8
Yesu ame̱le̱ pomimiki wanda:weki
1 Hosiki siki hao wetepe naneta: Yesuta: mo daoni paeyao pa:ta: make mo hosiki da sunu pa:ta: make pominolo hata: Koda:na: Kilu Tombuao Hala: ekina: Pi Seliapo wanda:hali paeyao pa:ta: la hala:tiki pomiekeme. Kutupa make ipika: 12 *disaipolo haliweki make ipiki ame̱le̱ pemekeme. 2 Kutupa amba: titina: mo hande hoke temokomanu tolu lia make yenimanu pea mea epeaeyeke wanda:weki make Yesu telia: mea pomimikime. Metita: mo ipika: puki pa:ta:ta: temoko watake hata: pitiekeeki tolu lieke wanda:e. Ipika: biki ma:nda:ta: Ma:kadalawanda:e. 3 Kutupa mo *Hetodina: da handeteke hayeke ami you hali Tiusana: weteke bikita: Dioa:na make Susa:na make mandane wanda:wekima: make yeekeme. Mo wanda:wekima: ika: mani manuta: Yesu make ipika: disaipolo haliweki tonka:na: tamba: mutia pomu hatiki pimikime.
Wae ale manuna: onkoluma: pi
4 Wanda:hali aneke hapuma: daoni ma:nda: ma:nda: pa:ta: pa ipulu ipulu ombu hata: wanda:hali tieke mombelemeke handaa Yesuma: onkoluma: pi ma:nda: dupa la haleekeme. 5 Hali ma:nda:ma: ipika: e pa:ta: wae alemanu a:pa tandeleekeme. Tandela:tia pulu haena: mandane wae ale manuta: pota:na: lopa: lopa: piekeme. Kutu pieke mo wanda:halina: ankema: tumba tumba piki hau make ba titima: make a:pa yata:po nemekeme. 6 Mandane wae ale manuta: toopimanu manda ta̱leeke kenke sikina: lopeekeme. Koto wae aleta: opeekepate koto toopi manda wieke kenketa: tenke tenke na leekeeki yaalo opuluekema: piki nono peata: pa hapiekeme. 7 Mandane wae ale manuta: tekeke hake alemanu pa:ta:manu lopeekeme. Kutupa mo tekeke hake alemanu opa:liaaso hata: hande wae alemanu opolo pieke ekita: tombuaeyekeme. 8 Kutu piekepate mandane wae ale manuta: epeke kenkena: lopaata: opa:liao napeketa: 100manu wiekeme. Kutupa Yesuma: ipika: pi lo a:mbolo hata: alota: Katake lomba:la: halima:ta: wotu opina:e leekeme.
Onkoluma: pina: teke
9 Yesuna: disaipolo haliwekima: ipiki pa:ta: lota: pitolo alota: Do onkoluma:na: teke pi la kie lemekeme. 10 Ipikana:ma: ika: pi hombo peaaso hata: alota: Koda:na: *Kilu Tombuao Hala: ekina: a:mbaala:eki manuta: iki pa:ta: amba: wala:la:me. Pate mo mandane wanda:hali pa:ta:ta: onkoluma: pi homekema: la halolome. Pa ekipeke. Ikana:ma: handolo pelemepate na handena: opulu pelemepate hone na wina:e leekeme.
Wae alena: onkoluma: pi teke waleekeeki
11 Kutupa Yesuma: alota: Do onkoluma: alo ekina: teketa: dupae. Mo hande wae aleta: Koda:na: pie. 12 Mo pota:na: lopea: wae ale manuta: pi opiteleme wanda:hali ana:na: halememe. Mo hoke Sadanima: hande pi ika: puki pa:ta: yoka: mea ikana:ma: koto pi pa:ta: hone na tulao tamba: mina:la:eki na mina:yeke do hau pu hala:me. 13 Mo toopi panka: panka: pa:la: kenkena: lopa:la: wae ale manuta: wanda:hali ma:nda:ma: Koda:na: pi opua ta:na:ma: homolo hata: mina:lemepate ota: wopu na mendiki hosiki haota: mo la handa:la: ekimanu ipula: dina:ta: paa lopo halememe. 14 Kutupa mo hande tekeke hake ale polu pa:ta: lopeeke wae ale manuta: pi opu haleme wanda:hali tupa: ya:la:pate do kenkena: haumanu pa:ta: hone eleke eleke wopu wita:la:meeki make hamoko hau make do kenke lokena: hone pa:la: ekimanu make paeyaoma: ika: honemanu tumbatiki pita:leke handaa da:ka:polo hata: ika: kiliki na pota:lieke. 15 Kutupa mo epeke kenkena: lopa:la: wae ale manuta: pi opua homu pu haleme wanda:hali ikana:ma: honkopu hao epeke tupa: minaata: ika: kiliki aneke a:eluekema: pa putia pelimikie leekeme.
