4
Sadanima: Yesu la handeeke ekimanu
1 Koto pieke hoki naneta: Sadanima: Yesu la handena: Koda:na: Sipitidima: Yesu mo hapu hayeke ale ma:nda: pa:ta: hatuku peekeme. 2 Koto pa:ta: hata:ta: Yesuma: hali tieke yaapo natena: timba: nate yaapona: ne ma:nda: na neke hayeke ekima: tea:ma: homeekeme. 3 Koto tea:ma: homolo haena:ta: Sadanima: ipiki pa:ta: a:pa alota: Neketa: ota: Koda:na: Eiyeke ya:ka:na:ta: kota: do toopimanu kone palaowa au lapeke leekeme. 4 Koto leekepate Yesuma: hombo peaaso alota: Mo *Baiboloma:ta: Halima: palaowa homeke naa na hapeke ya:la:pate Koda:na: pi paeyao miniki halie ekima: homeke epeke tupa: halieke la:la:me leekeme.
5 Kutaata: Sadanima: Yesu mo yako piki daoni Diutuseleme nane hatuku peekeme. Ipikana:ma: Yesuta: mo *tembolo da holu manda mea hao hata: 6 ipiki pa:ta: alota: Neketa: Koda:na: Eiyeke ya:ka:na:ta: kota: do pa:ta: hao oni kenkena: naka: kone lopa:niae. Pa ekipeke. Mo Baiboloma: alota: Mo enisolo tonuma: neke handeteke haena: Koda:ma: iki pa:ta: pi lelieke. Kutu pia:ka:na:ta: mo toopi manuma: naka: anke naapa:na:ta: mo enisolotonu ika: kikima: neke miniliao handeteke halimikie la:la:me leekeme. 7 Koto leeke Yesuma: ipika: pi hombo peaaso alota: Ota: alepate mo Baiboloma: pi ma:nda:ta: dupa la:la:me. Mo Tekehali naka: Koda:ta: la handa:la:eki na pia:peke la:la:me leekeme.
8 Koto leeketa: mo Sadanima: Yesu pa hatuku pote tieke ma:nda: manda hatuku puaata: koto pa:ta: hata:ta: mo kenke paeyaona: ta:ta: ta:ta: piki kilu tombuao hala:eki make ika: ta:ta: ta:ta: piki au epeke epeke make waleekeme. 9 Nakana:ma: I̱ pa:ta: tumiki yotuao panda:puniao pita: yeni pika:na:ta: kota: koto handele ale paeyaota: I̱ma: neke pa:ta: kulueke Sadanima: leekeme. 10 Koto leeke Yesuma: hombo peaaso alota: Sadani neke puma. Mo Baiboloma: alota: Koda: pa:ta: homeke panda:puniao yeiya: laaso hata: ipika: kakena: homeke homo hapa:peke la:la:me leekeme.
11 Koto pi leeketa: mo Sadanima: Yesu mina:pa:lao pulu haena:ta: enisolo tonuma: ipiki tamba: muluekema: epemekeme.
Yesuma: Ka:lili nane hata: pi waleekeeki
12 Dioni dipula mea pitaeyekeeki opuaata: Yesuma: koto pa:ta: mina:pa:lao Ka:lili nane peekeme. 13 Ipikana:ma: Na:sa:tete da na hao hake mo ikali leke Ka:lili tea: nane hayeke da homeke bikita: Kapeneami halo peekeme. Koto data: mo Sebuloni kenke pita: Na:petali kenke yaapo pa:ta: wiekeme. 14 Kutu pieke ekima:ta: mo hande potopede hali *Aisayama: amba: la: wiekeeki yaaluekema: piekeme. Koto la: wieke pita: dupa
15 Mo Diodani ikali mone tea:na: mo ikali leke pa:ta: opolo pula: pota: ula: Sebuloni kenkeo o Na:petali kenkeo mo *Diendaili wanda:halina: kenke Ka:lilio
16 mo timba: leke pa:ta: hao haleme wanda:hali paeyaoma: pa̱a̱ tieke handilimikie.
Mo homo hala: timba: leke kenke pa:ta: haleme wanda:hali iki pa:ta: mo pa̱a̱ma: pa̱a̱ peaalieke leekeme.
17 Koto tomona:ta: Yesuma: ipika: pi walolota: dupa Koda:na: *Kilu Tombuao Hala: ekita: teke pa:ta: ya:la:ma: ika: hoke haumanu hoki walaa la:ka:la:pa:peke lo hayekeme.
Yesuma: tonkopu hali wi leekeeki
18 Yesuma: mo hande Ka:lili ikali leke houna: pulu hata:ta: ta:peli mu haepeke hama̱la̱: yaapo Saimono biki ma:nda:ta: Pida make hameke A:ndutu yaapoma: mo hande ikali leke pa:ta: tenki nuna: ta:peli minolo haepekeeki handeekeme. 19 Yesuma: ipiliki pa:ta: alota: Ipilikana:ma:ta: wanda:hali mu hapena: I̱ma: wala:tialuekema: ya hoki nane teli mea ipupe leekeme. 20 Koto leeketa: koto kone ipilika: tenki numanu mina:pa:lao ipiki teli mea pepekeme.
21 Mo pate leke pulu hata: hama̱la̱: ma:nda: Dia:mesi Dioni yaapo handeekeme. Ipilika: apa:ta: Sepedie. Ipilikita: ipilika: apa: ame̱le̱ kawaso manda pita: ika: tenki numanu epeaaso pitimikime. Kutu polo pitina:ta: Yesuma: ipiliki wi leekeme. 22 Kutu pieketa: koto kone ipilika: apa: make mo kawaso make mina:pa:lao Yesu teli mea pepekeme.
Wanda:hali wamo pu pi wala:la:eki yaapo
23 Yesuma: mo Ka:lili kenke paeyao pa:ta: pominolo hata: ika: pi hotu haemeke damanu pa:ta: pi waleekeme. Ipikana:ma: mo Koda:na: Kilu Tombuao Hala: ekina: Pi Seliapomanu walolo hata: mo wanda:halina: ta:ta: ta:ta: piki yeni ki paeyao wamo peayekeme. 24 Koto ipika: pieke hau manuna:ta: Sitia kenke paeyao pa:ta: kende tupa: wiekeme. Koto pi opuaata: wanda:halima: yeni ta:ta: ta:ta: hake tanda mu haemeke wanda:hali make hoke temokomanu pitu make lu keaaso hata: lopo haemeke wanda:hali make kiki anke lupa wiki wanda:hali make ota: paeyao ipiki pa:ta: mea epemekeme. 25 Wanda:hali wopu Yesu pa:ta: teli mea pemekeme. Koto wanda:halita: Ka:lili kenke nanema: wanda:hali make Diudia kenke nanema: wanda:hali make mo Diodani mone tea: nanema: wanda:hali make iki paeyaoma: ipiki teli mea pemekeme.