Farizɛn nkə yilon fu landa sɛn nɔ
(Maco 15.1-9)
7
1 A Farizɛn nk'a Zuwifun fu dula yɛɛ ɲawulen gɔn ya bɔ Zeruzalɛmu, ǹ ni da cilo Yezu dunma.
2 Ǹ ya Yezu cɛladanan talan ye fɔ barɛ kə ǹ wɔn gwanma, a buru ǹ bǝ ǹ wɔn peri a n kaɲa k'a dula sɛn nɔ ba.
3 Caan ya, a Farizɛn nk'a Zuwifun zɛɛn bə fɔ barɛ, mə̀ ǹ bə ǹ wɔn peri a zaan ma a n kaɲa kə ǹ yilon fu dula sɛn nɔ ba.
4 Mə̀ ǹ ni bɔ ya nɔ, ǹ yi ǹ gwan bɔrɛ ǹ tǝ fɔ barɛ. Ǹ yi ǹ yilon fu dula sɛn silan dɔ n lɛsɛ sire, tɔn pɛnlɔ nkə tanlɔ nkə zantanlɔ pə gɔn zaan nɔ.
5 A Farizɛn nk'a dula yɛɛ ɲawulen tə landa Yezu la:
— Kɔn ya ń cɛladanan bǝ tɔrɛ a n kaɲa kə wu yilon fu dula sɛn nɔ ba, fo ǹ ni fɔ barɛ kə ǹ wɔn gwanma?
6 Yezu tə ǹ lɛ si:
— Nɔ cinan nɔ! Tu la ji pɛlɛ Ezayi bɛ kəna pɛn kə ma, yi ya na kə ma, a buru a ni sɛbɛ mə̀ Laa ni pɛn:
«A tɔyɛ mun cin yi mə dokɔ kə ǹ lɛ nɔ sɛ prɛn nɔ,
fo ǹ nɔ bə mə ji ba.
7 Ǹ yi mə dokɔ kooro,
a buru ǹ bə mun jije sɛn kənan ma,
yin yi mucininɛn fu sɛn dwarɛn lɛ.
8 Yezu ni pɛn ǹ nɛ:
— Kə yi Laa fu ji prɛn cire, kə mucininɛn fu dula lɛsɛ si.
9 A ni pɛn ǹ nɛ dɔ:
— Kə yi kə banrɛ Laa fu ji prɛn nɛ sɔbɛ, kə ni kəcɛn fu dula lɛsɛ si!
10 Moyizi ni pɛn: «Ń yaa nkə ń na dokɔ», nkə dɔ «mə̀ mu kəna n'á yaa, yi ba á na susɔ, yi dana n jɛ a n gin.
11 Fo kəcɛn y'a prɛ: Mə̀ mu ni pɛn á yaa yi ba á na nɛ: «Mə bə narɛ ma mə fɔ kəna kɔ ń la, yi yi kɔriban lɛ. Yi buru, mə yi yi Laa fu lɛ.
12 Kə b'a kurarɛ yi dana n sɛ zɛɛn zanɛ á yaa yi ba á na nɛ ba.
13 Yi gɔn ji, kə bɛ mun jije dula sɛn kənan ma, kə yi Laa fu sɛ prɛ bɔ fɔ koo lɛ yin tɔ ma. Kə yi yi sɛn cin giri mɔnlɛ zanlɛ.
Fɔ kəna bɛ mu gugɔ kɔrɛ
(Maco 15.10-20)
14 Yezu tə lɛ ja a zama la dɔ, a ni pɛn:
— Kə tuma ni kə tɔ kɔ mə ji kə ce bu ma.
15 Fɔ tɔɔ fɔ bɛ wulɛ mu bunu nɔ, yi b'a gugɔ kɔ ba. Fo sɛ kəna bɛ bɔ mu fɔ rɔ, yi y'a gugɔ kɔ Laa yɛɛ lo. [
16 Yii bɛ mu kəna ji, yi dana n'á tɔ kɔ a ni bu ma.]
17 Yezu bɛ sɔrɔ a zama jire a n wɔ paa, a cɛladanan ya landa a la a dɔɔn ci bu ji.
18 A t'a pɛn ǹ nɛ:
— Kəcɛn dɔ n yi yii waanran lɛ? Kə b'a dɔn mə̀ fɔ kəna tuma bɛ wulɛ bunu nɔ, mə yi bǝ mu gugɔ kɔ ba?
