Makama: wape pieke Pi Seliapoe
1
Bapitaisi peao hayeke hali Dionima: pi waleekeeki
1 Koda:na: Eiyeke Yesu *Ketiso ipika: pi seliapo doe. 2 Do pita: hande *potopede *Aisayama: wape pea ula: ekita: dupa.
Koda:ma: alota: Opua:pe. Ya pi mea puaasa: hali amba:la tapaalueke. Naka: pota: epeaena:yeke tapaalueke leekeme.
3 Kutupa ma:nda:ma: hapu hayeke alena: hata: wi ala:me dupa
Tekehalina: pota: epeaape. Ipika: pota: tikitiki yao epeaape laa wi ala:me
laa wape piekeme.
4 Koto wape pieke tupa: bapitaisi peao hayeke hali Dionima: hapu hayeke alena: a:pa hayekeme. Kutupa ipikana:ma: wanda:hali bapitaisi peaaso hata: pi make wala:tiki piekeme. Dupa leekeme. Hone la:ka:la mina wimika:na:ta: I̱ma: iki bapitaisi peaalueke. Koto ekina: Koda:ma: ika: hoke haumanu paeyaalieke leekeme. 5 Diudia nane haemeke wanda:hali paeyao make Diutuseleme da pa:ta: haemeke wanda:hali paeyao make Dioni pa:ta: pua:tiki pu haemekeme. Kutupa Diodani ikali pa:ta: wanda:halima: ika: hoke haumanu ka:la:polo haena: Dionima: bapitaisi peatiki piekeme.
6 Dionima:ta: kemolo ma:na: itikima: wepieke dau pambaota: ba:ta:idota: ma:na: yonkelekema: wepiekeeki yameekeme. Kutupa ipika: neta: hombuta: make boi hapeke make na:tiki pu hayekeme. 7 Ipikana:ma: pi walolo hata: dupa leekeme. Ya hoki nane ipilia: halita: I̱ halo tupa: na hala: hali ipilieke. Ipikita: hali tieke ipilieke. I̱ta: ipiki pa:la: tupa: epeke hali dia:me. I̱ma: panda:puniao ipika: anke dake pu ka:la:papeketa: ana: na pa:la:me laata: 8 I̱ma:ta: ikalima: iki bapitaisi peaasopate ipikana:ma:ta: Holi Sipitidima: iki bapitaisi peaalieke leekeme.
Dionima: Yesu bapitaisi peaeyekeeki
9 Koto dina:ta: Yesuma: Ka:lili nane hayeke Na:sa:tete da mina:pa:lao Diodani ikali pa:ta: peekeme. Koto ikali pa:ta: Dionima: Yesu bapitaisi peaeyekeme. 10 Kutupa Yesuma: ikali pa:ta: mina:pa:lao opa:liaaso hata: koto kone oli ya akolopa:pa wiekeeki handaata: oli Holi Sipitidi make melipu tupa: ipiki pa:ta: hola:pa:niaeyekeeki handeekeme. 11 Kutupa pi ho̱la̱:makema: ya nane hata: la:niaeyeke pita: dupae. Neketa: ya pukipiki wekie. Neke pa:ta: I̱ma: ta:na:ma: wopu homolome laa la:niaeyekeme.
Sadanima: Yesuma: pita:la:eki handuluekema: la handeekeeki
12 Koto kone Holi Sipitidima: hapu hayeke alena: Yesu pena:yeke tapaeyekeme. 13 Kutupa Sadanima: Yesu la handa haena:ta: nate hali tieke yaapona: Yesu koto pa:ta: hayekeme. Ipikita: ma:na: yeti hao hayeke alena: hayekepate mo enisolo tonuma: a:pa petelemekeme.
Yesuma: Ka:lili nane pi waleekeeki
14 Dioni dipula mea pitaeyeke hoki naneta: Yesuma: mo Ka:lili nane puaata: Koda:na: Pi Seliapo wala:tiki piekeme. 15 Dupa leekeme. Ameta: Koda: ipika: natee. Ameta: Koda: ipika: *Kilu Tombuao Hala:eki teke pa:ta: ya:la:me laa Hone ma:nda: la:ka:la: mina wiaata: do Pi Seliapo hone tulao hapa:peke leekeme.
16 Kutupa Yesuma: mo tunkulu pa ula: Ka:lili ikali tea:na: yopulu hata: mo Saimono A:ndutu hama̱la̱:ma: tenkinu tieke kiake ikali pa:ta: mea lopaaso haepekeeki handeekeme. Ipilikita: ta:peli mu haepeke hali yaapoe. 17 Yesuma: ipiliki pa:ta: alota: Yaka hoki nane tolu hapa:peke leekeme. Kutu pipika:na:ta: ipilikita: haliweki mulu pelepe hali yaapo hapena: walueke leekeme. 18 Koto leekeeki opua ipilika: tenkinumanu mina:pa:lao koto kone Yesuna: hoki nane teli mea pepekeme.
19 Kutupa Yesuma: hosiki siki mopate leke puaata: Dia:mesi Dioni hama̱la̱: Sepedina: eiyeke yaapo ipilika: palai kawasona: pita: tenkinumanu tombulolo haepekeeki handeekeme. 20 Yesuma: handaata: koto kone Ipupe laa wi leekeme. Koto leekeeki opuata: mo hama̱la̱:ma: ipilika: ateke Sepedi make mo e pokaemeke haliweki make palai kawasona: pitina: mina:pa:lao Yesuna: hoki nane teli mea pepekeme.
