹ da a jɛ a n gin, fo a lɛ mɛ cɔwfuna pini, a yɛɛ da cira.
32 A yi yi ci prɛ ǹ nɛ fwaan. Piyɛri t'a gun a n sɔ k'a nɔ zayii a n yɛrɛ a ma.
33 Fo, aci dɔ n'á beere a n ga á cɛladanan ma, a n yɛ Piyɛri ma; a ni pɛn:
— Kanɛ ni ń bɔ mə lo, ń Suntana ce! A buru, ń fu tasɛ nkə Laa fu bǝ gɔrɔ ba, fo mucinibra tasɛ yi ń nɔ.
34 Yezu t'a zama nk'a cɛladanan bǝri, a ni pɛn ǹ nɛ:
— Mə̀ mu kəna ni ji a n tuu ma ma, yi dana yi narɛ ma a n'á yii bɔ ácɛn ji, a n'á fu dwa da sa a n tuu mə ma.
35 A buru, mu kəna bɛ ji á n'á ɲile kana, yi dana da bɔnɔ á ɲile lɛ. Fo, mə̀ mu kəna bɔnɔ á ɲile lɛ ma nkə Bure nina tɔ ma, yi dana ɲile da kana.
36 A la yi kə kɔn mu nɛ a n cɛ tuma ye mə̀ ǹ dana bɔnɔ á ɲile lɛ?
37 Mə̀ mu bɔnɔ á ɲile lɛ, a da zoo a ni mɛ bɔ kə kɔn?
38 A buru, pə mun kənan bɛ mun kukwen nkə sɛ bubu zanwulen lɛ, mə̀ mu kəna sɛɛ kɔ ma nkə ma sɛ prɛ ma yin jire, mu fu Nɛ gulɛna bɛ da da kə len ji pɛlɛn sɔbɛn nɔ á Yaa fu zaanɛbra nɔ pin kəna pini, aci dɔ da sɛɛ kɔ yi dana ma yi pini.