19 A buru, a bǝ wɔrɛ a fɔ rɔ ba, fo a yi wulɛ a bunu nɔ, yi cɛrɛ a n sɔ swaan ji.
Yi sɛ prɛn cin ji ya, Yezu ni ɲa mə̀ bɛɛrɛ tuma yi zoore a n barɛ.
20 A t'a pɛn ǹ nɛ dɔ:
— Sɛ kəna bɛ bɔ mu fɔ rɔ, yi y'a gugɔ kɔrɛ.
21 A buru tasɛ bubun yi bɔ fɔ rɔ, ǹ ni ǹ dana da kɔbra nkə wurobra nkə mun ɲile bɔ ma,
22 gulɛ nkə lɔ fu sanabɔbra, yɛɛsabra, nkə bububra nkə məna mun la, nkə mu kəna bɛ bə siyɛ kɔ ba, yɛɛbɔ fɔ ji, mun tɔ zarɛ, nkə cɛn dokɔ nkə luluribra nɔ.
23 Yi sɛ bubun tuman yi bɔ mu fɔ rɔ ǹ n'a gugɔ kɔ.
Lɔ tə gɔ yi la Yezu la
(Maco 15.21-28)
24 Yezu tə kan yi jɛnɛ a n wɔ Tiiri gana nɔ. A ya wɔ sun gɔ nɔ, a b'a ji mu zɛɛn ni dɔn m'a yi bi ba, fo mun n'a waa ye.
25 Lɔ gɔ ya, pataran y'a fu nɛ lɔna lwarɛ. A bɛ Yezu tɔ ma lɔn kɔn lɔn, a ya wɔrɔ á doo turu a lo.
26 Yi lɔ ce bə Zuwifu lɛ ba, a ya ye Siri gana ɲalɔ Fenisi cuuri. A ya Yezu ɲɔnɔ m'a ni a pataran gula a ni ǹ bɔ á fu nɛ lɔna cɛrɛ.
27 Yezu t'a pɛn nɛ:
— A kura nɛ ɲaan ni bɛɛrɛ barɛ ǹ ni kan sina, a buru a bǝ zaanɛ nɛ ɲaan fu bɛɛrɛ n sa a n kɔ jɔnlɔn la ba.
28 A lɔ tə Yezu lɛ si:
— Ɲiindana, caan ya, fo, nɛ ɲaan fu bɛɛrɛ lɛ busun kəna bɛ kara, jɔnlɔn yi yi barɛ.
29 Yezu t'a pɛn nɛ:
— Ń fu sɛ prɛ ci tɔ ma, wɔrɔ, a pataran ni ǹ bɔ ń fu nɛ lɔna cɛrɛ.
30 A t'a beere a n wɔ paa, a n wɔrɔ a nɛ waa ture yira, a pataran ya wɔrɔ.
Yezu ya tɔ tɛra gɔ tɔ mɛ
31 Yezu tə kan Tiiri gana nɔ a n da bɔ Sidɔn, a ni Dekapoli wɔsɔ a n da Galile taa lɛ ma.
32 Ǹ ya da kə gulɛ tɔ tɛra gɔrɔ a ji, sɛ pɛn yi tiinri a ma, ǹ n'a ɲɔnɔ m'a n'á wɔn da a la a ni a kerence kɔ.
33 Yezu t'a jinɛn gun, a n wɔ k'a nɔ zayii, a n'á wɔn sanɛn wɔ a tɔ rɔ, a n'á lɛ mu da a ninɛ ma.
34 A t'á yɛɛ sa len a n sisi wɔ fugaa, a ni pɛn a gulɛ nɛ:
— ɛffata! Yi buru: «Ń mɛ!»
35 A lo jɛnɛ, a gulɛ tɔ ya mɛ, a ninɛ n feere a n sɛ pɛn a zaan ma.
36 Yezu ni tiin kɔ ǹ tuman ma mə̀ ǹ bǝ ra a pɛn mu zɛɛn nɛ ba. Fo, a bɛ a tiin kɔ ǹ ma kəna giri, ǹcin dɔ n yi sure k'a nɔ yi giri.
37 Mun ya kaba fantan ǹ n'a pɛn:
— A bɛ sɛ tɔɔ sɛ zanlɛ, a tuma yi zaan paarɛ! A yi tɔ tɛran tɔ mɛrɛ, a n məmin da sɛ pɛn ma.