Hali pitieke hoke temoko tolu liekeeki
21 Kutupa Kapeneami da nane pemekepate koto da pa:ta: hata: Diu wanda:halina: *Hoto Pila: Natena: ipikana:ma: mo pi hotu haemeke da pa:ta: honda: pambaata: pi waleekeme. 22 Kutupa wanda:halima:ta: Yesuma: waleeke pi opuaata: leke opo handake wimikime. Wape pea wala:tiki pu haemeke haliwekima: walo haemeke tupa: na waleke ipikana:ma: biki ula: halima: wala:la: tupa: waleeke handa pimikime.
23 Koto kone pi hotu haemeke da pa:ta: hali ma:nda: a:pa hayekepate ipika: weleke pa:ta: hoke temoko pitiekeme. 24 Mo halima: dupa e̱ wi leekeme. Yesuo. Na:sa:tete halio. Niki pa:ta: eki puluekema: a:pa pipe laa Neketa: niki hoeyaaluekema: a:pa pipe. Neketa: handolome. Neketa: Koda: ipika: yako piki halie leekeme. 25 Koto lemekepate Yesuma: sa:sa: pea hoke temoko pa:ta: alota: Pi na leke. Koto hali mina:pa:lao opolu bao yopue leekeme.
26 Koto leeke handaa hoke temokoma: hoke e̱ wi la: paleke mo hali mea putuputu liaaso hata: mina:pa:lao opolu baeyekeme. 27 Koto ekina: wanda:hali paeyaoma: penkilipa:tia pominolo hata: ika: ika: kone lota: lota: pimikieki dupae. Dota: eki haupe laa Panake hau wala:la:ekipe laa Biki ula: halima: tupa: ipikana:ma: mo hoke temokomanu pa:ta: pi lea:ka:na:ta: ipika: pi tunkula:peke na ya:la:me lemekeme. 28 Koto ekina: koto kone Ka:lili nane paeyao Yesuna: biki kende tupa: wiekeme.
Yesuma: wanda:hali wopu epeaeyekeeki
29-30 Yesuta: mo Diu wanda:halina: pi hotu haemeke da mina:pa:lao Dia:mesi Dioni ame̱le̱ mo Saimono A:ndutu yaapona: da pa:ta: pua honda: pambemekepate Saimonona: meiyeke wanda:ta: ki yeni hapa wiekeme. Yesuma: mo da opolo peeke mo wanda:na: yeni hapa wiekeeki ipiki pa:ta: la halemekeme. 31 Koto lemeke handaa Yesuma: pua ipika: kiki mea tiaaso haena: yeni tandeleekeme. Kutupieke handaa mo wanda:ma: mo hali manuna: ne yankao haleekeme.
32-33 Koto dina: welealo nate pambolo haena:ta: yeni ta:ta: ta:ta: haemeke wanda:hali make weleke pa:ta: hoke temoko pitimiki wanda:hali make paeyao Yesu pa:ta: hatuku a:paata: daoni wanda:hali paeyao make Yesu hayeke pota: kake pa:ta: a:pa penke haemekeme. 34 Yeni ta:ta: ta:ta: haemeke wanda:hali wopuna: yeni Yesuma: tandelaota: hoke temokomanu wotu make tolu liaata: temokomanu ipiki handemeke handaata: Yesuma: Pi na lapa:pe laata: tolu liekeme.
Yesuma: Ka:lili nane hata: pi waleekeeki
35 Da ka:la:paaso nate a̱i̱ na opeke haena: Yesuma: tiao pa keneme nane pua hata: Koda: pa:ta: yeni piekeme. 36-37 Koto ekina: Saimono ipiki ame̱le̱ haemeke haliwekima: Yesuna: anke teli mea pua handa: wiaata: ipiki pa:ta: alota: Wanda:hali paeyaoma: neke weitelememe lemekeme. 38 Koto lemeke handaa Yesuma: iki pa:ta: alota: Mandane da pa:ta:manu ota: pomana:e. I̱ma: koto pa:ta: make pi wala:peke ya:la:me laata: Pa ekipekepe. I̱ta: kutu puluekema: a:pa poloma:e leekeme. 39 Koto laata: Yesuma: Ka:lili da paeyao pa:ta: ika: pi hotu haemeke damanu pa:ta: pi walolo hata: hoke temokomanu tolu lutia pomiekeme.
Kindi yeni hayeke hali homeke Yesuma: mea tiaeyekeeki
40 Kutupa mo kindi yeni hayeke hali homekema: Yesu pa:ta: a:pa tumiki yotu hao pita: ipiki pa:ta: honke alo hata: alota: Nakana:ma: hone pika:na:ta: ya loke wamo pea hano lapeke ya:la:me laa honke leekeme. 41 Yesuma: ipika: pukima: e̱ leeke handaata: ipika: kiki tindipa moneao wataaso hata: ipiki pa:ta: alota: I̱ma: hone pa:la:me. Naka: loke koto wamo peaaso handa:e leekeme. 42 Koto leeke koto kone kindi yeni wamo peaeyeketa: pa kindi yeni na hake hali leke hayekeme. 43 Kutupa Yesuma: mo hali hando alo hata: alota: 44 Hone wopu wia pua:peke. Ma:nda: pa:ta: pi na leke ame do kone mo *yeni peao hala: hali pa:ta: naka: loke pua wala:peke.Kutupa mo hande Mosesima: hala:peke laa waleeke aleta: naka: kindi yeni wamo peaowa: ekina: mea hala:peke. Kota: koto hauta: mo wanda:halima: handena:yeke loa:me leekeme.
45 Koto laa tapaeyekepate kone mo halima: wanda:hali pa:ta: la:tia pomiekeme. Koto ekina: Yesuta: wanda:halima: handolo haena: da pua:peke na yeke handaata: keneme nane hata: mandane mandane da wanda:hali ipiki pa:ta: mombelemekeme.