Omooro ughwa amanshë agha öbhöhöru
22
Mbe,
maraika uyö,
akaanyörökya omooro ughwa amanshë agha öbhöhöru,
ghono ghwaarabherranga kya ikyowa.
Ghwaarweranga mwi-rungu irya ikitumbë ikya ekekama ikya Waryobha na Omoona Ringʼöndi.
2 Omooro ghuyö,
gwaahetanga ghatëghatë iya omohanda omonene ughwa mu-mughi ghuyö.
Ghwaare-ho ömötë ughwa öbhöhöru ghono ghwaatahatirë humbu na humbu.
Ömötë ghuyö,
ngwaamanga sehagho kera umwëri,
ko-mooka mara ikömi na kabhërë.
Amatö agha ömötë ghuyö n-dyogho ryaarë irya ukuhwënia Abhakyaro.
3 Umughi ghuyö,
teghorebha-mo na ëkëntö kyokyonswe keno kyaihiimwa na Waryobha.
Na ikitumbë keera ikya ekekama ikya Waryobha,
bhaana Omoona Ringʼöndi,
nkeraabhenga mu-mughi muyö.
Abhaköri abha emeremo abha Waryobha,
mbaremosengerra.
4 Mbaremomaaha,
kera ömöntö naryandekwa iriina irya Waryobha ku-bhusyö ubhwaye.
5 Ubhutikö tebhorebha mu-mughi ghuyö röndë hë.
Abhantö tebharëtönibhwa na setara,
handë emerengaari ighya iryobha hë,
ko bhoora Omonene Waryobha,
we arebha obhorabhu ubhwabho.
Abhantö bhayö,
mbaretonga amakora ghonswe igho.
Amangʼana agha umuhiko
6 Mbe,
maraika uyö akantëëbhya igha,
“Amangʼana ghano,
na-agha obhoheene,
kora n-ga ukukumibhwa.
Omonene Waryobha ono akuhuuha abharööti Umwika uwaaye,
yaatömirë maraika uwaaye ökwörökya abhaköri abha emeremo abhaaye amangʼana ghano gharaabhe bhöngö hano.”
7 Yëësu araghamba igha,
“Itegherra!
M-böngö ndaashe.
Waryobha naraangʼoore bhano bhakoghoota na ököröndërrya amangʼana agha öbhörööti ubhwa mo-ketabho mono.”
8 Öni Yohana,
nö-öni naaighuurë na ukwimaahera amangʼana ghayö bhuuya.
Na hano naaghaighuurë na okoghamaaha,
naaghööyë bhubhuumaayë,
bhöröngë ubhwa maraika uyö yaanyörökyanga amangʼana ghayö,
nkatuna igha mosengerre.
9 Kasi we akantëëbhya igha,
“Tigha,
otakaakora igho!
Öni wonswe m-mököri uwa emeremo murikyaho ndë.
N-kya abhakumya bharikyaho abharööti ndë,
na abhandë bhonswe igho bhano bhakoghoota engʼana iya eketabho keno.
Ku bhuyö sengerra Waryobha umwene igho!”
10 Mbe,
maraika uyö akantëëbhya igha,
“Amangʼana ghano agha öbhörööti ubhwa mo-ketabho mono,
otakaaghabhisa,
ko bhoora ghonswe igho ghano ghaghambirwë muyö,
enkaagha iyaagho haangʼë ërë.
11 Mbe,
ömöntö ono akokora amangʼana amaghogho,
we ataghëndërrya okokora amaghogho ghayö,
na ono akokora amangʼana amanyanku,
wonswe aghëndërri okokora amangʼana amanyanku ghayö.
Ömöntö uwa heene,
wonswe aghëndërri okobha ömöntö uwa heene,
ömöhörëëru wonswe,
aghëndërri okobha ömöhörëëru.”
12 Yëësu araghamba igha,
“Itegherra!
M-böngö ndaashe.
Nkuusha ndë na rihaki irya kera ömöntö,
ko okorengʼaana na bhono yaakora.
13 Öni nö-öni Esemoko na Umuhiko,
nö-öni nkosemora amangʼana ghonswe igho,
na okoghamarërya.”
14 Mbe,
nyakara abhantö bhano bhakufura singibho isyabho,
okore bhaikërërribhwi bhasohe mu-mughi omohya ghuyö,
okohetera mu-bhihiita ibhyagho,
na bharaagherenga sehagho isya ömötë ughwa öbhöhöru.
15 Kasi abhaturutumbi bhonswe igho,
abhasooraare,
abhaiti abha abhantö,
bhano bhakosengerra ëbhëtöndö,
na bhonswe igho bhano bhakorongoha,
mbarebha kebhara iya umughi ghuyö,
kya sësëësë.
16 “Öni Yëësu,
nö-öni umwebhorwa uwa omokama Daudi,
nkomekameka ndë kya entorrona.
Ntömirë maraika uwaane,
aashe abhatëëbhi bhëënyu abhasoorani abhaane,
amangʼana ghano ko okoghera iya amakanisa.”
17 Umwika Ömöhörëëru uwa Waryobha,
na umwenga uwa Omoona Ringʼöndi,
nkobherekera bharë Omonene igha,
“Nshö!”
Na abhantö bhonswe igho bhano bharaaighwe amangʼana ghayö,
bhaghambe igha,
“Nshö!”
Wowonswe ono aana inyonta,
ono akutuna amanshë,
aashe anywe amanshë agha öbhöhöru bhosa igho.
Amangʼana agha umuhiko
18 Nkötëëbhya ndë ömöntö wowonswe ono araaighwe amangʼana agha öbhörööti agha mo-ketabho mono igha,
hano ömöntö wowonswe arëngërërri-mo amangʼana aghaaye,
Waryobha wonswe naraamwëngëri ibhyateko bheno bheghambirwë mo-ketabho mono.
19 Ömöntö wowonswe ono araaruusi engʼana yoyonswe igho ukurwa mo-mangʼana agha öbhörööti ubhwa eketabho keno,
Waryobha wonswe naraamuruusiri-ho obhoheene ubhwa okomenya mu-mughi ömöhörëëru,
na obhoheene ubhwa okorya sehagho isya ömötë ughwa öbhöhöru.
20 Na ono akuruusya ubhwimërërri ubhwa amangʼana ghano,
araghamba igha,
“M-maheene,
m-böngö ndaashe.”
Amina.
Otaasha Omonene Yëësu!
21 Örööbhö urwa Omonene Yëësu,
robhe hamwë na bhëënyu bhonswe igho.
Amina.