Pa̱a̱ a:mbaasa: pi
16 Yesuma: alota: Hali ma:nda:ma: lamepa ka:waata: sini tiekema: na mea dopuaniao o bedi tokele pa:ta: na u hala:me. Koto hau na pikita: wanda:hali a:pa honda: pambetiki pitolo handena: yeketa: mo lamepa u hala: alena: u hala:me. 17 Ala:ta: ma:nda: a:mbao panka: ula: aleta: hama nane peneme yao mea a:pa wilieke. Kutupa make ala:ta: ma:nda: tote pealimi ekita: pa̱a̱na: peneme yao mea ipilimikie leekeme.
18 Koto ekina:ta: ikana:ma: pi opu haleme ekita: wotu handeteke hao hapa:peke. Ekipeke ma:nda:ma: ala:ta: ma:nda: wia:ka:na:ta: kota: ipikita: haka:ta:pao ota: wotu milieke. Pate hali ma:nda:ma: ala:ta: ma:nda: na wia:ka:na:ta: kota: mo hosikieki make ipika: honema: Ulume laa wia:eki kone yoka: mealieke leekeme.
Yesuna: inkiki hameketonu
19 Yesuna: ama: make hameke tonuma: ipiki handolo epemekepate Yesu teke pa:ta: pua:peke na yeekeme. Ekipeke wanda:hali anekehapuma: Yesu mea hopa:liao haemekeme. 20 Ma:nda:ma: Yesu pa:ta: a:pa alota: Naka: ama: kame tonuta: neke handuluekema: da hama do a:pa halememe leekeme. 21 Koto leeke Yesuma: mo wanda:hali paeyao pa:ta: alota: Koda:na: pi opua pu haleme wanda:halita: yaka ama: kametonu halememe leekeme.
Yesuna: pima: po tilipu tunkulaeyekeeki
22 Nate ma:nda:na: Yesu ipika: disaipolo haliweki ame̱le̱ pua kawaso ma:nda:na: pitulu pemekeme. Yesuma: iki pa:ta: alota: Nikita: do ikali tunkula mone tea:na: bape leekeme. Kutupata: iki kini pea puluta: 23 mo kawaso pulu haena:ta: Yesuta: u peliekeme. Kutupa koto kone po tilipu tieke epeeketa: mo ikalita: kawaso tukiki pa:ta: tumbieke ekima:ta: homa:la: ekita: teke pa:ta: yeekeme. Koto ekina: mo haliwekita: paala: tiekema: homemekeme. 24 Kutupa ikana:ma: Yesu a:pa tiao alota: Aneke halio. Aneke halio. Nikita: teke pa:ta: do homoloma: handa:e lemekeme. Koto lemeke Yesu tiaota: mo hande honkopu wopu hake po tilipu pa:ta: make mo la:ma: la:ma: piki honkopu hake ikali yaapo pa:ta:ta: Paae leeke handaa ipilika: honkopu paeyao upa lopaata: la:ma: na piki e̱ pondo na lepekeme. 25 Kutupa Yesuma: ipika: disaipolo haliweki pa:ta: alota: Ika: hone tulaleme ekita: hando ka:ta:pe laa lota: piekeme. Koto leekepate iki paeyaoma: penkilipa:tia pominolo make paala:ma: wotu homolo hata: ika: ika: kone alota: Do halita: epi ya:ka:ta:pe. Mo ikali pita: po tilipu yaapoma: ipika: pi ota: opitelepeme lemekeme.
Kedasa halina: hoke temokomanu tolu liekeeki
26 Koto hau pea paeyeketa: Yesu ipika: disaipolo haliweki ame̱le̱ mo Kedasa kenke pa:ta: kawasona: pua opa:liaemekeme. Koto Kedasa kenketa: mo Ka:lili kenke nanema: hao mo ikali leke tunkula pua mone tea:na: ula:me. 27 Yesuma: mo kawaso mina:pa:lao mo ikali tea:na: pulu haena:ta: mo hoke temokomanu pitiki hali ma:nda: mo daoni ma:nda: pa:ta: hao ipiki manda:hande pipikime. Ota: amba: hande hatiki a:paata: ame make mo someta: aka: na yameke make da pa:ta: na hao polu make ipikita: mo homo hayeke haliweki u haemeke tikene da pa:ta:manu hao hayekeme. 28 Ipikana:ma: Yesu handaata: wi tieke alo hata: Yesuna: anke pa:ta: handa:niao kenkena: tu lopaata: wi anekema: pa alo alota: Yesuo. Neketa: Koda: Manda Hala: Tiekena: Eiyekee. Nakana:ma: I̱ yaapo eki hau puluekema: pitelepe. Nakana:ma: I̱ pa:ta: tanda na kia:pee laa honke leekeme.
29 Koto leeke ekita: Yesuma: mo hoke temoko pa:ta: Pue leeke ekina: leekeme. Nate paeyao mo hoke temokoma: mo hali wotu lu keatiki pomu hayekeme. Nate ma:nda: nina:ta: mo halita: dipula pitao senipu manuma: ipika: kiki anke mea tonkao u hatiki pimikipate kone ipikana:ma: mo senipumanu tunkula: lubepi pia:tiki peaata: mo hoke temokoma: koto halita: hapu hayeke alena: lu mea pua:tiki piekeme.
30 Yesuma: mo hali pa:ta: alota: Naka: bikita: epi ya:ka:ta:pe laa lota: pieke handaa ipikana:ma: alota: Yaka bikita: Eleke elekee leekeme. Koto leeke ekita: temoko eleke eleke wotu ipiki pa:ta: pitieke ekina: leekeme. 31 Mo hoke temoko tonuma:ta: Yesu pa:ta: honke honke wotu alo hata: alota: Niki mo tanda mu halo poloma: naku ka:ka:na: tieke pa:ta: dipula pitulu pomono na tapaapeke lemekeme.
32 Koto alena: ma:na: titi monema: hayeke peiyene tea:na: ne nalo haena: mo hoke temoko tonuma: Yesu pa:ta: honke alota: Mo ma:na: titina: weleke pa:ta: pitulu pomono lae lemeke handaa Yesuma: ika: honke lemeke tupa: pa pina: la kiaeyekeme. 33 Koto ekina: ikana:ma: mo hali mina:pa:lao ma:na: titina: weleke pa:ta: pitulu pemekeme. Kutu pimikita: mo ma:na: paeyaota: mo peiyene paeleeke alena: a̱i̱ya pua hola:pa:niao ikali pa:ta: puaata: ikali naa honki lemekeme.
34 Mo ma:na: titi handeteke haemeke haliwekima: mo pieke ekimanu handaata: pindipa puata: daoni nane haemeke wanda:hali make koto daoni tekepa:ta: haemeke wanda:hali make la:tiki pomimikime. 35 Koto ekina: mo wanda:halima: hande pieke ekimanu handuluekema: pua Yesu pa:ta: a:paata: amba: hande weleke pa:ta: hoke temokomanu pitieke halita: Yesuna: anke teke pa:ta: dau yama epeke hone wia pitiekeeki handolo hata:ta: iki paeyaoma: paala:ma: homemekeme. 36 Mo hali mea epeaaso piekeeki handemeke wanda:halima: mo piekeeki manuta: mo epemeke wanda:hali pa:ta: la halemekeme. 37 Kutupa mo Kedasa kenke wanda:hali paeyaoma: paala:ma: homolo hata: Yesu pa:ta: alota: Nakana:ma: niki mina:pa:lao pue lemekeme. Koto lemeke Yesuma: mo kawasona: pitulu pua peekeme. 38 Kutu pitolo haena: mo hoke temokomanu tolu lieke halima: Yesu pa:ta: honke alo alota: I̱ta: neke yaapo pana:e leekeme. Koto leeke Yesuma: mo hali paa tapaaso hata: alota: 39 Neke naka: da nane paa la:ka:la pua Koda:ma: neke pa:ta: pia: hande ekimanu paeyao wanda:hali paeyao pa:ta: pua la hala:tiki pu hapeke leekeme. Koto ekina:ta: mo halima: ipika: teke da nane puaata: Yesuma: ipiki tamba: miekeeki paeyaosiki wanda:hali pa:ta: pua la hale hale piekeme.
Diaitusina: wandiki pita: yeni hao hayeke wanda: yaapo
40 Yesu mo kawasona: pita ikali leke mone tea:na: paa la:ka:la peeke pita:ma:ta: wanda:halima: ipika: opolo polo pieke ekina: yu wia handeteke haemeke ekina: ta:na:ma: wopu homemekeme. 41 Koto tomona:ta: hali ma:nda: ipikita: mo pi hotu haemeke dana: you hali bikita: Diaitusima: a:pa Yesuna: anke teke pa:ta: panda: puniao ipika: da pa:ta: epena: honke leekeme. 42 Pa ekipeke ipika: ota: homeke hayeke bapita: 12 yeeke wandikita: tekesiki pa:ta: homuluekema: taapolo pitieke handaa leekeme. Koto leeke Yesu pulu haena: mo wanda:hali anekehapu mandane mandane yama: a:pa momba:laaso hata: Yesu mea daka:pa daka:pa puluekema: taapemekeme. 43 Kutupa mo wanda:hali anka:lopuna: mo bapi 12 andusa:na: we yopu hayeke wanda: ma:nda: hayekeme. Ipika: yeni tamba: mina:yeke dokeda haliweki pa:ta: ipika: mani paeyao hala:tiki piekepate ipika: yenita: ota: na epeaeyekeme. 44 Kutupa mo wanda:ma: mo wanda:hali anka:lopuna: puata: Yesuna: hoki nanema: a:pa ipika: dopieke dau honiki wataeyekeme. Koto tomona: kone hande we yapeeke ekita: paeyekeme. 45 Yesuma: mo wanda:hali pa:ta: lota: pitolo alota: I̱ta: epima: wataeya:pe leekeme. Mo wanda:halima: alota: Niki ma:nda:ma: na wataoma:me lemeketa: Pidama: Yesuna: pi hombo peaaso alota: Tekehalio. Do wanda:halima: neke mea hopa:liao daka:paasa: handa:e leekeme. 46 Koto leekepate Yesuma: alota: Ekipeke I̱ tukiki pa:ta: ula: honkoputa: ma:nda: teke pa:ta: puleke handaa ma:nda:ma: I̱ ota: wataeya:me laa loa:me leekeme. 47 Mo wanda:ma: Yesuma: I̱ma: pua: ekita: handa: ya:ka:ta:me laa pututuma: homa:tia a:pa Yesuna: anke teke pa:ta: a:pa panda: puniaeyekeme. Wanda:hali paeyaona: leke tonka:na: hata: mo wanda:ma: Yesu pa:ta: ipika: dau honiki wataeyeke ekina: teke make mo ipika: yeni koto kone paeyekeeki make laa haleekeme.
48 Koto ekina:ta: Yesuma: mo wanda: pa:ta: alota: Ya wandikio. Naka: hone tulale ekima: naka: yeni ame do kone mea epeaasa:me. Puki lopao pue leekeme.
49 Yesuma: do pi alo haena:ta: hali ma:nda:ma: mo you halina: da nane hao a:pa Diaitusi pa:ta: alota: Naka: wandikita: ota: homea:me. Mo Disa pa:ta: pina: pa paena: lae leekeme. 50 Koto leekeeki opua Yesuma: Diaitusi pa:ta: alota: Paala:ma: na homa:pee. Hone tulaase hau homeke pika:na:ta: naka: wandiki sikita: ota: paa tialieke leekeme. 51 Yesu mo da pa:ta: opolo pulu haena: mo da tukiki pa:ta:ta: ma:nda: ota: na pena: leekepate pa Pida Dioni Dia:mesi make mo wandikina: ateke inkiki yaapo pea Yesu ame̱le̱ da pa:ta: honda: pambemekeme. 52 Koto da pa:ta: pitimiki wanda:hali paeyaoma:ta: mo wandikina: e̱ alo hata: homa: wia pitimikime. Yesuma: mo wanda:hali pa:ta: alota: E̱ na lapepe. Do wandiki sikita: ota: na homa:la:pate pa u peliolo hata: pa:la:me leekeme. 53 Koto leekeeki opuaata: mo wanda:halima:ta: mo wandiki siki ota: homea:eki handemeke ekina: Yesu pa:ta: kitaemekeme. 54 Koto lemekepate Yesuma: mo wandiki sikina: kiki mea wi alo hata: alota: Wandiki sikio. Tiae leekeme. 55 Koto alema: kone mo wandiki pa:ta: deto hala:eki paa a:pa ipiki paa tiaeyekeme. Kutupa Yesuma: mo ateke inkiki pa:ta: Mo wandiki ne ma:nda: hala:pe leekeme. 56 Kotoeki handaata: mo wandikina: ateke inkiki yaapoma:ta: dota: ota: pita:la:pe honema: lapeke pi pea: mamata:pa pekepate Yesuma: mo tooli pa:ta: pi tanda pikima: alota: Wanda:hali ma:nda: pa:ta: do pitoloeki na la hala:pa:peke leekeme.